Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺ENde die Heere heeft tot Moysen ghesproken, segghende.

+ A

2

Spreect tot die kinderen van Israhel, ende ghi sult hen segghen. Een mensch die een ghelofte ghedaen heeft, ende zijn ziele Gode belooft heeft, die sal die weerde gheuen, nae die weerderinghe.

3

Eest dat een man is van twintich iaren tot dat sestichste iaer, soo sal hi vijftich siclen gheuen siluers nae tgewicht der heyligher plaetsen,

4

eest een vrouwe, dertich,

5

Maer van tvijfste iaer tot dat twintichste, soo sal een mans persoon twintich siclen gheuen, een vrouwe thien.

6

Van eender maent out tot dat vijfste iare soo salmen voor een knechtken gheuen vijf siclen, voor een meysken drije.

7

Een man die tsestich iaren ende daer bouen out is, sal vijfthien siclen gheuen, een vrouwe thien,

8

Eest dat die arm is, ende dat hi niet machtich en is dese ghesette weerde te gheuen, soo sal hy voor den priester staen, ende hoe veel dat die waerderen sal, ende sien sal dat hi gheuen can, soo veel sal hi gheuen.

9

Maer eest dat iemant gode belooft een beeste welcmen den Heere offeren mach, dat sal heylich wesen

10

ende ten mach niet verwisselt worden, dat is gheen beter om een

[p. *130]

quaet noch gheen argher om een goet. Ende eest dat hy dit verwisselt, ⁺soo sullen si den Heere gheheylicht sijn, soo wel tghene dat verwisselt is, als dat daer die wisselinghe voor ghedaen is.

+ B

11

Eest dat iemant ghelooft een onsuyuer beeste welcmen den Heere niet offeren en mach, die salmen voor den priester brenghen,

12

die welcke ondersceydende oft goet oft quaet is, sal den prijs stellen,

13

ende eest dat hi dat gheuen wilt diet offert, soo sal hy het vijfste deel daer op legghen bouen die waerderinghe.

14

Eest dat een mensch zijn huys belooft, ende den Heere gheheylicht heeft, soo sal die priester dat besien oft goet oft quaet is, ende nae den prijs die van hem ghestelt sal worden, salt vercocht worden,

15

maer eest sake dat die ghene diet belooft heeft, tselue wilt lossen, soo sal hi het vijfste deel vander waerderinghe daer toe legghen, ende hy sal dat huys hebben.

16

Eest sake dat hi eenen acker van sijnder besittinghen den Heere belooft ende gheheylicht heeft, nae die mate sijns saetcorens sal den prijs ghewaerdeert worden eest sake dattet lant met dertich maten ghersten besaeyt wort, soo salmen dat vercoopen vijftich siclen siluers.

17

Eest dat hi ter stont nae dbeghinnende iaer vanden iubileus eenen acker gheloeft heeft, soo salment waerderen soo vele als die soude moghen ghelden,

18

maer eest nae een luttel tijts, soo sal die priester het ghelt rekenen nae dat ghetal der iaren die noch te comen zijn, tot dat iubileus iaer, ende dat salmen vanden prijs afnemen,

19

⁺maer eest dat hi den acker lossen wilt, dien belooft hadde, soo sal hi het vijfste deel van dat gheschat ghelt daer toe legghen, ende hi sal dien besitten.

+ C

20

Maer eest sake dat hi dien niet en wilt lossen, maer dat hi iemant anders vercocht wort, soo en sal hy dien belooft heeft, den seluen niet meer moghen lossen,

21

want als den dach van dat iubileus iaer comen sal, soo sal den acker den Heere gheheylicht zijn, ende die gheheylichde erue behoort der priesters recht toe

22

Eest sake dat eenen acker ghecocht is, ende niet vander ouders erfgoeden den Heere gheheylicht wort,

23

soo sal die priester den prijs rekenen, nae tghetal der iaren, tot dat iubileus iaer, ende die den acker den Heere belooft heeft, sal dien gheuen den Heere,

24

maer int iubileus iaer, soo sal dien acker weder comen tot sijnen iersten Heere, dien vercocht hadde, ende dien ghehadt heeft ten lote sijnder besittinghe.

25

Alle waerderinghe sal ghewegen worden nae den sicle der heyliger plaetsen, Eenen sicle heeft twintich hellinghen.

26

Die ierste gheborenen die welcke Gode toebehooren en sal niemant moghen den Heere heylich maken ende belouen, tsij oft eenen osse oft een schaep is, ⁺sij sijn des Heeren,

+ D

27

Maer eest sake dat een onsuyuer beeste is, soo sal hy dat lossen diet gheoffert heeft, nae sijn weerderinghe, ende hi sal daer toe doen het vijfste deel vanden prijs, Maer en wilt hy dat niet lossen, soo salt iemanden anders vercocht worden, soo vele alst te voren ghewaerdeert was.

28

Alle dat den Heere gheheylicht wort, tsij oft een mensch is, oft een beeste, ofte eenen acker, dat en salmen niet vercoopen noch lossen moghen. Soe wat eens gheheylicht is, dat sal een heylich der heylighen wesen den Heere,

29

Ende al dat gheheylicht is, dat van eenen mensche gheoffert wordt, en sal niet ghelost worden, maer tsal die doot steruen.

30

Alle die thienden des lants tsij vanden coren vruchten oft vanden oogst der boomen, behooren den Heere toe, ende die worden hem gheheylicht

31

maer eest sake dat iemant sijn thienden wilt lossen, die sal het vijfste deel van dien daer toe doen.

32

Van allen thiende van ossen, scapen, ende gheyten, die welck onder der herders roede gaen, soo wat het thienste coemt, dat sal den Heere gheheylicht wesen,

33

Men sal niet kiesen noch goet noch quaet, noch men en sal dat een voor dander niet verwisselen, maer eest dat iemant verwisselt, soo sal tgene dat verwisselt is, ende tgheen daer voor dat verwisselt is, den Heere gheheylicht sijn, ende men en sal dat niet lossen.

34

Dit sijn die gheboden welck die Heere Moysi bevolen heeft totten kinderen van Israhel opden berch Sinai.

Hier eyndet dat derde boeck Moysi Leuiticus ghenaemt.