Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺ENde die Heere heeft tot Moysen ghesproken, segghende.

+ A

2

Ghebiedt den kinderen van Israhel, dat sij v olie brenghen van olijfboomen, dalderpuerste ende claer om die lampen eewelijc te bereyden,

3

buyten dat voorhancsel des ghetuyghenis, in dat tabernakel des verbonts. Ende Aaron sal die stellen van tsauonts tot smorgens toe voor den Heere tot eenen eewigen Gods dienst ende ghewoonte in uwe gheslachten.

4

Ende die sullen altijt gestelt worden opden aldersuyuersten candelaer voor des Heeren aenscijn.

5

Ghi sult ooc bloeme van meel nemen, ende daer af twaelf brooden backen die een yeghelijc sullen hebben twee thiende deelen,

6

waer af ghy die sesse sult stellen aen deen sijde ende ses aen dander sijde, op die alder puerste tafele voor den Heere,

7

ende ghi sult daer op stellen vanden alder claersten wieroock, op dattet broot wesen mach tot een ghedenckenisse van des Heeren offerande,

8

⁺Tot elcken sabboth dach sullen die voor den Heere verandert worden ende si sullen ontfanghen worden vanden kinderen van Israhel voor een eewich verbont,

+ B

9

ende si sullen Aaron ende sijnen sonen toebehooren, dat sij die eten sullen op die heylighe plaetse, want het is een alder heylichste van des Heeren sacrificien met een eewich recht.

10

Ende siet daer is eender Israhelijtscher vrouwen sone wtghegaen den welcken sij ghebaert hadde van eenen Egypschen man onder die kinderen van Israhel, ende hi heeft ghekeuen inden heyrleger tsegen eenen Israhelijtschen man.

11

Ende als hy den naem des Heeren gheblasphemeert hadde, ende dien vermalendijt, soe is hi tot Moysen ghebracht. (Ende zijn moeder hiet Salumith Dabris dochter van Dans gheslachte)

12

ende sij hebben hem in die gheuanckenisse ghesteken, tot dat si weten souden, wat die Heere ghebieden soude,

13

Ende die Heere heeft tot Moysen ghesproken,

14

⁺segghende. Leyt wt den Gods lasteraer wten legher, ende alle diet ghehoort hebben, sullen haer handen op zijn hooft legghen, ende alle dat volck sal hem steenen,

+ C

15

Ende totten kinderen van Israhel suldi segghen. Een mensch die sijnen Godt veruloect, die sal sijn sonde draghen,

16

ende soo wie den naem des Heeren lastert, sal die doot steruen, Alle dat volck sal hem met steenen doot werpen, tsij oft hi een ingheboren borgher is oft een wtlander. Soo wie den naem des Heeren lastert, sal die doot steruen.

17

Soo wie slaet ende doodet eenen mensch, die sal die doot steruen.

18

Soo wie een beeste dootslaet, die sal een ander in die stadt gheuen, dat is ziele om ziele.

19

Soo wie iemant van sijnen borghers eenich letsel aendoet ghelijck hi ghedaen heeft, alsoo sal hem gheschieden,

20

te weten brueck om brueck, ooghe om ooghe, tant om tant, ⁺sal hi wederom gheuen, hoedanich letsel hi iemanden aendoet, sal hy ghedwonghen worden te verdraghen

+ D

21

Die iemants behelpighe beeste dootslaet, sal een ander wederom gheuen. Die eenen mensch slaet, sal ghestraft worden,

22

Ghelijckrecht laet wesen onder v lieden tsij oft een wtlander, oft een ingheboren des lants ghesondicht heeft, Want ick ben die Heere uwe Godt.

23

Ende Moyses heeft tot die kinderen van Israhel ghesproken, ende sij hebben den Gods lasteraer gheleyt wt den legher, ende met steenen doot gheworpen, Ende die kinderen van Israhel hebben ghedaen ghelijck die Heere Moysi beuolen hadde.

[afbeelding]