Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde die Heere heeft tot Moysen gesproken, segghende.

+ A

2

Spreect tot die kinderen van Israhel, ende ghi sult tot hen segghen. Dit sijn des Heeren vierdaghen, die welcke ghy heylich noemen sult.

3

Ses daghen suldi werck doen, den seuensten dach (om dat dien des sabboths ruste is) soo sal hi heylich ghenoemt worden. Gheen werc en suldi op dien dach doen, het is des Heeren sabboth in allen uwen woonsteden.

4

Hierom zijn dit die heylighe vierdaghen des Heeren die ghi vieren moet, tot haren tijden.

5

In die ierste maent opden veerthiensten dach der maent tsauonts, soo eest des Heeren paesschen,

6

ende opden vijfthiensten dach van deser seluer maent, soo eest feest des Heeren van die ongheheefde brooden. Seuen daghen lanck suldy ongheheeft broot eten,

7

den iersten dach sal v lieden den alder feestelijcsten ende heylich wesen, op dien dach en suldy gheen slauelijcke wercken doen,

8

maer ghi sult den Heere sacrificien offeren int vier seuen daghen lanck, maer den seuensten dach sal den feestelijcsten ende den heylichsten wesen, ende op dien dach en suldi gheen slauelijck werck doen.

9

⁺Ende die Heere heeft tot Moysen gesproken, segghende.

+ B

10

Spreect tot die kinderen van Israhel, ende ghi sult tot hen segghen. Als ghi sult comen zijnt int lant dat ick v gheuen sal, ende dat ghy v coren sult ghemaeyt hebben, soo suldi schoouen der aeren draghen, dierste vruchten van uwen oogst, totten priester

11

die welcke sal den schoof voor den Heere opheffen op dat voor v lieden mach ontfancbaer wesen, des ander daechs nae den sabboth dach, ende hy sal dien heylich maken,

12

ende opden seluen dach, dat den schoof gheheylicht wort, soo salmen oock ten offer dootslaen, een iarich onbesmet lammeken tot eenen brantoffer des Heeren,

13

Ende daermede salmen ooc spijsoffer offeren, twee thiende deelen bloeme van mele met olie beslaghen, tot eenen rueckoffer des Heeren, ende tot eenen aldersuetsten rueck, ende tot dranck offer des wijns een vierendeel van de mate hin,

14

Ghy en sult gheen broot noch brij coken noch gheen pappen eten uan uwen coren, voor den dach dat ghy daer af uwen Godt sult gheoffert hebben, Dits een eewich ghebodt in allen uwen gheslachten ende woonsteden.

15

⁺Daerom suldi tellen van des anderen daechs nae den sabboth opden welcken ghi uwen schoof der ierster vruchten gheoffert hebt seuen volle weken

+ C

16

tot des ander daechs nae dat die seuenste weke sal heel volcomen wesen dwelc maken vijftich daghen,

17

ende alsoo suldi den Heere een nieuwe offerande offeren wt allen uwen woonsteden, twee brooden der ierster vruchten, ghemaect van twee thiende deelen ghedeesemde bloeme, die welc ghy sult backen tot deerste vruchten tot des Heeren,

18

Ende ghy sult met die brooden offeren seuen onbesmette lammekens van eenen iare, ende een calf wt die runderen, ende twee rammen ende die sullen wesen tot brantoffer, met haren spijsoffer, tot eenen aldersuetsten rueck den Heere,

19

Ghi sult oock eenen bock bereyden voor die sonde, ende twee lammeren van eenen iare tot die vreedofferande,

20

⁺Ende als die priester dese metten brooden der ierster vruchten voor den Heere opghehauen heeft, soo sullen die comen tot sijnen ghebruycke,

+ D

21

Ende ghy sult desen dach noemen den alderfeestelijcsten ende den alderheylichsten. Gheen slauelijck werck en suldi op dien dach doen. Een eewighe wettelijcke maniere sal dit wesen in allen uwe woonsteden ende gheslachten.

22

Maer als ghy dat coren ws landts sult maeyen, soo en suldi dat niet afsnijden tot aen die eerde toe, noch ghi en sult die achterbleuen aeren niet vergaderen, maer ghi sult die laten voor die arme ende vreemdelinghen, Ick ben die Heere v Godt.

23

Ende de Heere heeft tot Moysen gesproken, segghende.

24

Spreect tot die kinderen van Israhel. In die seuenste maent op den iersten dach der maent salt v wesen den sabboth der ghedenckenissen met slaende trompetten, ende sal heylich ghenoemt worden,

25

gheen slauelijck werck en suldi op dien doen, ende ghy sult den Heere brantofferande offeren.

26

Ende die Heere heeft tot Moysen gesproken, ⁺segghende.

+ E

27

Den thienden dach deser seuenster maent salt wesen den alder feestelijcsten dach der versoeninghen, ende sal heylich ghenoemt worden, Ende ghi sult v zielen pijnighen op dien dach, ende den Heere brantoffer offeren,

28

Gheen slauelijck werck en suldy doen ten tijde van desen dach, want this den versoendach, op dat die Heere v Godt v ghenadich sij.

29

Soo wat ziele op desen dach niet en wordt ghepijnicht, die sal vergaen wt haren volcke,

30

ende soo wie dat eenich werc doet, dien sal ick roeyen wt haren volcke,

31

Daerom en suldi gheen werck op dien dach doen, het sal v lieden wesen een eewighe wet, in allen uwe gheslachten ende woonsteden,

32

Het is den sabboth der rusten, ende ghi sult uwe zielen pijnighen opden neghensten dach der maent, Vanden auont totten auont suldi v sabbothdaghen houden.

33

Ende die Heere heeft tot Moysen gesproken, ⁺segghende.

+ F

34

Segghet den kinderen van Israhel. Vanden vijfthiensten dach deser seuenster maent sullent feesten der tabernakelen wesen seuen daghen lanck,

35

Den iersten dach sal den feestelijcsten ende heylichsten ghenoemt worden, gheen slauelijc werck, en suldi op dien dach doen, ende seuen daghen lanck suldi brantofferanden den Heere offeren,

36

Ende den achtsten dach sal den feestelijcsten ende den heylichsten zijn, ende ghy sult den Heere brantofferanden offeren, Want het is der vergaderinghen ende des versamens dach, gheen slauelijck werck en suldy op dien dach doen,

37

Dit zijn die feestdaghen des Heeren, die ghy dalder feestelijcste ende heylichste noemen sult, ende ghy sult op dese den Heere offeranden offeren, brantofferanden ende spijsofferanden, nae die behoorte van elcken daghe

38

wtgenomen des Heeren sabboth daghen, ende ooc v lieder gauen, ende die ghi wt beloften sult offeren, oft die ghi vrijwillichlijc den Heere offeren sult.

39

⁺Daerom vanden vijfthiensten dach der seuenster maent, als ghi alle die vruchten ws lants sult vergadert hebben, soo suldi seuen vierdaghen des Heeren onderhouden, Opden iersten ende opden achtsten dach salt sabboth wesen, dat is ruste,

+ G

40

Ende

[p. *127]

ghi sult voor v nemen die vruchten van die alder schoonste boomen ende rijseren van palmboomen, ende tacken van boomen die veel ende dic van bladeren zijn, ende wilgen vander beken, ende ghi sult v verblijden voor den Heere uwen God

41

ende ghi sult zijn hoochtijt houden seuen daghen int iaer, dit sal een eewelijcke wettighe manier wesen in uwen gheslachten. In die seuenste maent suldi feestdaghen vieren,

42

ende ghi sult seuen daghen lanc in loouerhutten woonen,

43

Soo wie dat van Israhels gheslachte is die sullen woonen in die tabernakelen, op dat v naecomelinghen moghen leeren, hoe dat ic die kinderen van Israhel heb doen woonen in tabernakelen, als ick hen leyde wt dat lant van Egypten, ick ben die Heere v Godt.

44

Ende Moyses heeft tot die kinderen van Israhel ghesproken van die hoochtijden des Heeren.