Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ENde die Heere heeft ooc tot Moysen ghesproken, segghende.

+ A

2

Spreect tot Aaron ende sijn sonen, dat sij hem wachten van tghene dat die kinderen van Israhel gheheylicht hebben, ende dat sij niet en besmetten den naem der dinghen die mi gheheylicht sijn, welck sij offeren. Ick ben die Heere.

3

Segt tot hen ende tot haren nacomelinghen. Soe wat mensch van uwen gheslachte gaet tot die dinghen die gheheylicht sijn, ende welck die kinderen van Israhel den Heere gheoffert hebben, in den welcken eenighe onsuyuerheyt is, soe sal hi vergaen voor den Heere, Ick ben die Heere.

4

Een mensch van Aarons sade die lazerich is, oft lijdende den vloet des saets, die en sal niet eten van tghene dat my gheheylicht is, voor dat hy ghenesen is. Soe wie yet onreyns ghenaect ouer den dooden, ende wt wien saet coemt, als des natuerlijcken versamens,

5

ende die eenich cruypende ghedierte raect, oft yet dat onsuyuer is, welcs handelinghe oock onsuyuer is,

6

die sal onsuyuer wesen totten auont, ende hy en sal niet eten van die dinghen die gheheylicht sijn, maer als hy sijn vleesch sal met water ghewasschen hebben,

7

ende dat die sonne onder ghegaen is, dan sal hi ghesuyuert eten van dat gheheylicht is, want het is sijn spijse,

8

Gheen dier van selfs ghestoruen ofte vanden beesten gheuanghen, ⁺en sullen sij eten noch sij en sullen hen daer aen niet besmetten, Ick ben die Heere.

+ B

9

Dat sij mijn gheboden houden op dat sij der sonden niet schuldich en worden, ende steruen in die heylighe plaetse, als sij die ontsuyuert hebben, Ick ben die Heere diese heylicht.

10

Gheen vreemdelinck en sal van dat gheheylichde eten, Des priesters huysknecht, noch sijn ghehuerde wercman en sal daer niet af eten.

11

Maer den welcken die priester ghecocht heeft, ende die in sijn huys gheboren is, die sullen daer af eten,

12

Eest sake dat des priesters dochter ghehout is aen iemant van den ghemeynen volcke, soe en sal sij niet eten van den ghenen dat gheheylicht is, nocht oock van den offeranden der eerster gauen,

13

maer eest dat sij een weduwe, oftvan haren man verworpen, ende sonder kinderen wederom comen is tot haers vaders huys, soe sal si gheuoedt worden van haers vaders spijse, ghelijck sij pleech, doen sij een ionghe dochter was. Maer gheenen vreemdelinck en salt gheoorloft wesen daer af te eten,

14

Soe wie door onwetenheyt etet van den gheheylichden, die sal het vijfste deel daer toe doen met het ghene dat hi gheten heeft, ende dat sal hi den priester gheuen in die heylichste plaetse,

15

⁺Ende sij en sullen niet besmetten die gheheylichde dinghen der kinderen van Israhel, die sij den Heere offeren,

+ C

16

op dat sij bi auontueren die boosheyt van haer misdaet niet en draghen, als sij die gheheylichde dinghen gheten hebben, Ick ben die Heere diese heylighet.

17

Ende die Heere heeft tot Moysen ghesproken, segghende.

18

Spreect tot Aaron ende tot sijn sonen, ende tot alle die kinderen van Israhel, ende ghi sult tot hen segghen. Een mensch van den huyse van Israhel ende vanden vreemdelinghen die bi v woonen, die welc sijn offerande offert, tsij beloften betalende, oft vrijwillichlijc offerende, Wat dat hi van dies brengt tot des Heeren brantoffer,

19

om dat door v lieden soude gheoffert worden, dat sal een onbesmet manneken wesen, van den rinderen, ende vanden scapen, ende vanden gheyten

20

eest sake dat eenige smette heeft, soe en suldi dat niet offeren, noch ten sal niet ontfancbaer wesen.

21

Een mensch die den Heere offert een vreed offerande, oft beloften betalende, oft al willens offerende, soe wel vanden ossen, als vanden scapen sal hi sonder smette offeren, ende op dat mach ontfancbaer wesen, gheen smette en sal daer aen wesen.

22

Eest blint, eest gebroken heuet eenich litteeken, oft heuet eenich puystken, oft scorftheyt oft grillicheyt, soe en suldi dat den Heere niet offeren, Noch ghy en sult daer af niet ontsteken op des Heeren outaer.

23

⁺Eenen osse ende een scaep welcks oore oft steert afghesneden is, moechdy wel offeren wt eenen vrijen wille, Maer een belofte en moechdy daer mede niet betalen.

+ D

24

Soo wat dier sijn mannelicke leden onder sijn ghewreuen, ist gheplet, ghesneden, oft afghenomen, dat en suldi den Heere niet offeren, ende in v lant en suldi dat gheensins doen.

25

Ghi en sult uwen Godt gheen brooden offeren van eens vreemdelincs hant, Ende wat anders dat hy gheuen wilt, want sulcke dinghen sijn al bedoruen ende besmet, ghy en sult die niet ontfanghen.

26

Ende die Heere heeft tot Moysen gesproken, seggende.

27

Eenen osse, scaep oft gheyte als si gheboren sijn, soo sullen si seuen daghen wesen onder haers moeders mammen, maer opden achtsten dach ende daer nae machmen die den Heere offeren,

28

Ende het sij een coe, oft een scaep, men en sal die op eenen dach niet dooden om te offeren met haren ionghen.

29

Eest dat ghi een

[p. *126]

slachofferande den Heere offert tot dancbaerheyt, op datse mach versoenlijc wesen,

30

soo suldi die opden seluen dach eten, daer en sal niet af ouerblijuen tot des anderen daechs smorghens, Ick ben die Heere.

31

Bewaert mijn gheboden, ende doet die, ick ben die Heere.

32

En besmet mijnen heylighen naem niet, op dat ick mach gheheylicht worden, int midden der kinderen van Israhel, Ick ben die Heere die v heylighe

33

ende die v gheleyt hebbe wt dat lant van Egypten, dat ick v lieder Godt soude wesen, ick die Heere.