Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

ENde die Heere heeft tot Moysen gheseyt. ⁺Spreect tot die priesters Aaraons sonen ende segghet hen. Een priester en sal hem niet besmetten aen die dooden sijnder borghers,

+ A

2

dan alleen aen zijn gheslachte ende sijn nae maeschap, dat is aen sijnen vader ende moeder, ende aen sijn sone ende dochter, aen sijnen broeder

3

ende sijn suster die noch maghet is, die gheenen man ghetrout en heeft.

4

Noch ooc en sal hi hem niet ontreynighen aen den prince sijns volcs.

5

Sij en sullen haer hooft oft baert niet scheren, noch sij en sullen in hen vleesch gheen sneden maken

6

Sij sullen voor haren Godt heyligh wesen, ende sij en sullen sijnen naem niet besmetten, want sij offeren den welriekenden offer des Heeren, ende haers Gods brooden, ende daerom sullen sij heyligh wesen.

7

Hy en sal gheen hoer oft snoode ghemeyn vrouwe tot eender huysvrouwen nemen, nocht oock sulcke die van haren man verstooten es, Want hi is sijnen Gode ghewijt,

8

ende hy offert die voorgheleyde brooden, Dus moet hi heylich sijn, want ick ben heylich die Heere die v heylich make.

9

⁺Eest dat des priesters dochter beuonden wordt in oncuyscheyt, ende dat sij haers vaders naem besmet, die salmen metter vlam-

+ B

[p. *125]

men verbranden.

10

Die bisschop dat is die ouerste priester onder sijn broeders, op wiens hooft die olie der saluinghen ghestort is, ende wiens handen tot dat priesterschap ghewijt sijn, ende die metten heylighen cleederen ghecleedt is, die en sal sijn hooft niet ontdecken, ende sijn cleederen en sal hi niet schoeren,

11

Ende hi en sal gheensins gaen bi eenighen dooden, ooc en sal hi hem ouer sijnen vader ende moeder niet ontsuyueren,

12

noch hy en sal oock wt die heylighe plaetse niet gaen op dat hi die heylighe plaetse des Heeren niet en besmette, want die olie van sijns Gods heylighe saluinghe es op hem, Ick ben die Heere.

13

⁺Een maget sal hi tot een huysvrouwe nemen,

+ C

14

maer een weduwe oft een verlaten oft onreyn vrouwe oft een hoere en sal hy niet nemen, maer een ionghe dochter van sijnen volcke,

15

op dat hi den stam zijns gheslachts niet en menghe met die ghemeyn luyden sijns volcks, Want ick ben die Heere die hem heylich make.

16

Ende die Heere heeft tot Moysen ghesproken, segghende.

17

Spreect tot Aaron. Een mensch van uwen sade, door uwe familien, die een smette heeft, en sal sijnen Godt gheen brooden offeren,

18

noch hi en sal tot sijnen dienste niet gaen, eest dat hy blent, oft cruepel is, eest dat hy eenen te cleynen oft te grooten oft ghewronghen nuese heeft,

19

⁺oft heeft hi eenen ghebroken voet, oft hant,

+ D

20

eest een bultenaer, oft leepoghe, eest dat hi een witte scelle op sijn ooghe heeft, oft heeft hy een byblijuende, oft drooghe oft vochtige scorftheyt, oft es hi ghescoert,

21

Soe wie van Aaron des priesters sade smette heeft, die en sal niet bi comen om te offeren die slachofferanden den Heere noch die thoonbrooden sijnen Gode.

22

Maer hi sal nochtans moghen eten van die brooden die in die heylighe plaetse gheoffert worden,

23

alsoo nochtans dat hi binnen dat voorhancsel niet en gae, ende dat hi totten outaer niet en gae die een smette heeft, ende hi en moet mijn alderheylichste plaetse niet besmetten, Ick ben die Heere diese heylich make,

24

Hierom heeft Moyses tot Aaron ende tot sijn sonen ende tot alle die van Israhel ghesproken alle dese dinghen die hem gheboden waren.