Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde die Heere heeft tot Moysen ghesproken, seggende.

+ A

2

Dit suldi den kinderen van Israhel segghen. Een mensch vanden kinderen van Israhel, oft vanden vreemdelinghen die in Israhel woonen, eest dat iemant van sijn sade gheeft den afgod Moloch, die sal die doot steruen. Het volc des lants sal hem steenen,

3

Ende ick sal mijn aensicht teghen dien stellen, ende ick sal hem afsnijden wt dat midden van sijnen volcke, om dat hi den afgod Moloch van sijnen sade ghegheuen heeft, ende mijn heylighe plaetse ontsuyuert, ende mijnen heylighen naem besmet heeft.

4

Ende eest dat het volck des lants hier in versuemelijck waer, ende recht oft sij mijn ghebodt luttel achten, laten gaen den mensch die van sijnen sade Moloch ghegheuen heeft, ende dat si hem niet en willen dooden,

5

soo sal ick mijn aensicht op dien mensch setten, ende op sijn gheslachte, ende ic sal hem ende alle die met hem daer in medepleghers sijn gheweest dat hy oncuyscheyt met Moloch doen soude, wtroeyen wt dat midden van sijnen volcke.

6

Een ziele die haer afkeert tot die toueraers ende waersegghers, ende haer met hemlieden ontsuyuert, ic sal mijn aensicht teghen haer stellen, ende ick sal die dootslaen wt dat midden van haren volck.

7

⁺Wort gheheylicht ende weest heylich, Want ick ben die Heere uwe Godt.

+ B

8

Bewaert mijn gheboden, ende doet die. Ic ben die Heere die v heylich make.

9

Soo wie sijnen vader oft moeder vloect, die sal die doot steruen, ende soe wie sijnen vader oft moeder gheuloect heeft, sijn bloet sij op hem.

10

Eest sake dat yemant oncuysheyt bedreuen heeft met eens anders huysvrouwe, ende ouerspel ghedaen heeft met sijns naesten wijf, soe sullen die ouerspeelder ende ouerspeelstere die doot steruen.

11

Soe wie sijn stief moeder beslaept, ende sijns vaders scamelheyt ontdect, die sullen beyde die doot steruen, haer bloet si op haerlieden,

12

Eest dat iemant sijn behoude dochter beslaept, die moeten beyde steruen, want sij hebben een scandelijcke sonde ghedaen, haer bloet sij op hen.

13

Soe wie een knechtken beslaept, ghelijcmen met een vrouwe pleech te versamen, die hebben beyde een onsprekelicke groote sonde ghedaen, die doot moeten sij steruen, ⁺hen bloet sij op hen.

+ C

14

Soe wie een dochter ter huysvrouwen heeft, ende daer boven haer moeder ooc tot een huysvrouwe neemt, die heeft een grouwelijcke boosheyt bedreuen, hy sal leuende met die wijuen ghebrant worden, ende soe grooten ouerdaet en sal onder v lieden niet blijuen,

15

Soe wie hem met een beeste vanden grooten oft cleynen vee versaemt, die moet die doot steruen, ende die beeste suldi ooc dooden.

16

Een vrouwe die haer eenigher beesten onderleyt die sal oock metter beesten ghedoot worden, hen bloet come op hen.

17

Soe wi dat sijn suster te wijue neemt die sijns vaders oft sijns moeders dochter is, ende dat hi haer leelijcheyt siet, ende dat sij oock haers broeders leelicheyt siet, die hebben een ongheorloft dinck ghedaen, sij sullen ghedoot worden voor daenschijn haers volcs, om dat sij malcanders leelicheyt ontdect hebben, ende sij sullen haer misdaet draghen.

18

Soe wie hem versaemt met een vrouwe ten tijde van haren maenstonden, ende haer leelicheyt ontdect, ende dat sij oock den vloet haers bloets open doet, die sullen beyde ghedoot worden wt het midden van haren volcke.

19

Die schamelheyt van ws moeders ende ws vaders suster en suldi niet ontdecken, soe wie dat ghedaen heeft die heeft ontdect sijns vleeschs scamelheyt, sij sullen beyde haer misdaet draghen.

20

⁺Soe wie hem versaemt met die huysvrouwe van sijns vaders oft moeders broeder, ende ontdect die scamelheyt van sijnen gheslachte, die sullen beyde haer sonde draghen, sonder kinderen sullen sij steruen.

+ D

21

Soe wie sijns broeders huysvrouwe trouwet die doet een ongheorloft dinck, die heeft sijns broeders schamelheyt ontdect, sij sullen sonder kinderen wesen.

22

Onderhout mijn wetten ende mijn rechten, ende doet die, op dat het lant v niet wt en spouwe daer ghi sult ingaen ende in woonen,

23

En wilt niet wandelen nae die wetten der heydenen, die welck ick voor v lieden wt drijuen sal. Want alle dese dinghen hebben sij ghedaen ende ick hebse versmaet.

24

Maer ic segghe tot v lieden. Besidt hen lant dwelc ick v gheuen sal voor een erffenisse, een lant vloeyende van melck ende honich, Ick ben die Heere v Godt, die v ghescheyden hebbe van alle andere volcken.

25

Daerom soo scheyt ghy oock, een suyuer beeste van een onsuyuer, ende eenen suyueren voghel van eenen onsuyueren, op dat ghi v zielen niet en besmet aen eenighe beesten oft voghelen ende aen iet van alle dat hem opt daerde roert, ende die welcke ick v ghetoont hebbe dat sij onreyn sijn,

26

Ghi sult voor mi heylich wesen, want ick die Heere ben heyligh, ende ick heb v ghescheyden van alle andere volcken, om dat ghi mi toebehooren soudt.

27

Een man oft vrouwe daer eenen gheest van waerseggherie oft wichelie in is doet die doot steruen, men salse met steenen doot werpen, haer bloet sij op hen.