Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺DIe Heere heeft tot Moysen ghesproken, segghende.

+ A

2

Spreect tot alle die vergaderinghe der kinderen van Israhel, ende ghi sult tot hen segghen. Weest heylich want ick ben heylich v Heere v Godt.

3

Een yegelijck vreese sijnen vader ende sijn moeder, Bewaert mijn sabboth daghen, Ick ben die Heere uwe Godt.

4

En wilt v niet keeren tot die afgoden, noch en maect voor v gheen ghegoten goden, Ick ben die Heere uwe Godt.

5

Eest dat ghi den Heere offert een vrede offerande op dat si mach versoenlijck wesen,

6

soo suldi die eten opden seluen dach dat sij een vrede offerande gheworden is, ende des anderen daechs, maer watter ouerblijft tot opden derden dach, ⁺dat suldi int vier verbranden.

+ B

7

Soe wie nae dien tweeden dach daer af etet die sal ontsuyuert wesen, ende der ongoddelijcheyt schuldich,

8

ende hy sal zijn misdaet draghen, om dat hi dat heylichdom des Heeren ontsuyuert heeft, ende die ziele sal vergaen van haren volcke.

9

Als ghi het coren ws lants maeyen sult, soo en suldi dat tot aen die eerde niet afsnijden, noch ghi en sult den afval vanden aren niet vergaderen,

10

ende in uwen wijngaert en suldi oock niet vergaderen die achterghelaten druyuen oft afgheuallen besikens vergaderen, maer ghi sult den armen ende den wtlanders die laten afplucken, Ick ben die Heere v Godt.

11

Ghy en sult gheen dieuerie doen, Ghy en sult niet lieghen, ende niemant en sal sijnen naesten bedrieghen.

12

Ghi en sult gheenen valschen eedt doen by mijnen naem, noch ghi en sult den naem ws Gods niet besmetten, Ick ben die Heere.

13

Ghi en sult uwen naesten gheen onrecht doen onder schijn van recht, noch hem met ghewelt verdrucken. ⁺Den loon van uwen ghehuerden werckman en sal by v tot smorghens niet blijuen.

+ C

14

Ghi en sult den doouen niet veruloecken, voor den blenden en suldy gheen struycsel stellen, maer ghi sult den Heere uwen Godt vreesen, Want ic ben die Heere.

15

Ghi en sult niet doen dat onrecht es, noch ghy en sult gheen onrechtuaerdich vonnisse gheuen, En aenmerct niet den persoon vanden armen mensch, noch en eert dat aenschijn vanden machtighen niet, gheeft uwen naesten rechtuerdich vonnisse.

16

Ghi en sult gheen achterclapper wesen, oft gheen heymelijc twistmaker onder tvolck.

Ghi en sult niet staen tsegen dbloet ws naesten Ick ben die Heere.

17

⁺Ghi en sult uwen broeder in v herte niet haten, maer straft hem int openbaer, op dat ghi v aen hem niet en besondicht.

+ D

18

En suect gheen wrake, noch ghy en sult niet onthouden het onrecht van uwen borgheren.

Ghi sult uwen vrint beminnen ghelijck v seluen. Ick ben die Heere.

19

Bewaert mijn wetten. V behelpighe beesten en suldy niet doen versamen met eenighe beesten van een ander natuer.

Vwen acker en suldy niet besaeyen met verscheyden saet. Ghi en sult gheen cleedt aendoen dat van tweederhande draet gheweuen es.

20

Eest dat een man bi een vrouwe slaept met versamen des saetds, die een dienstwijf es, al es sij ooc edel, maer nochtans niet verlost met gelde, oft niet vrij ghemaect, die sullen beyde gheslaghen worden, ende sij en sullen niet steruen, om dat die vrouwe niet vrij en was,

21

⁺maer hi sal voer sijn misdaet den Heere voor die doere van dat tabernakel des ghetuyghenis offeren eenen ram

+ E

22

ende die priester sal voor hem bidden, ende voor sijn sonde voor den Heere, ende hi sal hem ghenadich wesen, ende die sonde sal vergheuen worden.

23

Als ghi int lant comen sijt, ende ghi daer sult vruchtbaer boomen gheplant hebben, soe suldy haer ierste wtschietsels afnemen, Die vruchten die sij voertbrenghen, sullen v lieden onsuyuer wesen, ende ghi en sult daer niet af eten.

24

Maer int vierde iaer soe sullen allen haer vruchten gheheylicht worden, loffelijck voor den Heere,

25

Maer ten vijfsten iare suldy die vruchten eten, vergaderende die vruchten die sij voorts brenghen. Ick ben die Heere v Godt.

26

Ghi en sult niet metten bloede eten. ⁺Ghi en sult gheen waerseggherie doen wter voghelen sanck noch gheen droomen waernemen.

+ F

27

Noch ghi en sult dat hayr ws hoofts int ronde niet scheren, noch uwen baert scheren.

28

Ende ouer eenen dooden en suldy v vleesch niet snijden, noch ghi en sult daer in gheen figuren oft litteekenen maken, Ick ben die Heere.

29

Ghi en sult v dochterniet ghemeyn maken, op dat het lant niet ontsuyuert, ende vol sonden en worde.

30

Bewaert mijn sabboth daghen, ende mijn heylighe plaetse vreest. Ick ben die Heere.

31

En gaet niet af tot die tooueraers, noch ghy en sult niet begheren te weten vanden waersegghers, dat ghi door hen besmet wort. Ick ben die Heere uwe Godt.

32

Voor een grijs hooft suldy opstaen, ende eert die persoon van den ouder, ende vreest uwen Heere Godt. Ick ben die Heere.

33

⁺Eest sake dat een wtlander in v lant woont, ende dat hi onder v lieden verkeert, soe en suldy hem niet verwijten,

+ G

34

maer laet hem

[p. *124]

onder v lieden wesen als een ingheboren, ende ghi sult hem lief hebben ghelijck v seluen, want ghi hebt seluer oock vreemdelinghen gheweest int lant van Egypten, Ick ben die Heere uwe Godt.

35

En wilt geen onghelijc doen int rechte, in die alle, int ghewicht, in die mate.

36

V waghe sal rechtuerdich zijn, ende die ghewichten sullen ghelijck sijn, dat mudde vat sal rechtuerdich sijn, ende tsester vat oock rechte, Ick ben v Heere Godt die v wt dat lant van Egypten gheleyt hebbe.

37

Bewaert alle mijn gheboden ende alle mijn rechten, ende doet die, Ic ben die Heere.