Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

ENde die Heere heeft tot Moysen ghesproken, segghende.

2

⁺Spreect tot die kinderen van Israhel ende ghy sult hen segghen. Ick ben die Heere v Godt,

+ A

3

ghi en sult niet doen nae die ghewoonten des lants van Egypten daer ghi ghewoont hebt, Ende ghi en sult ooc niet doen nae die manier des lants van Chanaan, daer ick v in brenghen sal, noch ghi en sult nae haer wetten niet wandelen.

4

Ghi sult nae mijn rechten doen, ende mijn gheboden onderhouden, ende daer in wandelen. Ick ben die Heere v Godt,

5

Bewaert mijn wetten ende mijn rechten, die welcke een mensch doende, sal daer door leuen, Ick die Heere,

6

Gheen man en sal gaen tot een naeste vrouwe van sinen bloede, om haer leelijcheyt te ontdecken. Ic ben die Heere,

7

Ws vaders leelijcheyt ende ws moeders leelijcheyt en suldy niet ontdecken, Het es v moeder ghi en sult haer leelijcheyt niet ontdecken.

8

Die leelijcheyt van ws vaders huysvrouwe en suldy niet ontdecken, want het es ws vaders leelijcheyt.

9

⁺Die leelijcheyt van uwer suster, die ws vaders oft ws moeders dochter es thuys oft buyten huyse gheboren, en suldy niet ontdecken.

+ B

10

Die leelijcheyt van ws soons dochter oft ws dochters dochter en suldy niet ontdecken, want het es v leelijcheyt.

11

Die leelijcheyt van ws vaders huysvrouwen dochter, die sij uwen vader ghebaert heeft ende v suster es, en suldy niet ontdecken,

12

Die leelijcheyt van ws vaders suster en suldi niet ontdecken want het es ws vaders vleesch.

13

Die leelijcheyt van ws moeders suster en suldy niet ontdecken, want het is ws moeders vleesch.

14

Die leelijcheyt van ws vaders broeder en suldy niet ontdecken, noch ghi en sult tot zijn huysvrouwe niet gaen, die v aengaet in naderscappe.

15

Die leelijcheyt van v behoude dochter en suldy niet ontdecken, want het es ws soons huysvrouwe, ⁺daeromme en suldy haer scandelijcheyt niet ontdecken.

+ C

16

Die leelijcheyt van ws broeders huysvrouwe en suldy niet ontdecken, want het es ws broeders leelijcheyt.

17

Die leelijcheyt van uwer huysvrouwen ende haerder dochter en suldy niet ontdecken, Haers soons dochter oft haers dochters dochter en suldy niet nemen, om haer scamelheyt te ontdecken, want die sijn haer vleesch, ende sulcke versaminghe es een schandelijcke oncuyscheyt.

18

Ghy en sult ws wijfs suster niet nemen tot hoerdom noch ghy en sult haer leelijckheyt niet ontdecken alsoe langhe als v huysvrouwe noch leuet.

19

Ghi en sult v niet versamen met een vrouwe die in haer maenstonden es, noch ghy en sult haer vuylijcheyt niet ontdecken.

20

Ghi en sult v niet versamen met ws naesten huysvrouwe, noch v besmetten met minghelinghe des saedts.

21

Ghy en sult van uwen sade niet gheuen, dattet gheoffert worde den afgod moloch, ende ghi en sult den naem ws Gods niet ontsuyueren. Ic ben die Heere.

22

⁺Ghi en sult v met gheenen knechtken versamen alsomen pleech met die vrouwen, want dat es afgrijselijc.

+ D

23

Ghi en v sult met gheen der beesten versamen, noch ghy en sult v daer mede niet besmetten. Een vrouwe en sal haer onder gheen beeste legghen, oft haer daer mede versamen, want dat es een grouwelijcke boosheyt.

24

En wilt v niet besmet-

[p. *123]

ten met eenighe van desen dinghen, daer alle die heydenen mede besmet sijn die welcke ick voor v aenscijn wtdrijuen sal,

25

ende daer het lant mede besmet es, wiens grouwelijcke sonden ick versoecken sal, alsoe dattet sijn inwoonders wtworpen sal.

26

Bewaert mijn wettighe gheboden ende mijn rechten, ende en doet niet van allen desen eyselijcken sonden, tsij een ingheboren oft een vreemdelinck, die als vreemt onder v verkeert,

27

Want alle dese afgrijselicheden hebben die inghesetenen van desen lande ghedaen, die hiervoor v ghewoont hebben, ende sij hebben het lant ontsuyuert,

28

Daerom wacht dat dit lant v ooc niet wt en worpe als ghi desghelijcs doet, ghelijc sij tvolck wtghespoghen heeft dat voor v was.

29

Soe wat ziele yet doet van desen afgrijselicheden, die sal vergaen van dat midden sijns volcks.

30

Bewaert mijn gheboden, En wilt niet doen dat sij ghedaen hebben die voor v gheweest hebben, ende en wilt v in die dinghen niet besmetten. Ick ben die Heere v Godt.

[afbeelding]