Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ENde die Heere heeft tot Moysen ghesproken, segghende.

+ A

2

Spreect tot Aaron ende tot sijn sonen ende tot alle die kinderen van Israhel, segghende tot hen. Dit es dwoert dat die Heere beuolen heeft, segghende.

3

Soe wat mensch wt den huyse van Israhel doodet eenen osse oft schaep, oft een gheyte, inden legher, oft buyten den legher,

4

ende die offerande voor den Heere niet en brenghet aen die doere van dat tabernakel des ghetuyghenis, soe sal hy des bloets schuldich wesen, recht oft hy bloet ghestort hadde, soe sal hi vergaen wt dat midden van sijnen volcke,

5

Daerom moeten die kinderen van Israhel haer slachofferanden den priester offeren die welc si opt velt ten offer dooden, op dat die den Heere gheheylicht worden voor die doere van dat tabernakel des getuygenis, ende dat si die den Heere offeren tot vreedtsamige slachofferanden,

6

⁺Ende die priester sal het bloet storten opden outaer des Heeren, aen die doere van dat tabernakel des ghetuygenis, ende hi sal dat vet des inghewants ontsteken tot eenen ruec der sueticheyt voer den Heere,

+ B

7

Ende si en sullen voertaen haer slachofferanden gheensins meer den duyuelen offeren met die welckesij oncuysheyt bedreuen hebben. Dit sal een eewighe wet wesen voor hen, ende voor haeren nacomelinghen,

8

Ende ghi sult tot hen segghen. Een mensch van dat huys van Israhel ende vanden wtlanders die als vreemdelinghen bi v verkeeren, die een brantofferande oft een slachofferande offert,

9

ende die niet en brengt voor die doere van dat tabernakel des ghetuygenis om den Heere gheoffert te worden, die sal vergaen van sijnen volcke.

10

Een mensch wie hi sij, wten huyse van Israhel oft vanden wtlanders, die by v lieden als vreemdelinghen verkeeren, ⁺eest sake dat hi bloet etet soe sal ick mijn aensicht tseghen zijn ziele stellen, ende ic sal die heel verderuen wt haren volcke,

+ C

11

want die ziele des vleeschs es int bloet, ende ick heb v dat ghegheuen om dat ghy daermede voor v zielen die versoeninghe doen soudt opden outaer, ende dat het bloet soude wesen tot een versoeninghe der zielen,

12

Ende daerom soe heb ick den kinderen van Israhel gheseyt. Gheen ziele van v lieden en sal bloet eten, noch oock vanden wtlanders, die als vreemt by v verkeeren.

13

Soe wat mensch van die kinderen van Israhel oft vanden wtlanders die onder v als vreemdelinghen woonen, eest dat hi door iaghen oft vlieghen eenich wilt dier, oft voghel gheuanghen heeft welckmen eten mach, soo sal hi dbloet van dien storten, ⁺ende dat met aerden bedecken,

+ D

14

want die ziele van allen vleesche es in dbloet, Waeromme soo heb ick den kinderen van Israhel gheseyt. Ghi en sult gheen bloet eten van eenighen vleesche, want die ziele des vleeschs es int bloet, ende soo wie dattet eedt, die sal steruen,

15

Een ziele die etet een prije die van selfs ghestoruen oft van eenighe beeste gheuanghen es, tsij oft hi es vanden ingheborenen oft vanden vreemdelinghen, die sal sijn cleederen wasschen ende sij seluen met water, ende hi sal besmet sijn totten auont toe, ende bi deser voeghen sal hi suyuer worden

16

Soe wie dat zijn cleederen oft sijn lichaem niet en wascht, die sal zijn misdaet draghen.