Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde die Heere heeft tot Moysen ghesproken (nae die doot van Aarons twee sonen, doen sij verslaghen waren om dat sij vreemt vier offerden)

+ A

2

ende hi heeft hem gheboden, segghende. Spreect tot Aaron uwen broeder, dat hi tot allen tyden in die heylighe plaetse niet en gae, die daer binnen dat voorhancksel es, voor die der ghenaden stoel, daer die arcke mede bedect es, op dat hi niet en sterue (Want ic sal door een wolcke ghesien worden op der ghenaden stoel)

3

ten sij dat hi dese dinghen te voren ghedaen hebbe, Hy sal een calf voor die sonde offeren, ende eenen ram tot eenen brantoffer,

4

Hy sal met eenen lijnen ouerrock ghecleedt wesen, ende met eenen lijnen nedercleedt sal hi zijn schamelheyt bedecken, hi sal omgordt zijn met een lijnen gordel, ende eenen mijter van lijnen, sal hi op zijn hooft stellen, want deze cleederen zijn heylich met alle den welcken hi aenghedaen sal worden als hi ghewasschen es,

5

Ende hi sal van alle die menichte der kinderen van Israhel nemen twee bocken voor die sonde, ende eenen ram tot eenen brantoffer,

6

Ende als hi dat calf sal gheoffert hebben, ende voor sij seluen ghebeden, ⁺ende voor sijn huys,

+ B

7

soe sal hy die twee bocken doen staen voor den Heere, in die doere van dat tabernakel des ghetuyghenis,

8

ende worpende op beyde dlot, dat een lot voor den Heere, ende het ander opden bock die men wech senden sal,

9

ende den bock wiens lot valt voer den Heere, dien salmen offeren voor die sonde,

10

ende wiens lot valt opden wtgheschicten bock, dien sal hy leuende voor den Heere stellen dat hi op hem mach ghebeden storten, ende dat hy dien dan wtsende in die woestijne.

11

Dese dinghen wettelijc ghedaen sijnde soe sal hi tcalf offeren ende biddende voor hem seluen ende voor sijn huys, sal hi dat ten offer doot slaen,

12

ende hy sal nemen een wieroock vat, dwelck hy sal vullen met die vierighe colen des outaers, ende sceppende metter hant dat ghemaect rueckwerc tot eenen welriekenden brantoffer, soe sal hi gaen binnen dat voorhancsel, in die heylichste plaetse,

13

op dat als hi die welriekende specerien opt vier gheleyt sal hebben den neuel ende den roock daer af, bedecke den stoel der ghenaden welck op dat ghetuyghenis legt, ende dat hy niet en sterue.

14

Ende hi sal oock nemen vanden bloede des calfs, ⁺ende seuenwerf met sijnen vingher spraeyen tseghen der ghenaden stoel ten oosten,

+ C

15

Ende als hi den bock sal ten offer ghedoot hebben voor die sonde des volcks, soe sal hi diens bloet draghen binnen dat voorhancsel, ghelijck daer gheboden es van des calfs bloede, dat hi daer mede soude bespraeyen teghen ouer die plaetse vanden stoel der ghenaden,

16

ende dat hi die heylighe plaetse suyuere van die onsuyuerheden der kinderen van Israhel, ende van haren ouertredinghen ende allen sonden.

In deser voeghen sal hi doen in dat tabernakel des ghetuyghenis, dwelc vast ghestelt es onder henlieden int midden der vuylicheden van haerder wooninghen

17

Gheen mensch en sal in dat tabernakel wesen als die ouerste priester gaet in die alder heylichste plaetse, om te bidden voor hem seluen, ende voor sijn huys, ⁺ende voor alle die vergaderinghe van Israhel, tot dat hy wt coemt.

+ D

18

Maer als hy wtcomen sal zijn totten outaer welck voor den Heere es, soe sal hi voer hem seluen bidden, ende als hy ghenomen heeft het bloet van dat calf ende van den bock, soe sal hi dat ghieten op die hornen des outaers al rontsomme,

19

ende spraeyende metten vingher seuenmael sal hi dien suyueren ende heylich maken van die onsuyuerheden der kinderen van Israhel.

20

Maer nae dat hi die alder heylichste plaetse ende dat tabernakel ende den outaer sal ghesuyuert hebben dan sal hi den leuenden bock offeren,

21

ende legghende beyde zijn handen opt hooft vanden bock soe sal hy belijden alle die boosheden der kinderen van Israhel ende alle haer versuemenissen ende sonden welcke hy hem sal op zijn hooft toe wenschen ende hy sal hem dan met eenen bereyden man schicken wech in die woestijne.

22

⁺Ende als den bock allen haer boosheden, gehedraghen sal hebben in een verlaten lant, ende ghelaten es in die woestijne,

+ E

23

soe sal Aaron wederkeeren int tabernakel des ghetuyghenis. Ende als hi zijn cleederen sal wtghedaen hebben, die hy te voren aen hadde, doen hy in die alder heylichste plaetse ghinc, ende hi die daer ghelaten heeft,

24

soe sal hi zijn vleesch wasschen op die heylighe plaetse, ende hi sal zijn cleeren aendoen, Ende als hi wtghecomen es ende gheoffert sal hebben sijn ende des volcs brantofferanden, soo sal hi bidden soe wel voor hem seluen als voor het volck,

25

ende dat vet des inghewants welck voor die sonden gheoffert es, sal hy opden outaer ontsteken,

26

Maer die ghene die den wtghesonden bock wtgheleydt heeft, die sal zijn cleederen wasschen ende sijn lichaem met water, ⁺ende alsoe sal hi inden legher gaen,

+ F

27

Maer dat calf ende den bock die voor die sonde gheoffert waren, ende der welcker bloet es in die alder heylichste plaetse ghedraghen, om dat die suyueringhe soude volbrocht worden, die sullen sij buyten den legher wechdraghen ende verbernen die int vier, soe wel haer vellen als haer vleesch, ende haer mest,

28

ende soe wie die verberret, die sal sijn cleederen wasschen, ende sijn vleesch met water, ende alsoe sal hi in den legher comen.

29

Ende dit sal v lieden wesen een eewich recht. In die seuenste maent opden thienden dach der maent, soe suldy v zielen pijnighen, ende ghy en sult gheen werck doen tsij een ingheboren, oft een wtlander, die een vreemdelinc onder v lieden es,

30

⁺Op desen dach salt v lieder versoeninge ende suyuermakinghe wesen, van allen uwen sonden, voor den Heere suldi ghesuyuert wesen,

+ G

31

Want het es eenen sabboth der rusten, ende ghy sult v zielen pijnighen met eenen

[p. *122]

eewighen godsdienste,

32

Ende dese versoeninghe sal die priester doen die ghesalft es, ende wiens handen ghewijt sijn daer toe, dat hi het pristerschap bedienen soude voor sijnen vader, ende hi sal met een lijnen ouercleedt ghecleedt worden, ende met die heylighe cleederen,

33

ende hi sal suyueren die alderheylichste plaetse, ende dat tabernakel des ghetuyghenis, ende den outaer, ende die priesteren oock, ende allen tvolck.

34

Ende dit sal v lieden wesen voor een eewighe wet, dat ghy bidden sult voor die kinderen van Israhel, ende voor allen haer sonden eens binnen den iare. Hierom heeft hi ghedaen ghelijck die Heere Moysi beuolen hadde.