Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde die Heere heeft tot Moysen ende Aaron ghesproken, segghende.

+ A

2

Spreect tot die kinderen van Israhel ende segghet tot henlieden. Een man die den loop sijns saets lijdet, die sal onsuyuer wesen.

3

Ende dan salmen hem ordeelen onderhauich te wesen van desen ghebreke als tot allen stonden aen zijn vleesch die vuylvochticheyt cleeft, ende dat die dick gheworden es.

4

Alle bedden daer hi op slaept die sulltn onsuyuer wesen, ende waer op dat hy sidt,

5

Eest dat eenich mensch diens bedde aentast, die sal zijn clederen wasschen, ende als hi int water ghewasschen es, soe sal hi onsuyuer wesen totten auont toe,

6

Eest sake dat hy sidt daer die gheseten heeft, soe sal hy zijn cleederen wasschen, ende als hi met water ghewasschen es, soe sal hi onsuyuer wesen tot den auont toe.

7

Soe wie zijn vleesch genaect die sal zijn cleederen wasschen ende als hi met water ghewasschen es, soe sal hi onsuyuer wesen tot den auont toe,

8

Eest dat alsulck mensch zijn speecksel worpt op yemant die suyuer es, die sal zijn cleederen wasschen, ende als hi int water gewasschen es, soe sal hi onsuyuer wesen totten avont toe,

9

ende alle sadelen daer hi op gheseten heeft, sullen onsuyuer wesen,

10

ende wat onder hem gheweest heeft, ⁺die den loop sijns saets lijdet, dat sal onsuyuer wesen totten auont toe. Soe wie dat yet sulcks ghedraghen heeft, die sal zijn cleederen wasschen, ende als hi int water ghewasschen es, soe sal hi onsuyuer wesen totten auont toe,

+ B

11

Ende alle die hi ghenaect die alsulck es ende sijn handen te voren niet ghewasschen en heeft, die sal sijn cleederen wasschen, ende als hi met water ghewasschen es, soe sal hi onsuyuer zijn totten auont toe.

12

Een eerden vat dat hy aenghetast heeft, salmen breken maer een houten vat salmen met water wasschen.

13

Eest sake dat hi ghesont wordt die aldusdanich ghebreck lijdet, soe sal hi seuen daghen tellen nae sijn suyueringhe, ende als hy zijn cleederen ende alle sijn lichaem sal ghewasschen hebben in leuende wateren, soe sal hi suyuer sijn,

14

maer opden achsten dach soe sal hi nemen twee tortelduyuen ende twee ionghe duyuen, ende hy sal voor dat aenschijn des Heeren comen, aen die doere van dat tabernakel des ghetuyghenis, ende hi sal die den priester gheuen,

15

die welc sal die een offeren voor die sonde, ende dat ander tot eenen brantoffer, ende hy sal voor hem bidden voor den Heere dat hi mach ghesuyuert worden van den loop sijns saets.

16

Een man wt wien tsaet der natuerlijcker versaminghen gaet, ⁺die sal sijn gheheel lichaem met water wasschen, ende hi sal onsuyuer wesen tot den auont toe,

+ C

17

het cleedt ende tvel dat hi aenheeft, sal hi met water wasschen, ende die sullen onsuyuer wesen tot den auont toe

18

Die vrouwe daer hi mede versaemt es gheweest, sal met water ghewasschen worden, ende sij sal onsuyuer wesen totten auont toe.

19

Een vrouwe die nae tverloop van eender maent den loop haers bloets lijdet, die salmen seuen daghen verscheyden.

20

Alle die haer ghenaket, sal onsuyuer wesen totten auont toe,

21

Ende tghene daer sij op gheslapen oft gheseten heeft, in die daghen als sij verscheyden es, dat sal besmet worden,

22

Die haer bedde ghenaect, die sal sijn cleederen wasschen, ende als hi met water ghewasschen es soe sal hi onsuyuer wesen totten auont toe,

23

Alle ghereetschap daer sij opgheseten heeft, soe wie sulcs aentast die sal zijn cleederen wasschen, ende als hi met water ghewasschen es soe sal hy onsuyuer wesen totten auont toe,

24

Eest dat een man hem met haer versaemt, ten tijde van haren maenstonden, soe sal hy seuen daghen onsuyuer wesen, ende op wat bedde dat hi gheslapen heeft, dat sal onsuyuer wesen.

25

Een vrouwe die veel daghen den loop haers bloets lijdet, ⁺ende niet ten tijden van der maenstonden, oft ooc die nae den tijt der bloetstonden niet op en houdt van vloeden, alsoe langhe als sij van desen ghebreke onderhauich es, sal sij onsuyuer sijn, ghe-

+ D

[p. *121]

lijck oft sij ware inden tijt van haren maenstonden

26

Alle sulck bedde daer sij op gheslapen heeft, ende alle ghereetschap daer si op sidt sal onsuyuer wesen,

27

soe wie dat haer ghenaect die sal zijn cleederen wasschen ende als hi met water ghewasschen es, soe sal hi onsuyuer wesen tot den auont toe.

28

Eest sake dat het bloet staende blijft ende niet meer en vloeyet, soe sal sij tellen seuen daghen nae haer suyueringhe,

29

ende opden achtsten dach sal sij voor haer seluen den priester offeren twee tortelduyuen oft twee ionghe duyuen aen die duere van dat tabernakel des ghetuyghenis

30

die welc sal deen offeren voor die sonde ende dander tot een brantofferande, ende hy sal voor haer bidden voor den Heere, ende voor den vloet van haerder onsuyuerheyt,

31

Hier om suldi den kinderen van Israhel leeren, dat si scouwen alle onsuyuerheden, ende dat sij niet en steruen in haer vuylicheden, als sij mijn tabernakel besmet souden hebben, dwelc onder v lieden es,

32

Dit es die wet van den ghenen die den vloet sijns saets lijdet, ende die door natuerlijcke versaminghe besmet wort,

33

ende van die vrouwe die ten tijden van haren maenstonden verscheyden wort, oft die eenen gheduerighen loop des bloets heeft, ende des mans die bi haer gheslapen heeft.