Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde die Heere heeft tot Moysen ghesproken segghende,

+ A

2

Dit is die wijse van eenen melaetschen als hy ghesuyuert sal worden, Hy sal totten priester ghebracht worden,

3

die welcke (wt den legher gheghaen sijnde) eest dat hy beuint dat die lazerie ghesuyuert is,

4

sal hem beuelen, die daer ghesuyuert wordt, dat hy twee leuende musschen voor hem seluen offere, die welcmen eten mach. Ende cederen hout, ende root garen, ende hysope,

5

ende een vanden musschen sal hy ghebieden te dooden in een eerden vat, op leuende wateren,

6

maer die ander sal hy leuende met dat cederen hout ende metten rooden garen ende hysope doppen in dat bloet vander musschen die ghedoot is,

7

waer mede hy hem seuenwerf besprayen sal die daer te reynighen is, op dat hy nae recht mach ghereynicht worden, ende hy sal die leuende mussche laten wech int velt vlieghen.

8

Ende als die mensch sijn cleederen sal ghewasschen hebben, soo sal hy alle dat haer sijns lichaems af scheren, ende men sal hem int water wasschen, ende also sal hy ghesuyuert in den legher gaen, alsoo dat hy noch seuen daghen blijue buyten sijn tabernakel,

9

ende opden seuensten dach sal hy scheren het haer van sijnen hoofde ende sijnen baert ende sijn wijnbrauwen ende alle dat haer sijns lichaems.

⁺Ende als hi dan wederom sijn cleederen ende sijn lichaem ghewasschen heeft,

+ B

10

soo sal hy opden achsten dach nemen twee onbesmette lammeren, ende eeniarich schaep sonder smette, ende drij thiende deelen bloeme van meele tot een sacrificie, die welck met olie beslaghen sij, ende besonder een sester mate olien.

11

Ende als die priester den mensch suyuer makende hem ende alle dese dinghen voor den Heere sal ghestelt hebben in die doore van dat tabernakel des ghetuyghenis,

12

soo sal hy een lam nemen ende offeren dat voor die versuemenisse, ende die sester mate olie. Ende als hyt al voor den Heere gheoffert heeft,

13

soo sal hy dat lam ten offer dooden, ter plaetsen daermen pleech die slachofferanden voor die sonde ende die brantofferanden te dooden, dat is in die heylighe plaetse. Want ghelijc voor die sonde also ooc voor die versuemenisse behoort die slachofferande den priester toe, want sij is een heylich der heylighen.

14

Ende die priester te hem nemende vanden bloede der slachofferanden die daer doot gheslaghen is voor die versuemenisse, sal dat legghen op dat wterste van der rechter ooren des gheens die daer ghesuyuert wordt, ende op den duyme sijnder rechter hant, ende den grootsten teen des rechten voets,

15

⁺ende vander sester maten olien sal hy doen in sijn slincke hant

+ C

16

ende hy sal sijnen rechten vingher daer in doppen, ende daermede besprayen seuenmael voor den Heere,

17

ende die olie die daer in sijn slincke hant ouerblijft, sal hy storten op dat wterste vander rechter ooren des gheens die daer ghesuyuert wordt, ende op den duym sijnder rechter hant ende voet, ende op dat bloet datter ghestort is voor die versuemenisse,

18

ende op sijn hooft.

19

Ende die priester sal voor hem bidden voor den Heere, ende hy sal sacrificie voor die sonde doen, dan sal hy die brantofferande dooden,

20

ende sal die opden outaer legghen met sijn vochtighe offeranden, ende die mensch sal behoorlijck ghesuyuert sijn.

21

Maer is hy arm, ende dat sijn hant niet vinden en can die voorseyde dinghen, soo sal hy voor die versuemenisse met hem nemen een lam tot eender offeranden, dat die priester voor hem bidde, ende een thiende deel bloeme van meel, met olie beslaghen tot een sacrificie, ende een sestermate olien,

22

ende twee tortelduyuen oft twee ionghe duyuen, waer af die eene sal wesen voor die sonde, ende die ander tot eenen brantoffer,

23

ende hy sal dit al den priester offeren opden achtsten dach van sijnder suyueringhen, aen die doore van dat tabernakel des ghetuyghenis voor den Heere,

24

⁺die welcke nemende het lam voor die versuemenisse ende die sestermate olien sal die tsamen opheffen,

+ D

25

ende als hy dat lam sal ten offer ghedoot hebben, soo sal hy van dien bloede doen op dat wterste der rechter ooren van hem die daer ghesuyuert wordt, ende opden duym sijnder rechter hant ende voet,

26

maer een deel vander olien sal hy in sijn slincke hant doen,

27

waer in dat hy den vingher van sijnder rechter hant doppende, sal seuenmael sprenckelen voor den Heere,

28

ende hy sal raken dat wterste van sijnder rechter ooren die daer ghesuyuert wordt, ende den duym sijns rechter hants ende voets op die plaetse des bloets datter voor die versuemenisse ghestort is.

29

Maer dat ander deel der olien welck in sijn slincke hant is, sal hy storten op thooft vanden ghesuyuerden, op dat hy den Heere voor hem versoene,

30

ende hy sal die tortelduyue oft die ionghe duyue offeren,

31

die een voor die versuemenisse, ende dandere tot eenen brantoffer, met sijnen vochtighen offeranden,

32

dit is het sacrificie vanden melaetschen die alle dinghen niet hebben en can voor sijn suyueringhe.

33

⁺Ende die Heere heeft ghesproken tot Moysen ende Aaron segghende,

+ E

34

Alsghy sult comen sijn int lant van Chanaan, dwelck ick v tot een besittinghe gheuen sal, eest sake datter een plaghe der lazerien in eenich

[p. *120]

huys es,

35

soe sal hi dien dat huys toebehoort gaen, ende den priester dat te kennen gheuen, segghende. My dunct datter wat in mijn huys es ghelijck een plecke der lazerien,

36

Ende die priester sal ghebieden datment al wten huyse draghe, eer hy daerin come, op dat hi sien mach oft lazerich es, dat al niet besmet en worde datter int huys es, Ende daer nae sal hy binnen gaen, om die lazerie des huys te besien,

37

ende als hi sien sal aen die wanden des huys ghelijc dellinghen doer bleecheyt oft rootheyt leelijc, ende neerder dan dat ander buytenste des wandts,

38

soe sal hi wter doeren des huys gaen ende terstont sal hi dat huys sluyten seuen daghen lanck,

39

⁺Ende als hi opden seuensten dach weder comen es, soe sal hi dat besien, ende eest dat hi vint dat die lazerie ghewassen es,

+ F

40

soe sal hi die steenen doen wt trecken daer die lazerie in es, ende doen die wech worpen buyten der stadt op een onsuyuer plaetse,

41

maer dat selue huys sal hi van binnen int ronde doen scrabben, ende dat ghemul vander scrabbinghen sal hi doen wech spraeyen buyten der stadt op een onsuyuer plaetse,

42

ende ander steenen doen legghen voor die ghene die wtghenomen sijn ende dat huys met anderen leem beplaesteren.

43

Maer eest sake dat (nae die steenen wtghenomen zijn, ende dat stubbe wtghedraghen es ende dat huys met anderen leem besedt es)

44

die priester daer in comende, siet dat die lazarie wedercomen es, ende die mueren met smetten bespraeyt, soe eest een gheduerige lazarie, ende thuys es onsuyuer,

45

het welck si ter stont sullen afbreken, ende die steenen, ende het hout met alle dat gruys van dien sullen sij buyten die stadt worpen op een onreyn plaetse.

46

Soe wie in dat huys gaet alst ghesloten es, die sal onsuyuer wesen totten auont toe,

47

ende soe wie daer in slaept, oft iet inne etet die sal zijn cleederen wasschen.

48

⁺Maer eest dat die priester daer inne comende siet dat die lazerie niet ghewassen en es int huys nae dien dat wederom beplaestert es gheweest, soe sal hy dat suyueren, als zijn ghesontheyt hem weder ghegeuen es,

+ G

49

Ende in des huys suyueringhe sal hi twee musschen nemen, ende cederen hout, ende eenen purpuren draet ende hijsope

50

ende als hy die mussche ghedoot heeft in een eerden vat op leuende wateren,

51

soe sal hi nemen dat cederen hout, ende die hijsope ende den purpuren draet ende die leuende mussche, ende hi sal die al te samen doopen int bloet vander musschen die ghedoot es, ende in die leuende wateren ende hy sal dat huys seuenmael bespraeyen

52

ende hi sal dat suyuer maken, soe wel met dat bloet van der musschen als met die leuende wateren, ende door die leuende mussche, ende door het cederen hout, ende die hijsope ende den purpuren draet.

53

Ende als hi die mussche sal hebben laten vrij int velt vlieghen, soe sal hi voer dat huys bidden, ende het sal te rechte ghesuyuert worden.

54

Dit es die wet van alderhande lazerien ende quetsueren,

55

van die lazarie der cleederen ende der huysen,

56

des litteekens ende der wtbrekender puysten, der blinckender smetten, ende als die verwen in verscheyden ghedaenten verandert worden,

57

op datmen weten mach wanneer yet suyuer oft onsuyuer es.