Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde die Heere heeft ghesproken tot Moysen segghende,

+ A

2

Spreect tot die kinderen van Israhel, ende ghi sult segghen tot hen, Eest dat een vrouwe die saet ontfanghen heeft, een knechtken baert, soo sal sy seuen daghen onsuyuer wesen na die daghen der afscheydinghen vander maensuchtigher vrouwen,

3

ende ten achtsten daghe salmen dat kindeken besnijden,

4

⁺maer sij sal drijendertich daghen blijuen int bloet van haerder suyueringhen. Sij en sal niet aentasten iet dat heylich is, noch sij en sal in die heylighe plaetse niet gaen, tot dat die daghen haerder suyueringhen veruult sijn.

+ B

5

Maer eest dat sij een dochterken ghebaert heeft, soo sal sij twee weken onreyn wesen nae die manier vanden vloet der maenstonden, ende sij sal ses en tsestich daghen blijuen int bloet van haerder suyueringhen.

6

Ende als die daghen haerder suyueringhen voleynt sijn, tsij voor eenen sone, ⁺oft voor een dochter, soo sal sij een iarich lammeken brenghen tot een brantofferande, ende een ionghe duyue, oft een tortelduyue voor die sonde, aen die doore van dat tabernakel des getuyghenis, ende sij sal dat den priester geuen

+ C

7

die welcke dat offeren sal voor den Heere, ende hy sal voor haer bidden, ende also sal sij gesuyuert worden vanden vloet haers bloets, ⁺dit is die wet van een vrouwe die eenen sone oft dochter baert.

+ D

8

Maer eest dat haer hant niet en vint, ende dat sij gheen lam en can offeren, soo sal sij nemen twee tortelduyuen oft twee ionghe duyuen, die een tot eenen brantoffer, ende dander voor die sonde, ende die priester sal voor haer bidden, ende alsoo salsij ghesuyuert worden.