Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde die Heere heeft ghesproken tot Moysen ende Aaron, segghende,

+ A

2

Segghet den kinderen van Israhel, Dit sijn die dieren die ghy eten moet van alle ghedierte der eerden,

3

Alle dat vanden vee heeft ghespleten clauwen ende herknauwet, dat suldy eten,

4

maer wat oock herknauwet, ende clauwen heeft, maer en scheydt die niet ghelijc eenen kemel ende der ghelijcke, dat en suldi niet eten, ende ghy sullet onder die onsuyuer dieren houden.

5

Den Cherogrillus die herknauwet, maer sijnen clau niet en clieft, is onsuyuer.

6

Ende den hase ooc, want hy herknauwet, maer hy en clieft sijnen clau niet.

7

Ende een verken dwelck al clieuet sijnen clauw, nochtans niet en herknauwet.

8

Van de-

[p. *117]

ser dieren vleesch en suldi niet eten, noch haer doode lichamen aentasten, want sij sijn v onsuyuer.

9

⁺Dit sijn oock die int water voertcomen, welck ghy eten moecht, Alle dat vlimmekens ende schellen heeft, soo wel in die zee als in die vloeden, ende in die staende water suldi eten.

+ B

10

Maer wat gheen vlimmekens oft schellen en heeft, vanden dieren die hen int water roeren ende leuen, dat sal v lieden afgrijselijck

11

ende versmadelijck sijn, der dieren vleesch en suldi niet eten, ende hen doode prijen suldi schouwen.

12

Alle dieren die gheen vlimmekens oft schellen en hebben int water, sullen besmet sijn.

13

Dese sijnt die ghy vanden voghelen niet eten en moecht ende schouwen moet, Den aern ende den griffoen, den spaerwaer

14

ende den wouwe, ende den ghier nae sijn natuer,

15

ende alle dat van rauen natuer is in sijn ghelijckenisse,

16

den struys, ende den nachtwl, ende den brantvoghel, ⁺ende den hauick, nae sijn natuere,

+ C

17

den vle, ende dat duykerken, den ibin,

18

ende die swane, ende den onocrotalus, ende den pellicaen,

19

den herodioen, ende den charadrion nae sijn natuere, die hoppe oock ende die vledermuys.

20

Alle dat vanden voghelen is ende gaet op vier voeten dat sal v lieden afgrijselijc wesen.

21

Maer wat dat op vier voeten wandelt, maer heeft achter langher beenen daer mede dat op daerde sprinckt,

22

dat suldi eten, ghelijck is den breemsen in sijn natuere, ende den attacus, ende ophiomachus, ende den sprinchaen, een yeghelijck nae sijn natuere.

23

Maer wat vanden vlieghenden dieren alleen vier voeten heeft, dat sal v lieden smadelijck wesen,

24

⁺ende soo wie haer doode prijen ghenaect, die sal besmet worden, ende sal onsuyuer sijn totten auont toe,

+ D

25

ende eest nootelijck dat hy eenich van desen dooden prijen draghen moet, soo sal hy sijn cleederen wasschen, ende hy sal onsuyuer wesen tot der sonnen onderganck.

26

Alle sulcke ghedierte dat clauwen heeft, maer die niet en clieft, oft niet en herknauwet, dat sal onreyn wesen, ende soo wat dat sulcke raect, sal onsuyuer wesen.

27

Soo wat op handen gaet van alle ghedierte die met vier voeten gaen, dat sal onsuyuer wesen, soo wie dat hare doode prijen raeckt, die sal besmet sijn totten auont toe.

28

Ende soo wie dat sulcken prijen draghet, die sal sijn cleederen wasschen, ende hy sal onsuyuer wesen totten auont toe, want alle dese dieren sijn voor v onsuyuer.

29

Item van alle dat hem opt daerde roert, soo sullen dese ooc met die onsuyuer dieren gherekent worden, ⁺een weselken, ende een muys, ende crocodilus, een yeghelijck nae sijn natuer.

+ E

30

Migale ende chameleon, ende stellio, ende een haechdisse ende eenen mol,

31

dese sijn al onsuyuer. Soo wie dat haer doode prijen raket, sal onsuyuer wesen tot den auont toe,

32

ende daer iet van haren prijen op valt, dat sal besmet worden, soo wel een houten vat ende een cleedt, als eenighe pelsen oft hayren cleederen, ende alle dinghen daermen eenich werck mede doet dese salmen met water nat maken, ende die sullen besmet wesen tot den auont toe, ende soo sullen sij namaels ghesuyuert worden.

33

Maer een aerden vat daer iet van desen ingheuallen is, dat sal besmet worden, ende daerom moet dat ghebroken sijn.

34

Alle spijse die ghy eten sult, eest datter sulck water opghegoten wordt, soo sal die onreyn wesen, ⁺ende allen natticheyt datmen drincket wt alderhande sulcke vaten, dat sal onreyn wesen.

+ F

35

Ende so wat van desen dooden prijen daer op valt, dat sal onreyn wesen, tsij ouens oft potten op voeten staende, die salmen breken ende sij sullen onsuyuer wesen,

36

maer fonteynen oft putten ende alle vergaderinghe van wateren sullen reyn wesen. Soo wie dat iet van die doode prijen aentast die sal ontsuyuert worden.

37

Eest dat op eenich saet valt, ten sal dat niet besmetten,

38

maer eest sake dat iemant dat saet met water beghiet, ende dat namaels gheraect wordt van doode prijen, soo sal dat terstont besmet worden.

39

Eest sake datter eenich dier ghestoruen is dwelck ghy eten moecht, soo wie die doode prije raket die sal onreyn wesen totten auont toe,

40

ende soo wie daer af iet eet, oft draecht, die sal sijn cleederen wasschen, ende sal onreyn wesen totten auont.

41

Alle dat opder eerden cruypt dat sal v een walghinghe wesen, ende dat en suldi in uwer spijsen niet nemen.

42

Wat dat op sijn borst met vier voeten voertgaet, ⁺ende vele voeten heeft, oft dat hem lancs die aerde voerts gaende wtrect, dat en suldi niet eten, want het is afgrijselijck.

+ G

43

En wilt v sielen niet besmetten, noch en raect niet eenich van dien, op dat ghy niet onsuyuer en wordt,

44

Want ick ben die Heere v Godt. Weest heylich, want ick ben heylich. En wilt v zielen niet besmetten aen eenich cruypende dier, welck hem op der eerden roert,

45

Want ic ben die Heere die v gheleyt hebbe wt dat lant van Egipten, dat ick v lieden Godt soude wesen,

46

Ghy sult heylich sijn, want ick ben heylich. Dit is die wet vanden dieren ende vogelen, ende van alle dat leuen heeft, dwelck hem roert int water, ende dat op deerde cruypt,

47

op dat ghy soudt weten dat ondersceyt van suyuer ende onsuyuer, ende dat ghi weten moecht wat ghy eten moet, ende wat ghy verspouwen sult.