Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde Nadab ende Abiu Aarons sonen, nemende haer wieroockvaten, hebben daer vier in ghedaen, ende leyden dat wieroock op, offerende voor den Heere vreemt vier, dwelck hen niet beuolen was.

+ A

2

Ende daer is een vier vanden Heere wt gheslaghen, dwelck heeft hen verslindt, ende sij sijn voor den Heere ghestoruen.

3

Ende Moyses heeft tot Aaron gheseyt, Dat is tghene welck die Heere gheseyt heeft, Ick sal gheheylicht worden in die ghene die my ghenaken, ende ic sal gheglorificeert worden voor daenschijn van alle tvolck. Dwelck hoorende Aaron, heeft ghesweghen.

4

Ende als Moyses gheroepen hadde Mysael ende Elisaphan de sonen van Oziel, die Aarons oom was, soo seyde hy tot hem, Gaet henen ende draecht v broeders wech wt dat aenschijn der heyligher plaetsen, ende draechtse wech buyten den heyrlegher.

5

Ende sij terstont derwaerts gaende hebben die ghenomen ghelijck sij daer laghen ghecleedt met sijnen rocken, ende hebbense wt gheworpen, ghelijc hen beoulen was.

6

⁺Ende Moyses heeft gheseyt tot Aaron ende tot Eleazar ende Ithamar sijn sonen, V hoofden en wilt niet ontdecken, ende v cleederen en wilt niet ontwee snijden op dat ghy by auontueren niet en sterft, ende dat die gramschap come ouer alle die vergaderinghe. V broeders ende alle dat huys van Israhel moeten beclaghen den brant, den welcken die Heere verwect heeft,

+ B

7

maer ghi en sult wt die dooren des tabernakels niet gaen, oft anders suldi verghaen, want die olie der heyligher saluinghen is op v. Ende sij hebben alle dinghen gedaen na Moyses ghebodt.

8

Ende die Heere heeft tot Aaron gheseyt,

9

Wijn ende alle dat droncken maken mach en suldi niet drincken ghy ende v sonen, als ghy sult gaen in dat tabernakel des ghetuyghenis, op dat ghi niet en sterft, want dit is een eewich ghebodt in v gheslachten,

10

ende op dat ghy oock moecht hebben die wetentheyt van te ondersceyden tusschen dat heylich is, ende dat niet heylich en is, tusschen dat besmedt is, ende dat onbesmet is,

11

ende dat ghy den kinderen van Israhel moecht leeren alle mijn wettelijcke gheboden die die Heere ghesproken heeft tot hen, door Moyses hant.

12

⁺Ende Moyses heeft ghesproken tot Aaron ende Eleazar ende Ithamar sijn sonen, die ouerbleuen waren, Neemt dat sacrificie dat ouerghebleuen is van des Heeren offerande, ende eedt dat sonder deesem byden outaer, want het is een alderheylichste der heylighen.

+ C

13

Ende ghy sult dat eten op die heyliche plaetse, alle dat v gegheuen is, ende uwen sonen, van des Heeren offeranden, ghelijck my beuolen is,

14

ende het borstken oock dwelck gheoffert is, ende die scoudere die afghedeelt is suldi eten in die aldersuyuerste plaetse, ghy ende v sonen, ende v dochteren met v, want v ende uwen kinderen sijn dese dinghen bewaert van die salighe slachofferanden der kinderen van Israhel.

15

Om dat sij die scoudere ende dat borstuck ende die vetten des inghewants, die opden outaer verbrant worden hebben voor den Heere opghehauen, ende dat die v toebehooren souden ende uwen sonen, door een eewighe wet, ghelijck die Heere beuolen heeft.

16

⁺Tusschen dese dinghen als Moyses socht den bock die voor die sonde gheoffert was, so heeft hy beuonden dat hy verbrant was, ende gram sijnde tseghen Eleazar ende Ithamar Aarons sonen, die daer ouerbleuen waren heeft hy gheseyt,

+ D

17

Waer om en hebdi die slachofferande voor die sonde in die heylige plaetse niet gheten, die een dalder heylichste der heylighen is, ende v ghegheuen om dat ghy die sonden der menichten draghen soudt, ende dat ghy daer voor bidden soudt voor des Heeren aensicht,

18

besonder aenghesien datter van sijnen bloede niet en is ghedraghen in die heylighe plaetse, ende dat ghy die hadt moeten eten in die heylighe plaetse, ghelijck my beuolen is?

19

Aaron heeft gheantwoordt, Daer is heden een slachofferande gheoffert voor die sonde, ende eenen brantoffer voor den Heere, maer my is gheschiet alsoo ghy siet, Hoe soude ick die hebben moghen eten ende den Heere in die ceremonien behaghen met een droeuich herte?

20

Dwelck als Moyses ghehoort hadde, soo liet hy hem ghenoeghen.