Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ALs nv den achtsten dach comen was, so heeft Moyses gheroepen Aaron ende sijn kinderen, ende die ouders van Israhel, ende hy heeft tot Aaron gheseyt,

+ A

2

Neemt wt dat groot vee een calf voor die sonde, ende eenen ram tot den brantoffer, beyde sonder smette, ende offert die voor den Heere,

3

ende ghy sult tot die kinderen van Israhel segghen, Neemt eenen bock voor die sonde, ende een calf ende een iarich lam ende sonder smette tot eenen brantoffer,

4

eenen osse ende eenen ram voor den vreedtoffere, ende slaet die doot voor den Heere, offerende in een yeghelijcs sacrificie, terwen bloeme met olie beslaghen want heden sal hem die Heere voor v openbaren.

5

Dus hebben sij bracht voor die doore des tabernakels alle dat Moyses beuolen hadde, ende doen daer alle die ghemeynte by stont,

6

soo seyde Moyses, ⁺Dit is het woordt dat die Heere beuolen heeft, doet dat, ende hy sal voor v sijn glorie vertoonen.

+ B

7

Ende hy heeft tot Aaron gheseyt, Gaet tot den outaer ende slaet een offerande voor v sonde, offert brantoffer, ende bidt voor v, ende voor tvolck, ende als ghy die slachofferande des vols sult gheslaghen hebben, soo bidt voor hen, ghelijck die Heere beuolen heeft.

8

Ende terstont is Aaron ghegaen totten outaer, ende heeft dootgheslaghen een calf voor sijn sonde,

9

wiens bloet hem sijn sonen ghebracht hebben, ende daer in sijnen vingher doopende, heeft hy gheraect die hornen des outaers. Ende hy storte datter ouerbleef aen dat onderste vanden outaer.

10

Ende dat vet des inghewants metten nieren, ende dat netteken der leueren, die voor die sonde sijn, heeft hy opden outaer ontsteken, ghelijc die Heere Moysi beuolen hadde,

11

maer sijn vleesch ende vel heeft hi buyten den legher metten vier verbrant.

12

⁺Ende hy heeft oock gheoffert een slachofferande des brantoffers, ende sijn sonen hebben hem dat bloet bracht, dwelck hy heeft ghestort aenden omganc des outaers,

+ C

13

ende die selue slachofferande in stucken ghesneden, hebben sij gheoffert met den hoofde ende met allen die leden, welck hy al opden outaer metten vier verbrant heeft,

14

als hy te voren dat inghewant metten voeten hadde int water ghewasschen.

15

Ende om offerande te doen voor die sonde des volcs, soo heeft hy eenen bock dootgheslaghen, ende als hy den outaer ghesuyuert hadde,

16

soo heeft hy die brantofferande ghedaen,

17

toedoende int sacrificie die natte offeranden welck tsamen gheoffert worden, ende die ontstekende opden outaer, sonder die ceremonien van des morghestonts brantoffer.

18

⁺Ende hy heeft eenen osse ende eenen ram ten offer ghedoot tot vreetsamighe slachofferanden des volcs, ende sijn sonen hebben hem dat bloet gheoffert, dwelck hy ghestort heeft opden outaer rontsomme.

+ D

19

Maer dat vet des inghewants vanden

[p. *116]

osse, ende den steert vanden ram, ende die nierkens met haren vetten, ende het netteken der leueren

20

hebben sij op die borsten gheleyt, ende als dat vet al verbernt was opden outaer,

21

soo heeft Aaron haer borsten ende rechte scouderen afghesceyden, heffende die op voor den Heere, ghelijck Moyses beuolen hadde.

22

Ende reyckende sijn handen wt totten volcke, so heeft hy dat ghebenedijt. Ende als alsoo volbracht waren die slachofferanden voor die sonde, ende die brantofferen, ende die vreedofferanden, soo is hy nederwaerts comen.

23

Ende Moyses ende Aaron sijn ghegaen in dat tabernakel des ghetuyghenis, ende daer nae sijn sij wtcomen ende hebben het volck ghebenedijt. Ende die glorie des Heeren heeft haer vertoont voor alle die menichte,

24

ende siet een vier is vanden Heere wtcomen, dwelck heeft verslint den brantoffer, ende die vetten des inghewants die daer op den outaer waren. Ende als dat volck dit ghesien hadde, soo hebben sij den Heere ghelooft, vallende op haer aensichten neder. [afbeelding]