Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde die Heere heeft tot Moyses gesproken seggende,

+ A

2

Neemt Aaron met sijnen sonen, hen cleederen, ende die olie der saluinghen, een calf voor die sonde, twee rammen, eenen corf met onghedeesemde brooden,

3

ende ghi sult alle die gemeynte vergaderen voor die doore des tabernakels.

4

Ende Moyses heeft gedaen also die Heere beuolen hadde, Ende als hi alle die scare der kinderen van Israhel voor die doore des tabernakels vergadert hadde,

5

so heeft hi gheseyt, Dit is het woort welc die Heere geboden heeft te doen.

6

Ende terstont heeft hi Aaron ende sijn sonen voortsbracht. Ende als hi hen ghewasschen hadde,

7

so heeft hi den ouersten priester gecleet met eenen lijnen hemde, gordende hem met een gordel, ende doende hem aen den blauwen sijden rock, ende daer bouen dede hy hem aene dat ouercleet der scouderen,

8

dwelcke hy vast toe heeft gebonden met eenen gordel, ende ghevuecht aen dat borstuc der redelicheyt daer inne dat was leeringhe ende warachticheyt.

9

⁺Ende hy heeft sijn hooft met eenen ronden mijter ghedect, ende daer op tseghen dat voorhooft, heeft hy een gulden plaete ghestelt, ghewijt in die heylichmakinghe, ghelijck hem die Heere beuolen hadde.

+ B

10

Ende hy heeft oock ghenomen die olie der saluinghen, daer hy het tabernakel mede ghesalft heeft met alle sijnen huysraet.

11

Ende als hy wijdende den outaer seuen reysen bespraeyt hadde, soo salfde hy dien, ende alle sijn ghereetscap, ende het waschvat met sijnen basement heeft hy ooc met olie gheheylicht.

12

Welcke olie hy stortende op Aarons hooft, heeft hem ghesalft

[p. *115]

ende ghewijt,

13

ende sijn sonen heeft hy oock gheoffert, ende ghecleedt met lijnen ouerrocken, ende hy heeftse omgort met gordels, ende hy heeft hen mijters opt hooft ghestelt, alsoo die Heere gheboden hadde.

14

⁺Ende hy heeft ooc een calf gheoffert voor die sonde, ende als Aaron ende sijn sonen haer handen op des calfs hooft gheleyt hadden,

+ C

15

soe heeft hy dat doot gheslaghen ten offer, vatende dat bloet, ende sijnen vingher daer in doopende, heeft hy gheract die hoornen des outaers, rontsomme, ende als dien ghesuyuert ende gheheylicht was, soo heeft hy het ander bloet ghegoten aen dat fundament des outaers.

16

Maer het vet dat op dinghewant was, ende het netteken der leueren, ende die twee nierkens met haren vetteken heeft hy opden outaer ontsteken,

17

verberrende het calf metten velle ende vleesche ende metten meste buyten den legher, ghelijck die Heere beuolen hadde.

18

Hy heeft oock eenen ram gheoffert tot eenen brantoffer, op wiens hooft als Aaron ende sijn sonen haer handen gheleyt hadden,

19

soo heeft hy dien gheslaghen ende sijn bloet ghestort rontsomme den outaer,

20

ende den seluen ram heeft hy in stucken ghesneden, sijn hooft metten leden ende het vet des inghewants heeft hy ontsteken metten vier,

21

als te voren het inghewant ende die voeten ghewasschen waren, ende den heelen ram heeft hy tsamen opden outaer ontsteken, om dat eenen brantoffer was tot eenen aldersuetsten rueck den ⁺Heere, ghelijck hy hem beuolen hadde.

+ D

22

Ende hy heeft oock den tweeden ram gheoffert tot die wijdighe der priesteren, ende Aaron met sijnen sonen hebben haer handen op sijn hooft gheleyt,

23

ende als Moyses dien ten offer doot gheslaghen hadde, soo nam hy van dien bloede ende raecte daer mede het wterste van Aarons rechte oore, ende den duym van sijnder rechter hant, ende desghelijcs oock den grootsten teen van sijnen rechten voet.

24

⁺Ende hy heeft die sonen van Aaron oock gheoffert. Ende als hy metten bloede vanden dooden ram gheraect hadde het wterste van haerlieder rechte ooren, ende den duym van hen rechte hant, ende den grootsten teen vanden rechten voet, soo heeft hy het ander bloet opden outaer ghestort al rontsomme,

+ E

25

maer het vet des inghewants, ende den steert, ende alle dat vet dat die darmen bedect, ende dat netteken der leueren, ende die twee nieren met haren vetten, ende met die rechte scoudere, heeft hy afghescheyden.

26

Ende nemende wt den corf der onghedeesemder brooden die voor den Heere was, een broot sonder deesem, ende een ghewronghen broot met olie beslaghen ende een vlade, ende heeft dat op tvet gheleyt, ende die rechte scoudere,

27

gheuende dese altesamen ⁺Aaron ende sijnen sonen, die welc (na dat sij dese voor den Heere opghehauen hadden)

+ F

28

heeft Moyses weder wt haren handen ghenomen, ende die ontsteken op den outaer des brantoffers, om dattet was een offerande der wijdinghen, tot eenen ruec der sueticheyt van des Heeren sacrificie.

29

Ende hy heeft dat borstken genomen heffende dat op voor den Heere, vanden ram der wijdinghen, voor sijn deel, ghelijck hem die Heere beuolen hadde.

30

Ende nemende die salfolie ende het bloet dat opden outaer was heeft hy dat ghesprayet op Aaron ende op sijn cleederen, ende op sijn sonen, ende op haer cleederen.

31

Ende als hy die in haer cleederen gheheylicht hadde, soo heeft hy henlieden beuolen segghende, Cooct dat vleesch voor die doore des tabernakels, ende etet daer, ende die brooden der wijdinghen suldi oock eten, ⁺die welck inden corf gheleyt sijn, ghelijck die Heere my beuolen heeft, segghende, Aaron ende sijn sonen sullen die eten,

+ G

32

ende wat daer ouerblijft van den vleesch ende vanden broode dat salmen int vier verbernen.

33

Ende ghy en sult binnen seuen daghen niet gaen van die doore des tabernakels, totten daghe dat den tijt van uwer wijdinghen sal volbracht wesen, want of seuen daghen voleyndt die wijdinghe,

34

ghelijc dat nv ter tijt gheschiet is, op dat die manier van dat sacrificie soude volbracht worden.

35

Dach ende nacht suldi int tabernakel blijuen, onderhoudende die bewaringhen des Heeren, op dat ghy niet en sterft, want alsoo is my beuolen.

36

Ende Aaron ende sijn sonen hebben ghedaen alle dat die Heere ghesproken heeft door die hant van Moyses.