Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *114]

Dat .vij. Capittel.

1

⁺DIt is ooc die wet der slachofferanden voor die versuemenisse, si is heylich der heylighen

+ A

2

ende daerom salmen die offerande voor die versuemenisse slaen daermen den brantoffer dootslaet dbloet van dien sal opden outaer rontsom ghestort worden.

3

Ende sij sullen daer af offeren den steert ende het vet dat op dat inghewant is,

4

die twee nierkens, ende het vet dat aen die lendenen is, ende het netteken vander leueren mettten nierkens,

5

ende die priester sal die opden outaer ontsteken, Het is des Heeren rueckoffer voor die versuemenisse.

6

Al wat manlijck is vanden priesterlijcken geslachte sal van desen vleesch eten op die heylighe plaetse, want het is een heylich der heylighen.

7

Ghelijcmen die slachofferande voor die sonde offert soo doetmen ooc voor die versuemenisse. Der beyder offeranden sal een wet wesen, ende sal toebehooren den priester diese gheoffert heeft.

8

Een priester die een offerande des brantoffers offert, die sal dat vel der offeranden hebben.

9

Ende alle offerande van bloeme des meels welckmen inden ouen bact, ende wat datmen op den rooster, oft in een roostpanne bereyt, dat sal den priester toebehooren vanden welcken dat gheoffert wordt,

10

tsij oft met olie beslaghen is tsij oock oft drooghe is. Allen den sonen van Aaron salmen een ghelijck deel eenen yeghelijcken deelen.

11

⁺Dit is die wet van der vreedtsamigher offeranden die den Heere gheoffert wordt.

+ B

12

Eest dat die offerande is voor dancbaerheyt, so sullen si offeren brooden sonder deesem met olie beslaghen, ende vlaeyen sonder heeue met olie bestreken, ende ghecoecte bloem van meele, ende ghewronghen broot met mengsel van olien beslaghen,

13

ende ooc gheheefde brooden met die slachofferande der dancbaerheden, die voor den vreedoffer dootgheslaghen wordt,

14

vanden welcken brooden het eene den Heere gheoffert wordt voor deerste vruchten, ende het sal den priester toebehooren die des slachoffers bloet stort,

15

wiens vleesch men ooc eten sal opden seluen dach, ende daer af en sal niet ouerblijuen to tsmorghens toe.

16

Eest sake dat iemant wt belofte oft vrijwillichlijc een slachofferande offert die sal desghelijcs op den seluen dach gheten worden,

17

maer eest sake datter oock iet ouerblijft tot des ander daechs, so machmen dat oock wel eten, maer watter opden derden dach af gheuonden wordt dat sal tvier verbernen.

18

Eest sake dat iemant van der vreedtoffers vleesch etet opden derden dach, soo sal die van onweerden wesen, ende sij en sal hem niet baten diese gheoffert heeft. Maer dat meer is, so wat siele haer besmet met sulcker spijsen die sal der ouertredinghen sculdich wesen.

19

⁺Het vleesch dat iet onreyns genaect heeft, en salmen niet eten, maer men sal dat metten vier verbranden, die suyuer is die sal daer af eten.

+ C

20

Een besmette ziele die etet van dat vleesch der vreedofferanden, welck den Heere gheoffert is, salvan haren volcken vergaen.

21

Ende die ghenaect heeft eenighe onreynicheyt van menschen, oft van beesten, oft van eenich dinck dat besmetten mach, ende etet van alsulcken vleesche, die sal vergaen van haren volcken.

22

Ende die Heere heeft tot Moysen ghesproken, segghende,

23

Segt den kinderen van Israhel, Het vet des inghewants vanden ossen ende scapen ende gheyten en suldi niet eten.

24

Het vet des inghewants van een prije die van selfs ghestoruen is, oft van sulcken dier dat van een beeste geuanghen ende verbeten is, dat suldi houden tot versceyden gebruyc.

25

Eest dat iemant etet het vet des inghewants welcmen moet offeren tot eenen brantoffer des Heeren, die sal vergaen wt sijnen volcke.

26

Ghi en sult ooc gheen bloet van eenighen beesten tot v spijse nemen, so wel vanden voghelen als vanden vee.

27

So wat ziele bloet etet, sal vergaen van haren volcke.

28

Ende die Heere heeft tot Moysen ghesproken, segghende,

29

Spreect tot die kinderen van Israhel, segghende, ⁺Die den Heere offert een slachofferande des vreedoffers, die offer oock mede een sacrificie, dat is sijn spijs ende dranc offerande,

+ D

30

hy sal des inghewants vet van sijnen slachoffer in sijn handen houden, ende dat borstken, ende als hy die beyde gheoffert, den Heere gheheylicht heeft, soo sal hy die den priester gheuen

31

die welc sal het vet des inghewants opden outaer ontsteken, maer dat borstken sal Aaron ende sijnen kinderen toebehooren.

32

Ende die rechte scoudere van haren vreedofferanden sal den priester toecomen tot een voorgifte.

33

So wie van Aarons sonen het bloet ende het vet des inghewants offert, die sal ooc voor sijn deel hebben die rechte scoudere,

34

Want het borstken der opheffinghen, ende die scouder der afdeelinghen heb ic vanden kinderen van Israhel ghenomen, van haren vreedtofferanden, ende ic heb die Aaron den priester ende sijnen sonen ghegeuen met een eewich recht van alle dat volc van Israhel.

35

Dit is die saluinghe van Aaron ende sijnder sonen in die ceremonien des Heeren, opden dach als Moyses henlieden offerde, dat sij tpriesterschap bedienen soude,

36

ende welck die Heere beuolen heeft, dat hen soude ghegeuen worden van die kinderen van Israhel tot eenen eewighen godtsdienst in haren gheslachten.

37

Dit is die wet vanden brantoffer, ende vanden sacrificie voor die sonden ende versuemenissen, ende voor die wijdinghe, ende voor die slachofferanden der vreedofferen

38

welck die Heere Moysi ghestelt heeft opden berch van Synai, als hy den kinderen van Israhel beuolen hadde, dat sij haer offeranden den Heere offeren souden in die woestijne van Synai.