Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DIe Heere heeft tot Moysen ghesproken segghende,

+ A

2

Een ziele die gesondicht heeft, ende den Heere versmadende, loochent haren naesten eenen pant, den welcken hy sijnder trouwen te bewaren hadde ghegheuen, oft die met ghewelt iet ontnomen heeft, oft eenich onrecht door bedroch gedaen,

3

oft eenich verloren dinck gheuonden, ende dat sij daer bouen tselue loochende eenen valschen eedt doet, ende iet anders ghedaen heeft van allen den dinghen daer die menschen pleghen in te sondighen,

4

als sij verwonnen is van dat misdaet, so sal sijt gheheel weder gheuen

5

dat sij door valsch bedroch heeft willen behouden, ende het vijfste deel daer toe den Heere dien sij scade ghedaen hadde.

6

Maer voor sijn sonde sal hi offeren eenen onbesmetten ram wt dat cudde, ende hy sal dien den priester gheuen nae dat scatten ende die mate der sonden,

7

die welc sal voor hem bidden voor den Heere, ende tsal hem vergheuen worden voor elck dat hy doende misdaen heeft.

8

⁺Ende die Heere heeft tot Moysen ghesproken segghende,

+ B

9

Ghebiedt Aaron ende sijnen sonen, Dit is die wet des brantoffers, men sal dat opden outaer branden allen den nacht tot smorghens toe, het vier sal in den seluen outaer wesen,

10

Die priester sal met den rock gecleedt sijn, ende met een lijnen broecke, ende hisal die asschen nemen welck dat verslindende vier ghebrant heeft, ende legghende die by den outaer,

11

sal hy die ierste cleederen wtdoen, ende met anderen cleederen ghecleet, sal hy die asschen wt draghen buyten den heyrlegher, in die alder suuerste plaetse, ende sal die daer doen verteren tot den voncken toe.

12

Maer tvier sal inden outaer altoos berren, dwelc die priester voeden sal, schietende daer hout onder des morghens alle daghe, ende als hy daer een brantofferande opgheleyt heeft, soo sal hy daer op onsteken die vetten der vreedofferen,

13

dit vier is eewelijck duerende, dat nemmermeer en sal wt den outaer ghebreken.

14

Dit is die wet vanden spijsoffer, ende der vochtigher offeranden, welck die kinderen van Aaron offeren sullen voor den Heere, ende voor den outaer.

15

Die priester sal nemen een hantvol terwen bloeme die met olie beslaghen is, ende alle dwierooc dat op die terwen bloeme gheleyt is, ende hy sal dat ontsteken op den outaer, ⁺tot een ghedenckenisse van eenen aldersuetsten rueck den Heere,

+ C

16

ende dat ander deel van die bloeme des meels sal Aaron met sijnen sonen eten sonder heeue, ende sal dat eten in die plaetse van die heyligher wooninghen des tabernakels,

17

ende daerom en salt niet ghedeesemt worden, want een deel daer af gheoffert wordt tot eenen brantoffer des Heeren, het sal theylich der heylighen sijn, ghelijckt is voor die sonde ende versuemenisse.

18

Die mans van Aarons gheslachte sullen dat alleen eten, Het sal een wettelijck ende eewich recht wesen in uwe gheslachten van des Heeren sacrificien, alle die dese raeckt, sal gheheylicht worden.

19

Ende die Heere heeft tot Moysen ghesproken, segghende,

20

Dit is Aarons ende sijnder kinderen offerande, welck sij moeten offeren opden dach van haerder saluinghen. Sij sullen offeren bloeme van mele, het thiende deel van een ephi, tot een eewich sacrificie, die helft daer af tsmorghens, ende die helft des auonts

21

die welcke sal in een panne met olie beslaghen gheroost worden.

22

Ende die priester die nae recht in sijns vaders stadt sal wesen ghestelt, sal dese bloeme al werm den Heere offeren, tot eenen seer sueten rueck den Heere, die sal opden outaer heel verbrant worden,

23

want alle die sacrificien der priesteren sullen metten vier verteert worden, ende niemant en sal daer af eten.

24

⁺Ende die Heere heeft tot Moysen ghesproken segghende,

+ D

25

Segt Aaron ende sijnen sonen, Dit is het recht vander offeranden voor die sonde, Ter plaetsen daermen offert den brantoffer, salmen die ten offer dooden voor den Heere, het is heylich der heylighen.

26

Die priester diet offert, sal dat eten op die heylighe plaetse, in dat voorhof des tabernakels,

27

Soo wat van sijnen vleesch raect, dat sal gheheylicht worden. Eest sake dat vanden bloede der offeranden eenich cleedt besprenckelt wordt, dat salmen wasschen op die heylighe plaetse.

28

Een aerden vat daert in ghecoect is, salmen breken, maer eest eenen metalen pot soo salmen dien schueren, ende met water afwasschen.

29

Alle dat manlijck is van dat priesterlijck gheslachte, sal van dien vleesch eten, want het is een heylich der heylighen,

30

Want die slachofferande die voor die sonde doot gheslaghen wordt, wiens bloet ghedraghen wordt in dat tabernakel des getuyghenis, in die heylichste plaetse om te suyueren, die en sal niet gheten worden, maer men sal die metten vier verbranden.