Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺EEst sake dat een ziele sondicht, ende dat sij hoort die stemme van iemant die sweert, ende dat hy des een getuyghe is dat hi dat ghesien oft gheweten heeft, ten sij dat hy dat te kennen gheue, soo sal hy sijn boosheyt draghen.

+ A

2

Een ziele die iet onsuyuers raect, tsij oft van eender beesten ghedoot is, oft van selfs ghestoruen, oft eenich ander cruypende dier, ende dat die haer onsuyuerheyt vergheten heeft, die is sculdich ende heeft misdaen.

3

Ende dat die iet van des menschen onreynicheyt raect, nae alle onsuuerheden waer mede men pleech ontsuuer te worden, ende dat si dat vergheten hebbende namaels bekent, soe sal sij der sonden sculdich wesen.

4

Een ziele die ghesworen heeft, ende heeft wat met haren lippen wtghesproken dat sij iet qualijck soude doen oft wel, ende dat sij het selue heeft vast ghemaect met eede, ende met een woordt, ende sij dat vergheten hebbende, namaels bekent haer versuemenisse,

5

die sal penitencie doen voor haer sonde,

6

ende sy sal wten cudden offeren een oylam oft een gheyte, ende die priester sal voor haer bidden, ende voor haer sonde,

7

⁺Maer eest

+ B

[p. *113]

sake dat hy gheen cleyn vee gheofferen en can, so sal hy offeren twee tortelduyuen oft twee ionghe duyuen den Heere, die eene voor die sonde, ende dander tot eenen brantoffer,

8

ende hi sal die den priester gheuen. Die welcke dierste voor die sonde offerende, sal het hooft van dien omwringhen aen sijn vloghelen, also dattet aen den hals blijf hanghende, ende dat niet gheheel af en breke,

9

ende hy sal vanden bloede besprayen den want des outaers, maer datter vanden bloede noch ouerblijft dat sal hy doen druypen aen dat fudament des outaers, want het is voor die sonde,

10

maer dat ander duyfken sal hy verbranden tot eenen brantoffer, ghelijckmen dat pleech te doene, ⁺Ende die priester sal voor hen bidden, ende voor sijn soude, ende tsal hen vergheuen worden.

+ C

11

Maer eest dat sijn hant niet en can twee tortelduyuen gheofferen, oft twee ionghe duyuen, so sal hy voor sijn sonde offeren terwen bloeme, het thiende deel van een ephi, hy en sal daer gheen olie in doen oft iet wieroocks daer op legghen, want het is voor die sonde,

12

ende hy sal dat den priester gheuen, die welcke daer een hant vol af nemende, sal dat verbranden op de outaer tot een ghedenckenisse van hem diet gheoffert heeft,

13

biddende voor hem ende hem suyuerende, maer het ander deel sal hy hebben tot een ghifte.

14

Ende die Heere heeft tot Moysen ghesproken segghende,

15

Een siele eest dat sij ouertredende die ceremonien door dolinghe haer besondicht in die dinghen die den Heere gheheylicht sijn, soe sal sij voor haer misdaet wt die cudden offeren eenen ram sonder smette, ⁺diemen coopen mach om twee sielen, nae dat ghewichte der heyligher plaetsen,

+ D

16

ende die scade welck hy ghedaen heeft, sal hy wederoprechten, ende tsal het vijfste deel daer toe legghen, gheuende dat den priester, die welcke sal voor hen bidden offerende den ram, ende tsal hem vergheuen worden.

17

Een siele eest dat sij door onwetentheyt sondicht ende iet doet van tghene dat door die wet des Heeren verboden is, ende der sonden sculdich sijnde haer sonde bekent,

18

die sal eenen ram sonder smette wt die cudden offeren den priester, nae die mate ende scattinghe der sonden, die welc sal voor hem bidden, om dat hy dat heeft onwetende ghedaen, ende tsal hem vergheuen worden,

19

om dat hy door dolinghe teghen den Heere misdaen heeft.