Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde die Heere tot Moysen ghesproken segghende,

+ A

2

Segt de kinderen van Israhel, Een ziele als sij ghesondicht heeft door onwetentheyt, ende die iet ghedaen heeft van allen Godts gheboden, die hy gheboden heeft datmen niet doen en soude.

3

Eest dat een priester die gesalft is gesondicht heeft, doende het volck sondighen, die sal voor sijn sonde den Heere offeren een calf sonder smette,

4

ende hy sal dat brenghen voor die doore van dat tabernakel des ghetuyghenis voor den Heere, ende hy sal sijn hant legghen op dat hooft, ende hy sal dat dootslaen voor den Heere.

5

Ende hy sal nemen van des calfs bloet draghende int tabernakel des ghetuyghenis,

6

⁺ende als hy sijnen vingher int bloet ghesteken heeft, so sal hy hem daermede besprayen seuenwerf voor den Heere, tseghen dat voorhancsel der heyligher plaetsen,

+ B

7

ende hy sal vanden seluen bloede doen op die hornen des outaers vanden welriekenden offer, die den Heere alder ghenaemst is, den welcken es in dat tabernakel des ghetuyghenis, maer alle dander bloet sal hy storten aenden voet vanden outaer des brantoffers, in den inganc des tabernakels.

8

Ende dat binnenste vet van dat calf sal hy offeren voor die sonde, soe wel tghene dat het inghewant ouerdect, als alle dat daer binnen is,

9

die twee nierkens ende dat netteken dat daer ouer is by die lendenen, ende dat vet der leueren met die nierkens,

10

ghelijck dat gheoffert wordt van dat calf der vreedofferanden, ende hy sal die onsteken op den outaer des brantoffers.

11

⁺Maer dat vel ende alle dat vleesch metten hoofde, ende met die voeten, ende dat inghewan ende met dat mest,

+ C

12

ende met alle dander deel vanden lichaem, sal hy wech wten legher draghen, op een suyuer plaetse daermen die asschen pleech wt te storten, ende hy sal die daer onsteken op eenen tas houts, die welcke sullen op die plaetse der wtghestorter asschen verbrant worden.

13

Maer eest by also dat alle die ghemeynte der kinderen van Israhel onwetende gheweest is, ende dat sij by onwetenheyt iet ghedaen heeft dat tseghen Gods ghebodt is,

14

ende dat sij daer nae haer sonde bekennen, soo sullen die voor haer sonde een calf offeren, ende dat brenghen aen die doore des tabernakels,

15

ende die ouders des volcs sullen haer handen legghen op thooft des calfs, voor den Heere. ⁺Ende alst calf ten offer doot gheslaghen is voor des Heeren aensicht,

+ D

16

so sal die ghesalfde priester van des calfs bloede draghen in dat tabernakel des ghetuyghenis,

17

ende sijnen vingher daer in nat makende, sal hy seuenwerf besprayen teghen dat voorhancsel,

18

ende hi sal vanden seluen bloede doen aen die hornen des outaers, welc voor den Heere is int tabernakel des getuyghenis, ende het bloet datter ouerblijft sal hy storten by dat basement vanden brantoffers outaer, welc daer is in die doore van dat tabernakel des ghetuyghenis,

19

ende alle sijn vet sal hy nemen, ende dat aensteken opden outaer,

20

alsoo ooc doende van desen calue, ghelijck hy te voren gedaen hadde, ende als die priester voor hen bidt, sal die Heere hen ghenadich wesen.

21

Maer dat selue calf sal hy draghen buyten den heyrlegher, ende dat verbernen, ghelijck dat eerste calf, want tes voor die sonde der ghemeynten.

22

⁺Eest dat een prince sondicht, ende wt andere vele sonden iet doet door onwetenheyt, dwelc door die wet des Heeren verboden worden,

+ E

23

ende dat hy namaels sijn sonde bekent, die sal den Heere een slachofferande offeren, eenen bock van die gheyten, sonder smette,

24

ende hy sal sijn hant legghen op des bocx hooft, ende als hy dien heeft dootgheslaghen terplaetsen daermen pleech die brantofferande te dooden voor den Heere (want voor die sonde is)

25

soo sal die priester sijnen vingher nat maken in dat bloet der offeranden voor die sonde, rakende die hornen des brantoffers outaer, ende dat ander bloet wtghietende aen des outaers voet.

26

Maer het binnenste vet sal hy verbranden bouen, ghelijckmen pleech te doen in die vreedtsamighe offeranden, ende die priester sal voor hem bidden, ende voor sijn sonde, ende tsal hem vergheuen worden.

27

⁺Maer eest datter een ziele vanden volck des lants door onwetenheyt ghesondicht heeft, also dat sij iet doet van tghene dat door des Heeren wet verboden is, ende datse also misdoet,

+ F

28

ende haer sonde bekent, so sal die offeren een onbesmette gheyte,

29

ende die sal sijn handen legghen opt hooft der slachofferanden, welc voor die sonde is, ende sal die ten offer dootslaen in die plaetse des brantoffers,

30

ende die priester sal vanden bloede nemen aen sijnen vingher, ende rakende die hornen van des brantoffers outaer, dat ander bloet sal hy wtghieten aent basement van dien.

31

⁺Ende alle dat vet afnemende alsomen dat pleech af te nemen van die vreedofferanden sal hy dat ontsteken opden outaer tot eenen rueck der sueticheyt den Heere, ende hy sal voor hem bidden ende tsal hem vergheuen worden.

+ G

32

Maer eest dat hi vanden cleynen vee offert voor die sonde, te weten een scaep sonder smette,

33

soe sal hy sijn hant legghen op des offers hooft, ende hy sal die dooden ter plaetsen daermen pleech te dooden die brantofferanden,

34

ende die priester sal van sijnen bloede nemen met sijnen vingher, ende rakende die hornen des brantoffers outaer, dat ander bloet sal hi storten aent basement van dien.

35

Ende alle tvet afdoen, ghelijckmen pleech af te doen het vet vanden ram die voor den vreedoffer gheoffert wordt, sal hy dat verbranden opden outaer tot een ruecofferande des Heeren, ende hy sal voor hem bidden ende voor sijn sonde, ende tsal hem vergheuen worden.