Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MAer es sijn offerande eenen vreedoffer, ende dat hy vanden rinderen wilt offeren, tsij eenen osse oft een coe, soe sal hy die voor den Heere offeren sonder vlecke,

+ A

2

ende hy sal sijn hant legghen op dat hooft van sijnder slachofferanden, dwelc ten offer sal dootgheslaghen worden inden inganck van dat tabernakel des ghetuyghenis, ende Aarons des priesters sonen sullen dat bloet storten alomme den outaer,

3

ende van den vreedoffer sullen sij den Heere offeren, het vet dat dinghewant bedect, ende watter vets binnen es,

4

die twee nieren metten vette, daer die lendenen mede bedect worden, ende dat netteken vander leueren met die nierkens.

5

⁺Ende sij sullen dat doen verbranden opden outaer tot eenen brantoffer, stekende vier onder dat hout, tot een offerande des aldersuetsten ruecs den Heere.

+ B

6

Maer is sijn offerande van den scapen, ende een vrede offerande, tsij oft hy een manneken offert oft een wijfken, sij sullen onbesmet wesen.

7

Eest dat hy een lam voer den Heere offert,

8

soo sal hy sijn hant legghen op dat hooft van sijnder slachofferanden, welc sal gheslaghen worden ten offer int portael van dat tabernakel des verbonts, ende Aarons sonen sullen dat bloet storten rontsomme den outaer

9

ende sij sullen offeren vander vreedofferanden, ⁺den Heere een sacrificie, dat vet ende den heelen steert,

+ C

10

met die nieren ende dat vet welck den buyck binnen ende alle dat inghewant bedect, ende beyde die nierkens, met dat vet dat aen die lendenen is, ende dat netteken der leueren met die nierkens,

11

ende die priester sal dese al ontsteken opden outaer, tot een vuetsel des viers ende des Heeren offerande.

12

Eest sake dat sijn offerande is een gheyte ende dat hy die den Heere offert,

13

soe sal hi sijn hant op haer hooft legghen, ende hy sal die offerren aenden inganc van dat tabernakel des ghetuyghenissen ende die sonen van Aaron sullent bloet van dien rontsomme den outaer storten,

14

ende sij sullen daer af nemen tot een vuetsel van des Heeren vier, tvet dat den buyck ouerdect, ende dat alle dinghewant bedect,

15

die twee nierkens metten netteken dat ouer die is by die lendenen, ende dat vet vander leueren met die nierkens,

16

ende die prie-

[p. *112]

ster sal dese opden outaer ontsteken tot een vuetsel des viers, ende tot eenen aldersuetsten rueck. Alle dat vet sal den Heere toebehooren

17

met een ewich recht in uwen gheslachten ende in allen uwen woonsteden, ende ghy en sult gheensins bloet oft vet eten.