Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxix. Capittel.

1

⁺MAer van hemels blau ende purpur sijde ende van roode sijde ende van witten ghetwernden lijnen draet heeft hy die cleederen ghemaect, daer Aaron mede ghecleedt soude worden, als hy diende in die heylighe plaetsen, ghelijck die Heere Moysi beuolen heeft.

+ A

2

Dus heeft hy dat ouercleet der scouderen ghemaect van goude ende van blau ende purpur sijde ende van roode sijde tweemael gheverwet, ende van wit lijnen garen ghetwernt, nae die conste der tapijtwerckers.

3

Ende hy heeft gesneden gheslaghen gout, ende maecte daer af dunne draeyen, datmen die mocht int werck slaen met den inslach van die voer ghenoemde verwen,

4

ende hy maecte twee soomen die aen malcanderen ghevuecht waren aen beyde die sijden vanden eynden,

5

ende eenen riem van die selue verwen ghelijc die Heere Moysi beuolen hadde.

6

⁺Ende hy bereyde oec twee onixsteenen, ghebonden ende ghesloten in goude, ende daer in ghegraueert die namen der kinderen van Israhel, nae die sonste der costelijcker steengraueerders.

+ B

7

Ende hy heeft die ghestelt aen die sijden vanden ouercleedt der scouderen, tot een ghedenckenisse der kinderen van Israhel, ghelijc die Heere Moysi beuolen hadde.

8

Ende hy heeft oeck ghemaect dat borstuck des verstants, borduerwerck, ghelijc dat werc van dat ouercleedt der scouderen, van goude, blau ende purpur sijde ende van roode sijde tweemael gheverwet, ende van wit lijnen garen ghetwernt,

9

ghemaect viercant ende dobbel, een palm groot, ende hy heeft daer in ghestelt vier rijen costelijcker steenen.

10

⁺In dierste rije was eenen sardius, topasion, ende smaragdus,

+ C

11

In die tweede was eenen carbunkel, sapphier, ende iaspis,

12

In die derde rije was ligurius, achates, ende amethistus,

13

In die vierde rije was chrysolitus, onichinus, ende berillus, al omleyt ende besloten in goude elck nae sijn ordinancien.

14

Ende in dese twaelf steenen die waren ghesneden die twaelf namen der kinderen van Israhel, elcken steen met eenen sonderlinghen naem.

15

Ende sij hebben in dat borstuck des verstants, oeck ketenkens ghemaeckt, die aen malcanderen hechten vanden alder puersten goude,

16

ende twee haerkens, ende soe veel gulden ringhen,

17

Maer die ringhen hebben sij ghestelt aen beyde die sijden van dat borstuck der redelicheyt, daer die twee gulden ketenen aenhinghen, die welck sij hechten aen die haecken die aen die hoecken van dat ouercleedt der scouderen wtstonden.

18

⁺Dese quamen voer ende achter alsoe aen een, dat het ouercleedt der scouderen, ende dat borstuck der redelicheyt aen malcanderen gehecht worden,

+ D

19

ghebonden aenden gordel, ende met ringhen noch stercker gheknocht, die welcke tsamen worden geuoecht doer een blau lint, op dat sij onghebonden sijnde niet ontworpen en souden ende van malcanderen scheyden, alsoe die Heere Moyses beuolen hadde.

20

Ende sij hebben oec ghemaect den lijfrock van dat ouercleedt der scouderen, gheheel blau,

21

ende een hooftslippe int opperste teghen dat midden, ende eenen gheweuen boort rontsomme die hooftslippe,

22

ende beneden aen die voeten granaet appelen ghemaect van blau sijde ende purpur sijde, ende van roode sijde tweemael gheverwet, ende van wit lijnen garen ghetwernt,

25

ende scellekens vanden alderpuersten goude, die welc sij ghestelt hebben tusschen die granaet appelen,

26

⁺in dat wterste vanden lijfrock, rontsomme een gulden cloxken, ende daer nae eenen granaet appele, waermede die ouerste priester verciert ghinck, als hy sijn officie bediende, ghelijck die Heere Moysen beuolen hadde.

+ E

27

Sij hebben oec witte rocken ghemaect van fijnen lijnwaet, nae der weuers werck, voer Aaron ende sijn sonen.

28

Ende mijters met haren croonkens van wit fijn lijnwaet, ende daer toe oeck lijnen broecken van fijnen lijnen witten draet.

29

Ende den riem van fijn wit lijnen garen dat ghetwernt was, ende van blauwe ende purpur sijde, ende van roode sijde met versceyden verwen onderscoten nae die const der borduerwerckers, ghelijck die Heere Moysen beuolen hadde.

30

Sij hebben oock die plate van der heyligher eerwerdicheyt ghemaect vanden alderfijnsten goude, ende sij hebben daer in ghescreuen nae die conste der costelijcker steengraueerders,

31

⁺Dat heylich des Heeren, ende sij bonden die aen den mijter met een blau lint, ghelijck die Heere Moysi beuolen hadde.

+ F

32

Aldus dan so is volmaect gheweest alle dat werc des tabernakels van dat dack des ghetuyghenis. Ende die kinderen van Israhel hebben ghedaen alle dat Godt Moysi beuolen hadde,

33

ende sij hebben gheoffert dat tabernakel ende het dack, ende alle die ghereetscap, ringhen, plancken, hantboomen, columnen, basementen,

34

het decsel van roode ramsvellen, ende het ander decsel vanden blauwen vellen dat voorhancsel,

35

die arcke, die hantboomen, der ghenaden stoel,

36

die tafel met haer ghereetscappe, ende metten brooden der voorlegginghen,

37

den candelaer, die lampen met ha-

[p. *110]

ren ghereetscappen, met die olie,

38

den gulden outaer ende die olie der saluingen, den welriekenden offer van costelijcke specien ghemaect, ende dat voerhancsel inden inganc des tabernakels,

39

den metalen outaer, dat netteken, die hantboomen ende alle sijn ghereetscappen, dat waschuat met sijnen basemente,

40

die voorhancsels des voorhofs, ende die columnen met haren basementen, dat voorhancsel inden inganc van dat voorhof, sijn seelkens ende spannaghelen. Daer en ghebrack niet van alle die ghereetscappe vanden welcken gheboden was dat mense maken soude tot den dienst des tabernakels, ende tot het dack des verbonts.

41

Ooc mede die cleederen welcke die priesters ghebruycken in die heylige plaetse, te weten Aaron met sijnen sonen,

42

hebben die kinderen van Israhel gheoffert, ghelijc die Heere beuolen hadde.

43

Ende als Moyses ghesien heeft dat alle dese dingen volmaect waren, soe heeft hy hen gebenedijt