Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xl. Capittel.

1

⁺DIe Heere heeft ghesproken tot Moysen, segghende,

+ A

2

In die ierste maent opden iersten dach der maent, soo suldi dat tabernakel der ghetuyghenis oprichten,

3

ende ghy sult die arcke daer inne stellen, ende ghy sult daer voor een voorhancsel laten comen,

4

ende als ghy die tafel daerin ghebracht hebt, suldi daer op setten alle tghene dat wettelijc beuolen is. Den candelaer sal staen met sijnen lampen

5

ende den gulden outaer daer den welriekenden offer op onsteken wort voor die arcke des ghetuyghenis. Ende ghy sult een voorhancsel stellen aen den inganck van dat tabernakel,

6

ende daer voor den outaer des brantoffers,

7

dat waschuat suldi stellen tusschen den outaer ende dat tabernakel dwelc ghy met water vullen sult,

8

Ende ghy sult dat voorhof alomme behanghen met voorhancsels, ende sijnen inganck.

9

Ende ghy sult nemen die olie der saluinghen ende saluen dat tabernakel met alle sijnen ghereetscappen, dat sij moghen geheylicht worden,

10

des brantoffers outaer met alle sijn ghereetscap,

11

dat waschuat met sijnen basemente. Ghy sullet al heylichmaken met die olie der saluinghen, op dat die moghen wesen heylich der heylighen.

12

⁺Ende ghy sult Aaron ende sijn sonen brenghen aen die doore van dat tabernakel des ghetuyghenis, ende als ghy die met water ghewasschen hebt,

+ B

13

soe suldi hen aendoen die heylighe cleederen dat sij my dienen, ende haer saluinghe mach vorderen tot een eewich priesterscap.

14

Ende Moyses heuet al ghedaen dat hem die Heere gheboden hadde.

15

Aldus dan in die ierste maent vanden tweeden iare, opden iersten dach der maent, soo es dat tabernakel ghestelt.

16

Ende Moyses heeft dat opghericht, ende hy heeft die plancken, basementen ende rijchelen ghestelt,

17

ende hy heeft die columnen ooc opghericht, ende hy heeft het dack ghespannen ouer dat tabernakel, ende het decsel daer op gheleyt, also die Heere beuolen hadde.

18

Ende hy heeft dat getuyghenis ooc in die arcke gheleyt, ende daer onder die handboomen ghesteken, ende den stoel der ghenaden, daer bouen gheleut.

19

Ende als hy die arcke bracht hadde in dat tabernakel, soe heeft hi voor haer een voordecsel ghehanghen, dat hy Gods ghebodt volbrenghen soude.

20

⁺Hy heeft ooc die tafel ghestelt in dat tabernakel des ghetuyghenissen, aen die noortsijde, buyten die gordijne,

+ C

21

ende schicte daer op die brooden der voorlegginghen, ghelijc die Heere Moysi beuolen hadde.

22

Hy heeft den candelaer ooc ghestelt in dat tabernakel des ghetuyghenis tseghen ouer die tafel, aen die suytsijde,

23

daer op stellende die lampen veruolghens nae des Heeren ghebodt.

24

Ende hy heeft den gulden outaer gestelt onder dat dack des ghetuyghenis teghen dat voorhancsel,

25

ende hy heeft daer op onsteken den welriekenden offer der specerien, ghelijc die Heere Moysi beuolen hadde.

26

Ende hy heeft ooc een voorhancsel gestelt aen den inganc van dat tabernakel der ghetuyghenis,

27

ende den brantoffers outaer in dat portael des ghetuyghenis, offerende daer op brantoffere ende sacrificien, als die Heere gheboden hadde.

28

Ende hy heeft oock het waschuat ghestelt tusschen dat tabernakel des ghetuyghenis, ende den outaer vullende dat met water.

29

⁺Ende daer hebben haer handen ende voeten in ghewasschen Moyses ende Aaron ende sijn sonen,

+ D

30

als sij in tabernakel der verbonts ghinghen, ende totten outaer ghinghen, alsoo die Heere Moysen beuolen hadde.

31

Ende hy rechte ooc op dat voorhof rontsomme den tabernakel ende den outaer, ende hy spande een voorhancsel voor den inganck.

32

Alst al volmaect was, soe heeft een wolcke dat tabernakel des ghetuyghenissen bedect, ende des Heeren glorie heeft dat veruult,

33

Ende Moyses en conste in dat dack des verbonts niet gaen die wijle dat die wolcke dat al bedecte, ende die maiesteyt des Heeren daer blincte, want die wolcke haddet al bedect.

34

Ende als die wolcke van dat tabernakel sceyde, soe reysden die kinderen van Israhel voerts na haren heyrscaren,

35

maer als sij daer binen hinck, so bleuen sij in die selue plaetse.

36

Want des Heeren wolcke ruste des daechs op dat tabernakel, ende het vier des nachts, daert alle die kinderen van Israhel saghen, in allen haer woonsteden.

§ Hier voleynt dat tweede boeck Moysi Exodus ghenaemt.