Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxviij. Capittel.

1

⁺ENde hy heeft ghemaect des brantoffers outaer van setimhout van vijf cubitus int viercant, ende drij cubitus in die hoochde.

+ A

2

Wiens hornen quamen wten hoecken, ende hy ouerdeckte dien met metalen platen.

3

Ende tot sijnen ghebruyck, soe bereyde hy versceyden ghereetscap van metale, siepotten, tanghen, crauwels, haken ende vierpannen.

4

Ende hy maecte het roosterken des outaers op een maniere van een net al metalen. Ende daer onder int midden des outaers een vloerken,

5

ende hy heeft oeck vier metalen ringhen ghegoten, aen die vier wterste eynden des nettekens, om die hantboomen daer in te steken, om te draghen,

6

welck hy oec heeft van setimhout ghemaect, ende heeftse met metalen platen bedect,

7

ende hy heeftse in die ringhen ghesteken die aen die sijden des outaers wtstaken. Maer dien outaer en was niet dichte, maer hol, van plancken ghemaect, binnen ydel.

8

Hy heeft oeck een metalen waschuat ghemaect met sijnen basement, vander vrouwen spieghelen, die daer waeckten aen die doere des tabernakels.

9

⁺Ende hy maecte dat voerhof aen wiens suytsyde waren voerhancsels van wit lijnen garen, tweemael ghedrayt, hondert ellen lanck,

+ B

10

twintich metalen columnen met haren basementen, die capiteelen des columnen met alle dat ghesneden werck was van siluer.

11

Desghelijcks aen die noortsijde waren oec voerhancsels, columnen ende basementen, ende capiteelen der columnen, vander seluer maten ende werck, ende metael.

12

Maer aen die sijde die teghen den westen staet, waren voerhancsels van vijftich ellen lanck, thien columnen met haren basementen van metale, ende die capiteelen der columnen, ende den heelen sneede vanden wercke was van siluer.

13

Maer tseghen den Oosten, soe maecte hy voerhancsels van vijftich cubitus,

14

waer af die vijfthien cubitus der drij columnen met haren basementen hielen die een sijde,

15

ende aen dander sijde (want hy tusschen die twee maecte des tabernakels inganck) waren desghelijcs oec voerhancsels van vijfthien cubitus, ende drij columnen, ende soe veel basementen.

16

Alle die voerhancsels des voerhoofs hadde hy gheweuen van wit lijnen ghetwernt garen.

17

Die basementen der columnen waren metalen, maer haer hoofden met allen haren ghesneden werck waren van siluer, ⁺ende die columnen vanden voerhoue heeft hy becleedt met siluer.

+ C

18

Ende in sijnen inganck heeft hy een voerhancsel ghemaect borduerwerck, van hemel blauwe ende purpur sijde, ende van roode sijde tweemael gheverwet, ende van wit lijnen garen ghetwernt, dwelc hadde twintich cubitus in die lengde, ende die hoochde was vijf cubitus, nae die mate welck alle die voerhancksels des voerhoofs hadden,

19

maer inden inganc waren vier columnen met haren metalen basementen, ende haer capiteelen metten ghesneden

[p. *109]

werck waren van siluer.

20

Ende die spannaghelen des tabernakels ende des voerhofs, int ronde maecte hy van metale.

21

Dit sijn die ghereetscappen vanden tabernakel des ghetuyghenissen, die ghetelt sijn na Moyses beuel, tot die wtwendighe Gods diensten der Leuiten, doer die hant van Ithamar Aarons des priesters sone,

22

die welcke Beseleel die sone van Uri, Hurs sone wten gheslachte van Iuda, volmaect hadde Gode doer Moysen alsoo beuelende,

23

hebbende met hem tot eenen gheselle Goliab den sone van Achisamech, wt Dans gheslachte, die welck ooc een sonderlinghe groot constenaer was in houtwerck, ende een borduerwercker, ende een tapijtmaker van blau ende purpur sijde, ende roode sijde, ende van wit lijnen garen.

24

⁺Alle tgout datter verwrocht is int werck vander heyligher plaetsen,

+ D

25

ende datter in die giften gheoffert is, dat was neghenentwintich talenten, ende seuenhondert ende dertich siclen na dat ghewicht der heyligher plaetsen.

26

Ende dat is gheoffert van die ghene die ten ghetale comen waren, van twintich iaren ende daer ouer, te weten van ses hondert duysent, ende drij duysent ende vijfhondert, ende vijftich ghewapender mannen.

27

Ende daer waren ooc noch hondert talenten siluers waer af ghemaect sijn die basementen vander heyligher plaetsen, ende vanden inganck daer dat voerhancsel hanghet. Hondert basementen sijn ghemaect van hondert talenten, voor elc basement een talent gherekent,

28

Maer van die duysent seuenhondert ende vijfentseuentich siclen, heeft hy die capiteelen vanden columnen ghemaect, die welcke hy ooc met siluer becleet heeft.

29

Ende daer sijn ooc geoffert tweentseuentich duysent talenten, ende daer bouen noch vierhondert siclen metaels,

30

waer af die basementen ghegoten sijn, inden inganck van dat tabernakel des ghetuyghenis, ende den metalen outaer met sijnen roosterken. Ende alle die ghereetscap die tot sijnen behoeften behoorende is,

31

ende die basemeten des voorhoofs, soo wel in sijnen omganc als in sijnen inganck, ende die spannaghelen des tabernakels ende des voorhoofs int ronde.