Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvij. Capittel.

[p. *108]

1

⁺ENde Beseleel heeft oeck een arcke ghemaect van setim hout, die welcke hadde twee cubitus ende eenen haluen in die lingde, ende onderhaluen cubitus in die breydde, ende die hoochde was oec van onderhaluen cubitus,

+ A

2

ende hy heeft die becleedt metten alderpuersten goude van binnen ende van buyten, ende hy heeft daer op int ronde een gulden croonement ghemaect,

3

ghietende oeck vier gulden ringhen aen haer vier hoecken, twee ringhen aen deen sijde, ende twee ringhen aen dander sijde.

4

Ende hy heeft oec twee hantboomen gemaect van setim houte, die welcke hi met goude becleedt heeft,

5

ende die hy in die ringhen ghesteken heeft, die daer waren aen die hoecken vander arcken om haer te draghen.

6

Ende hy heeft oeck ghemaect der ghenaden stoel, dat es die plaetse der antwoerden Godts, vanden alder suyuersten goude, twee ende een half cubitus lanc, ende onder half cubitus breedt.

7

Ende oec twee cherubim van gheslaghen goude, die welcke hy ghestelt heeft aen beyde die sijden vander ghenaden stoel,

8

Den eenen Cherub opt opperste van deen sijde, ende den anderen Cherub aen dat opperste vander ander sijden, twee Cherubim aen beyde die hoochden vander ghenaden stoel,

9

haer vloghelen wtreyckende, ende bedeckende der ghenaden stoel, malcanderen, ende dien aensiende.

10

Ende hy heeft oeck een tafel ghemaect van setim hout, twee cubitus lanck, ende eenen cubitus breedt, die welck hadde onderhalf cubitus in die hoochde,

11

ende hy heeft die omleyt met den aldersuuersten goude,

12

ende hy heeft haer een gulden lijste int ronde ghemaect, ende op die lijste, een gulden wtghesteken croone van vier vingheren, ende op die selue noch een ander gulden croone.

13

Hy heeft oec vier gulden ringhen ghegoten, welck hy ghestelt heeft aen die vier hoecken, aen elcken voet vander tafelen teghen die croone,

14

ende hy heeft daer die hantboomen in ghesteken, datmen die tafel soude moghen draghen.

15

Ende die hantboomen heeft hy van setimhout ghemaect, ende hy heeftse met goude omleyt.

16

⁺Ende oec ghereytscap tot versceyden ghebruyc der tafelen, te weten scotelen, ende scalen, ende croesen, ende wieroocvaten van fijnen goude, daermen die vochtighe offeranden in offeren moet.

+ C

17

Ende hy heeft oeck eenen gheslaghen kandelaer ghemaect vanden alder puersten goude, wt wiens standaert quamen schachten, nappen, ronde clootkens, ende oec lelien,

18

ses aen beyde die sijden, drij schachten wt die een sijde, ende drij wt die ander sijde,

19

drij nappen in die manier van een not waren aen elcken schacht, ende desghelijcs oeck mede clootkens ende lelien, ende drij nappen ghelijc een not waren aenden anderen schacht, ende oec mede clootkens ende lelien. Al ghelijck was het werc vanden ses schachten die wten standaert des candelaers quamen.

20

Ende inden seluen standaert waren vier nappen in manier van noten, ende nae elcken nap clootkens ende lelien,

21

ende onder die twee schachten waren clootkens te drij plaetsen, welck tsamen worden ses schachten, comende wt eenen standaert.

22

Hierom waren die clootkens ende die schachten wt een comende, al te samen gheslaghen vanden alder puersten goude.

23

⁺Ende hy heeft seuen lichtuaten ghemaect met haren snuyters, ende vaten daermen het suytsel versmachten soude, al vanden fijnsten goude.

+ D

24

Den candelaer met allen sijnen ghereetscappen woech een talent in goude.

25

Hy heeft oec ghemaect den outaer des welriekenden offers, van setim hout, hebbende in sijn viercant aen elck sijde eenen cubitus, ende in sijn hoochde twee cubitus, wt wiens hoecken quamen hornen,

26

ende hy heeft dien becleedt met den alderpuersten goude, met sijnen roosterken, ende wanden, ende hornen.

27

Ende hy heeft dien outaer een cleyn gulden croonement ghemaect rontsomme, ende twee gulden ringhen onder dat cronement aen elcke sijde, datmen daer hantboomen in steken soude, ende datmen den outaer soude moghen draghen.

28

Ende die hantboomen heeft hy van setim hout ghemaect, ende hy heeft die met gulden platen ouerdect.

29

Ende hy heeft oeck olie ghemaect tot die salue der wijdinghen, ende welriekenden offer van die alder suuerste specerien nae die const der apotekers.