Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvi. Capittel.

1

⁺ALdus soe hebben ghedaen Beseleel ende Goliab ende alle wijse mannen den welcken die Heere wijsheyt ende verstant ghegheven heeft, dat sij souden connen constelijc wercken alle datter nootelijck was tot behoef van der heyliger plaetschen, ende al dat die Heere beuolen hadde.

+ A

2

Ende als Moyses hen gheroepen hadde, met alle die ander constighe mannen den welcke Godt wijsheyt ghegheuen hadde, ende die vrijwillichlijc hen seluen hadden ghepresenteert om dit werc te maken,

3

soe heeft hy hemlieden ouergheleuert alle die ghiften der kinderen van Israhel, Ende als sij daghelijcs neerstelijc haer werc deden, soe offerde dat volck smorghens zijn gheloften,

4

Waerom dat die wercklieden bedwonghen waren te comen, ende hebben tot Moyses gheseyt.

5

Het volck offert meer dant van noode es,

6

Daerom heeft Moyses door eens wtroepers stemme doen roepen, Noch man noch vrouwe en offer iet voerts meer totten werc der heyligher plaetsen, Ende alsoe en heeftmen niet meer ghiften gheoffert,

7

om dat die geofferde ghiften ghenoech waren, ende ouerschoten.

8

Ende alle die wijs van herten waren hebben (om te volbrenghen het werc des tabernakels) ghemaect, thien gordijnen van ghetwernde witten lijnen draet, ende van blau ende purpur sijde, ende van roode sijde tweemael gheuerwet, een werc van versceyden verwen nae die conste der borduerwerckers,

9

waer af die eene was achtentwintich cubitus lanck, ende vier cubitus breedt ⁺ende alle die gordijnen waren van eender maten,

+ B

10

ende hy voechde vijf gordijnen tsamen deen aen dandere, ende noch ander vijue hechte hy oec aen malcanderen,

11

Ende hy heeft blau litsen ghemaect aen den cant der eender gordijnen, aen beyde die sijden, ende aen den cant vander ander gordijnen des ghelijcs,

12

dat die litsen tseghen malcanderen comen souden, ende alsoe aen malcander hechten,

13

ende daer omme heeft hy oeck vijftich gulden ringhen ghemaect, die der gordijnen litsen tsamen aen een hechten souden, ende alsoe een tabernakel worden.

14

Ende hy heeft oeck elf hayren cleederen ghemaect van gheyten hayre, om dat dack des tabernakels te bedecken,

15

een hayren cleedt was dertich cubitus lanc ende vier cubitus breedt, alle die hayren cleederen waren van eender maten,

16

waer af dat hi die vijue tsamen voechde op deen sijde, ende die ander sesse verscheyden.

17

Ende hy heeft vijftich litsen aenden cant van dat een hayren cleedt ghemaect, ende noch vijftich aenden cant van dat ander hayren cleedt, dat sij aen malcanderen souden moghen ghehecht worden.

18

Ende vijftich metalen haecskens daermen dat dack mede soude tsamen hechten, alsoe dat van alle die hayren cleederen een ouerdecsel soude ghemaect worden.

19

Hi heeft oock een ouerdecsel des tabernakels ghemaect van roode rams vellen, ⁺ende noch een ander decsel daer ouer van iantinen vellen,

+ C

20

Ende hi heeft oeck ghemaect die staende plancken des tabernakels van setim houten,

21

Thien cubitus was een plancke lanck, ende onderhalf cubitus was die breedt,

22

twee groeuen waren aen elck plancke, dat die een aen dander soude moghen ghevoecht worden, ende alsoe heeft hy ghemaect aen alle die plancken des tabernakels,

23

Waer af datter twintich waren aen die suytsijde, teghen den suyden met veertich silueren basementen,

24

Twee basementen worden ghestelt onder elck plancke aen beyde die hoecsijden, daer die groeuen der sijden een inde nemen in die hoecken.

25

Ende aen die sijde des tabernakels die tseghen den noorden staet, heeft hy oock twintich plancken ghemaect

26

met veertich silueren basementen twee basementen tot elcker plancken,

27

Maer tseghen den westen welc was die sijde des tabernakels, die ter zee waert siet, heeft hy ses plancken ghemaect,

28

ende noch twee andere aen elcken hoeck vanden tabernakel achter, die aen een gheuoecht waren, van beneden tot bouen toe,

29

ende alsoe quamen sij tsamen aen een voechsel, Ende aldus heeft hy ghemaect aen beyde die sijden aen die hoecken, datter tsamen acht plancken waren,

30

die welc hadden sesthien silueren basementen, te weten twee basementen onder elc tafel,

31

Ende hi maecte oeck vijf richelen van setim hout, ⁺om die plancken van die een sijde des tabernakels tsamen aen een te houden, ende noch vijue om die plancken vander ander sijden oeck aen een te houden,

+ D

32

Ende buyten dese vijue heeft hy noch ander rijchelen ghemaect aen die westsijde des tabernakels teghen die zee.

33

Oock heeft hy een ander rijchel ghemaect die doert midden der plancken, van den eenen hoeck totten anderen comen souden.

34

Ende alle dese plancken heeft hy vergult, ende heeft haer basementen van siluer ghegoten, Ende haer ringhen heeft hy van goude ghemaect, daermen die rijchelen soude moghen doorsteken, die welcke hy met gulden platen ouerdect heeft.

35

Hy heeft oeck een voerhancsel ghemaect van hemel blau ende purpur sijde, ende van roode sijde, ende van wit lijnen garen ghetwernt, nae die conste der borduerwerckers, een constich werck van verscheyden verwen,

36

ende vier colomnen van setim hout, die welck hy met haren capiteelen vergult heeft, ende haer basementen heeft hy van siluer ghegoten.

37

Hy heeft oeck een voerhancsel in den ingang des tabernakels ghemaect van blau ende purpur sijde, ende roode sijde, ende van wit fijn lijnen garen ghetwernt, met borduerwerck,

38

ende vijf columnen met haren capiteelen, welck hy met goude ouerdect heeft ende haer basementen heeft hy van metael ghegoten.