Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺ALs hy dan alle die menichte der kinderen van Israhel vergadert hadde, soe seyde hy tot hemlieden. Dit sijn die dinghen welc die Heere gheboden heeft te doen.

+ A

2

Ses daghen suldy v werck doen, maer den seuesten sal v lieden heylich wesen, eenen sabboth ende een ruste des Heeren, soe wie eenich werc op dien doet, dien salmen dooden.

3

Ghy en sult gheen vier ontsteken in allen uwe woonsteden opden sabboth dach.

4

Ende Moyses heeft gheseyt tot alle die vergaderinghe der kinderen van Israhel. Dit es dwoert dat die Heere beuolen heeft, seggende.

5

Scheyt wt by v seluen die ierste gauen voer den Heere. Alle die willich es ende metter herten daer toe geneycht, die sal dese den Heere offeren, gout ende siluer, ende metael,

6

blauwe ende purpur sijde, ende roode sijde die tweemael gheuerwet es, ende wit lijnen garen ghetwernt, gheyten hayr,

7

ende roode rams vellen, ende ianthinen, vellen setim houten

8

ende olie om die lampen te onderhouden ende om salue, ende seer sueten rueckoffer te maken,

9

onix steenen, ende costelijcke steenen tot cieraet vanden ouercleet der scouderen, ende van dat borstuck der redelijcheyt,

10

Soe wie onder v lieden wijs es, die come ende make tghene dat die Heere gheboden heeft,

11

⁺te weten het tabernakel ende zijn dack, ende die becleedinghe, die ringhen, ende die barders met haren rijchelen, die span naghelen, ende basementen,

+ B

12

Die arcke met haren hantboomen, der ghenaden stoel, ende dat voorhancsel dwelc daer voor ghespannen wort,

13

die tafel met haren hantboomen, ende haer ghereetscap, ende met die brooden der voorlegghinghen

14

Den candelaer om die lichten te onderhouden, sijn ghereetschap, met sijnen licht vaten, ende olie tot dat vuetsel des viers,

15

den outaer vanden rueckoffer, ende die hantboomen, ende die olie der saluinghen, ende den rueckoffer van specerien ghemaect, dat voerhancsel aen die dore des tabernakels,

16

den outaer des brantoffers, ende zijn metalen roostercken, met sijnen hantboomen ende ghereetschappen, dat wasch vat met sijnen basementen

17

die behancselen des voorhofs met die colomnen ende basementen, het voerhancsel in die doere des portaels

18

die spannaghelen des tabernakels ende des voerhofs, met haren coordekens.

19

Die cleederen diemen besighen moet tot den dienst van die heylichste plaetse, te weten Aaron des ouerste priesters ende sijnder sonen cleederen, dat sij my tpriesterschap bedienen.

20

⁺Ende alle die menichte der kinderen van Israhel es wtghegaen van Moyses aensicht,

+ C

21

ende hebben den Heere voergauen gheoffert, met een seer bereet ende devoot herte, om het werc van dat tabernakel des ghetuygenis te maken,

22

Al wat totten cieraet ende tot die heylighe cleederen van noode was, dat hebben die mans metten vrouwen ghegheuen armringhen, ende oorringhen, vingherringhen, ende vercieringhen vanden rechten arm, ende alderley gulden iuweelen sijn wtghescheyden tot des Heeren gauen.

23

Soe wie hadde gout, blau ende purpur sijde, ende roode sijde tweemael gheuerwet, wit lijnen garen, ende gheyten hayr roode ende blauwe rams vellen,

24

siluer, gout, ende eeren metael, dat hebben sij den Heere gheoffert, ende setimhout tot verscheyden orboor,

25

Maer die constighe vrouwen hebben oock gheoffert dwelck sij ghesponnen hadden blau purpur, ende roode sijde,, ende fijn wit lijnwaet,

26

ende gheyten hayr, gheuende dit al wt haren vrijen onbedwonghen wille.

[p. *107]

27

Maer die princen offerden onix steenen ende costelijcke ghesteente, tot dat ouercleet der scouderen, ende tot dat borstuck der redelijcheyt,

28

specerien, ende olie, om die lichten te bereyden, ende om die salfolie te bereyden, ende om te maken den ruecoffer vanden aldersuetsten ruec,

29

⁺Alle die mans ende vrouwen hebben met deuoter herten ghiften gheoffert, dat die wercken ghemaect souden worden, welck Godt gheboden hadde door Moyses hant. Alle die kinderen van Israhel hebben den Heere willighe gauen gheheylicht.

+ D

30

Ende Moyses heeft tot die kinderen van Israhel gheseyt. Siet die Heere heeft by name gheroepen Beseleel den soue van Uri Hurs sone wten gheslachte van Iuda,

31

ende hy heeft hem veruult metten gheest Gods met wijsheyt ende verstandicheyt ende wetenheyt,

32

ende alderley gheleertheyt om te bedencken ende te maken wercken van gout, ende siluer, ende metael,

33

ende om costelijc ghesteente te graueren, ende houtwerc te maken watmen constelijc versieren mach,

34

dat heeft hem die Heere in sijn herte ghegheuen, Ende daer toe Goliab Asisemechs sone van Dans gheslachte,

35

dese heeft hi beyde gheleert door wijsheyt dat sij connen maken souden versceyden wercken der timmerlieden tapijtwerckers ende borduerwerckers, van blau ende purpur sijde, ende van roode sijde tweemael gheuerwet, ende dat sij alle dinghen weuen, ende alderhande niewicheden vinden souden.