Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺ENde voerts houwet (seyt hy) voer v twee tafelen ghelijck die ierste, ende ick sal daer op scrijuen die woorden welck in dierste tafelen waren, die ghi ghebroken hebt,

+ A

2

Sijt morghen vroech bereedt, dat ghi ter stont gaen moecht opden berch Synai, ende ghi sult met mi staen opden tsop vanden berghe,

3

En laet niemant met v opwaerts gaen, noch en laet daer niemant ghesien wesen ouer alle den berch ende die scapen ende ossen en laet daer tseghen ouer niet weyden.

4

Hierom soe heeft Moyses twee steenen tafelen ghehouwen, ghelijc die ander te voren gheweest waren, Ende des nachts opstaende soe es hy gheclommen opden berch Synai, ghelijc hem die Heere beuolen hadde, draghende met hem twee tafelen,

5

Ende als die Heere door een wolcke nederghedaelt was soe stont Moyses aldaer met hem, aenroepende den naem des Heeren,

6

Ende als die Heere voer hem voerby ghinck, soe seyde hy. Heerschapie hebbende Heere Godt bermhertich, ende goedertieren, lijdsamich ende veel van ghenaden,

7

ende warachtich die bermherticheyt bewaert in veel dusenden, die de boosheyt misdaden, ende sonden afneemt, ende niemant en es bi hem seluen voor v onnoosel, Die der vaders onrechtuaerdicheyt betaelt haren kinderen ende kints kinderen, tot dat derde ende vierde geslachte,

8

Ende Moyses heeft hem haestelijc nedergheboocht ter eerden ende aenbiddende heeft gheseyt.

9

⁺Heere heb ick ghenade vonden voer v aenschijn, soe bidde ick v dat ghy met ons wandelt want dit een hartneckich volc es, En om dat ghi soudt afnemen onse onrechtuerdicheden ende onse sonden ende dat ghi ons soudt besitten.

+ B

10

Ende die Heere heeft gheantwoort. Ic sal een verbont maken dat een yeghelijc sien sal, ende ic sal teekenen doen, die noyt op eertijck ghesien en zijn, oft ooc bi gheen volc, op dat dit volc (daer ghi int midden sijt) mach sien, dat veruaerlijck werc des Heeren, dwelc ic doen sal.

11

Onderhoudt alle dese dinghen die ic v heden beuolen hebbe, Ick sal selue voor v aenschijn verdrijuen die Amorrheen, ende Chananeen, ende Hetheen, ende die Phereseen, ende die Heueen, ende Iebuseen,

12

Wacht v datghi nemmermeer vrintschap en maect met die inghesetenen van dien lande, welck v souden wesen tot eenen valle,

13

maer ghy sult haer outaren afworpen, haer beelden suldy breken, ende houdt af hen bosschagien.

14

En wilt gheenen vreemden Godt aenbidden, Die ialourse Heere es sijnen naem, ende Godt es een sterck liefheb-

[p. *106]

ber,

15

En maect gheen verbont met die menschen van dien landen, op dat iemant van hemlieden v by auontueren niet en noode om te eten van haren offeranden als sij onsuyuerheyt bedreuen hebben met haren Goden, ende haer beelden aenghebeden hebben.

16

Ghy en sult oec voer uwen sone gheen huysvrouwe nemen van haren dochteren, op dat sij v sonen oec niet en doen oncuysheyt bedrijuen met haren goden, als sij daer onsuyuerheyt mede bedreuen hebben.

17

⁺Ghy en sult gheen ghegoten goden voer v maken.

+ C

18

Ghy sult dat hoochtijt vanden onhedeesemden brooden onderhouden, Seuen daghen lanc suldy onghedeesemt broot eten, alsoe ick v beuolen hebbe ten tijde van die maent der nieuwer vruchten. Want in die maent vanden voersomer sijdy wt Egypten ghegaen.

19

Alle manlijcke gheboerte welck sijns moeders lichaem ierst opendoet, dat sal mijn wesen oock van allen uwen beesten soe wel vanden ossen als vanden scapen sal mijne wesen,

20

Dierste gheboerte van eenen ezel suldy met een scaep lossen, maer eest dat ghi daer gheenen prijs voer gheuen en wilt, soe salment dootslaen, Dierste gheboren van uwen sonen suldy lossen, ende ghi en sult voor mijn aenschijn niet ydel comen.

21

Ses daghen suldy wercken, ten seuensten daghe suldy ophouden van ackere ende van mayen.

22

Dat hoochtijt der weken suldi voer v houden in die vroeghe vruchten van uwen tarwen oochst, ende dat hoochtijt als nae dat verloop vanden iare alle vruchten opgheleyt worden.

23

Ten drij tijden vanden iare soe sal alle dat manlijc es onder v lieden, hem verthoonen voer dat aenschijn vanden almachtighen Heere den God van Israhel

24

Want als ick die heydenen sal verdreuen hebben wt uwen aenschijn, ende dat ic v palen sal verbreyt hebben, soe en sal niemant laghen legghen om v lant te crighen als ghi drijmael des iaers optrect, ende v vertoont voer dat aenschijn van uwen Heere Godt.

25

⁺Ghy en sult het bloet van mijnder offeranden niet offeren op ghedeesemt broot, noch daer en sal ooc niet ouerblijven van die offerande van paesschen tot smorghens toe.

+ D

26

Die voervruchten van ws lants vruchten suldy offeren in dat huys des Heeren ws Gods. Ghi en sult gheen ionck bocxken coken in sijns moeders melck.

27

Ende die Heere heeft tot Moysen gheseyt. Scrijft voer v dese woorden, doer die welcke ick een verbont gemaect hebbe met v ende met Israhel,

28

Dus soe heeft Moyses daer met den Heere gheweest veertich daghen ende veertich nachten, gheen broot en heeft hy gheten, ende gheen water ghedroncken, ende hy schreef in die tafelen die thien woorden des verbonts.

29

Ende als Moyses vanden berghe Sinai quam, soe hadde hy die twee tafelen des ghetuyghenis, ende hy en wist niet dat sijn aensicht gehornt was wt dat versamen van Gods woort.

30

Ende als Aaron ende die kinderen van Israhel saghen Moyses gehornt aensicht, soe ontsaghen sij hem nader te comen,

31

Ende als sij van hem gheroepen waren, soe zijn sij weder ghekeert, soe wel Aaron als die princen des synagogen. Ende als si tot hem ghesproken hadden,

32

soe quamen tot hem oeck alle die kinderen van Israhel, den welcken hi gheboden heeft alle dat hy vanden Heere ghehoort hadde opden berch Sinai.

33

Ende als hy sijn woerden voleynt hadde, soe leyde hy een decsel op sijn aensichte,

34

Welc decsel hy afnam als hy by den Heere binnen ghinck, ende met hem sprack, tot dat hy weder wt ghinck, ende dan sprack hy totten kinderen van Israhel alle dat hem beuolen was

35

die welcke saghen dat Moyses aensicht hornen hadde als hy wtquam, maer hy decte wederomme zijn aensicht, als hy tot hen sprack.