Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺ALs dat volck sach dat Moyses langhe vertrack vanden berch te comen, soe sijn si teghen Aaron vergadert ende hebben gheseyt. Staet op ende maect ons goden, die voor ons gaen moghen. Want wi en weten niet wat Moysi desen man die ons wt Egipten gheleyt heeft ghesciet es,

+ A

2

Ende Aaron heeft tot hen geseyt. Neemt die gulden oorringhen van uwer huysvrouwen, ende van uwer sonen ende dochteren ooren ende brengtse tot mi,

3

Ende het volck heeft ghedaen dat hy beuolen hadde, brenghende die oorringhen tot Aaron,

4

Ende als hi die ontfangen hadde, soe heeft hy die met ghegoten werck gheformeert, ende daer af ghemaect een ghegoten calf, Ende sij hebben gheseyt. Dit sijn v goden Israhel, die v gheleydt hebben wt dat landt van Egypten,

5

Ende als Aaron dit ghesien hadde, soe heeft hi daervoor eenen outaer ghemaect, ende hi heeft door die stemme van eenen wtroeper gheroepen segghende. ⁺Morghen eest die hoochfeeste des Heeren,

+ B

6

Ende sij sijn smorghens opgestaen, ende hebben gheoffert brantofferen, ende vreedofferanden, ende het volck es gheseten om teten ende te drincken, ende sij sijn opghestaen om te spelen,

7

Ende die Heere heeft tot Moyses gesproken segghende. Gaet ende daelt nederwaerts, want v volc dat ghi wt dat lant van Egipten gheleydt hebt, heeft ghesondicht.

8

Sij sijn seer vroech ghescheyden vanden wech die ghi hen ghetoont hebt, ende si hebben voor hen seluen een ghegoten calf ghemaect, ende dat hebben si aenbeden, ende hebben dien offeranden gheoffert ende gheseyt. Israhel dit zijn v goden die v wt dat lant van Egypten gheleyt hebben,

9

Ende die Heere heeft wederom tot Moysen gheseyt, ⁺Ic sie wel dat dit volck hartneckich es,

+ C

10

laet mi gheworden, dat mijnen torn sijn gramschap baren mach teghen henlieden, ende dat icse vernielen mach, ende ic sal v maken ouer een groot volck,

11

Maer Moyses badt den Heere sijnen Godt segghende. Heere waerom es uwen torn gram tseghen v volck, welck ghi wt dat lant van Egypten gheleyt hebt, met grooter stercheyt ende met een machtighe hant?

12

Ic bid v en laet die Egyptenaren niet segghen, listelijck heeft hijse wtgheleyt, om dat hijse int gheberchte doorslaen soude, ende alsoe vander eerden vernielen soude. Laet v gramscap rusten ende weest versoenlijc ouer die boosheyt ws volcs,

13

Denct op Abraham Isaac, ende Israhel uwe dienaeren, den welcken ghi hebt ghesworen, by v seluen segghende. Ic sal v saet vermenichfuldighen als die sterren des hemels, ende alle dit lant daer ick af ghesproken hebbe, sal ick uwen sade gheuen, ende ghi sult dat eewelijc besitten.

14

⁺Ende die Heere es te vreden gheworden, dat hi dat quaet niet doen en soude, dwelc hi tseghen zijn volc ghesproken hadde.

+ D

15

Ende Moyses es wedercomen vanden berch draghende twee tafelen des ghetuygenis in sijn hant op beyde sijden beschreuen,

16

ende ghemaect doer des Heeren werc, Ende Godts scrift was in die tafelen ghescreven.

17

Maer Iosue hoorende tgheruchte vanden crijsschenden volcke, soe seyde hi tot Moyses. Men hoort inden legher ghecrijsch van strijde,

18

Die welcke heeft gheantwoert. Ten es gheen gheroep den gheender die strijde verwecken, noch ten es gheenen roep der gheender die ter vlucht drijuen, maer ic hoore een stemme der singhender luyden,

19

Ende als hy by den legher comen was, soe sach hy dat calf ende die danserien, ende seer ghestoort sijnde heeft hy die tafelen wt sijnder hant gheworpen, ende die ghebroken beneden aent onderste vanden berch.

20

⁺Ende hy grijpende het calf welck sij ghemaect hadden, heeft dat verbrant ende tsamen ghebroken te puluer, dwelck hi int water stroyde, ende gaf den kinderen van Israhel daer af te drincken.

+ E

21

Ende hi heeft tot Aaron gheseyt. Wat heeft dit volck v ghedaen, dat ghi dese alder grootste sonde op hen hebt ghebrocht?

22

Ende hi antwoorde hem. Mijn Heere en verberghe hem niet, want ghi kent dit volc wel dat tot quaet gheneycht es,

23

si hebben tot mi gheseyt. Maect ons goden die voor ons gaen moghen, Want wi en weten niet wat dat desen Moyses ghesciet es, die ons wt Egypten gheleyt heeft.

24

Ende ic seyde tot hen. Wie esser van v lieden die gout heeft? Sij hebbent bracht ende my ghegheuen, ende ick heb dat int vier gheworpen, ende daer es dit calf wt comen.

25

Ende Moyses siende dat het volc bloot ghemaect was ⁺(want Aaron haddese berooft om die schandelijcheyt der smetten, ende onder haer vianden bloot ghestelt)

+ F

26

soe heeft hy gheseyt staende in die poorte des leghers. Soe wie den Heere toebehoort die voeghe hem tot my, Ende alle die kinderen van Leui sijn bi hem vergadert, totten welcken hi seyde.

27

Dit seyt die Heere God van Israhel. Elck neem sijn swaert op sijn dgye gaet ende coemt wederomme vander eender poorten totter ander poorten, doert midden vanden legher ende een yeghelijck slae doot sijnen broeder, ende vrint ende sijnen naesten.

28

Ende die kinderen van Leui hebben ghedaen nae Moyses woorden, ende op dien dach worden verslaghen omtrent drijentwintich dusent menschen,

29

Ende Moyses seyde. Ghi hebt heden v handen den Heere gheheylicht, een yeghelijc aen sijnen sone ende aen sijnen broeder, soe dat v die benedictie ghegheven sal worden.

30

Ende als den anderen dach comen was, soe heeft Moyses totten volck gheseyt. Ghy hebt een die alder swaerste sonde ghesondicht. ⁺Ick sal totten Heere climmen, oft ick hem eenichsins soude moghen verbidden voor v boos quaet.

+ G

31

Ende als Moyses weder by den Heere comen was, soe heeft hy gheseyt. Ic bidde v, dit volck heeft een alder grootste sonde ghedaen, ende sij hebben voor hen gulden goden ghemaect,

32

vergheeft hen dese misdaet, oft en doedy dat niet, soe vaecht my wt uwen boec die ghi ghescreuen hebt,

33

Den welcken heeft die Heere geantwoort. Sie wie tseghen mi sondicht, dien sal ick wt mijnen boec vaghen.

34

Maer gaet henen ghy, ende leydt dit volck daer ick v gheseyt hebbe, mijn enghel sal voor v gaen, Maer ick sal dese haer sonden versoecken in den dach der wraken.

35

Daerom heeft die Heere het volck gheslaghen, voer dat misdaet des calfs welck Aaron ghemaect hadde.