Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

⁺ENde die Heere heeft tot Moysen ghesproken, segghende.

+ A

2

Siet ick heb namelijck gheroepen Beseleel die sone van Uri, Hurs sone, Wt dat gheslachte van Iuda,

3

ende ick heb hem veruult metten gheest Godts, ende met wijsheyt, verstandicheyt ende kennisse in alderhande werck,

4

om te verdincken alle dinghen diemen constelijck maken mach, van goude, siluer, metale,

5

marmor, ende costelijcke ghesteente, ende van verscheyden manieren van houte,

6

Ende ick heb hem tot eenen gheselle ghegheuen Goliab Asisamechs sone wten geslachte Dan Ende ick heb int herte van alle den wijsen menschen ghestelt wijsheyt, om te moghen maken alle die dinghen die ick v beuolen hebbe,

7

dat tabernakel des verbonts, ende die arcke des testaments, ende der ghenaden stoel die bouen haer es, ende alle die vaten des tabernakels,

8

ende die tafel met haer ghereetschappen ⁺den alder puersten candelaer met sijnen ghereetscappen,

+ B

9

ende den outaer der welriekender offeranden, ende des brantoffers ende alle haer ghereetschappen dat waschvat met sijnen basemente,

10

die heylighe cleederen ten dienste van Aaron den priester ende sijn sonen, om daer mede haer officie te bedienen in die heylighen plaetsen,

11

die olie der saluinghen, ende den welriekenden offer van costelijcke specerie ghemaect, in dalder heylichste plaetse. Alle dese dinghen die ick v beuolen hebbe, sullen sij maken.

12

⁺Ende die Heere heeft tot Moysen ghesproken, segghende.

+ C

13

Spreect tot die kinderen van Israhel, ende ghi sult hen segghen. Siet dat ghy mijnen sabboth onderhout, Want het es een teeken tusschen v ende my, onder v gheslachten, op dat ghy weten moecht dat ick die Heere ben die v heylich make.

14

Onderhoudt mijnen sabboth, want hy es heylich voer v lieden, soe wie dat dien besmet, sal die doot steruen soe wie op dien eenich werck doet, diens ziele sal vergaen wt het midden van sijnen volcke.

15

⁺Ses daghen suldy wercken, op den seuensten dach soe eest den sabboth een heylighe ruste den Heere. Alle die eenich werck doet op desen dach die sal steruen,

+ D

16

Die kinderen van Israhel sullen den sabboth onderhouden, ende dien vieren in haren gheslachten.

17

Het es een eewich verbont tusschen my ende die kinderen van israhel, ende een eewich teeken, want die Heere maecte hemel ende eerde op die ses daghen, ende opden seuentsten dach soe hiel hy op van wercken.

[p. *104]

18

Ende als dese woorden voleynt waren, soe heeft die Heere Moysi ghegheuen twee steenen tafelen des ghetuyghenis ghescreuen met Gods vingher.