Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

1

⁺GGy sult oock eenen outaer maken om rueckwerck daer op te ontsteken van setim hout

+ A

2

eenen cubitus lanck ende eenen breedt, dat es viercantich ende twee cubitus hooghe. Daer sullen hornen wt dien comen,

3

ende ghi sult dien outaer becleeden met den aldersuyuersten gouden, soe wel sijn roosterken, als zijn wanden int omghaen, ende zijn hornen, ende ghy sult aen dien oock een cleyn gouden croonken maken rontsomme,

4

ende twee gulden ringhen onder die croone op elcke sijde, op datmen daer hantboomen in steken mach, ende den outaer alsoe draghen,

5

Ende die seue hantboomen suldy van se-[afbeelding]tim hout maken, ende ghi sult die vergulden.

6

Ende ghi sult den outaer stellen tseghen dat voorhancsel welck daer hangt voer die arcke des ghetuyghenisse ende voor der ghenaden stoel, daer het ghetuyghenisse mede ghedect wort, daer ick v toespreken sal.

7

Ende Aaron sal op dien outaer rueck offerande ontsteken sueten rueck gheuende des morghens.

8

Als hy die lampen bereydt, soe sal hy dat ontsteken, ende tsauonts als hi die stelt, dan sal hi den rueck offer ontsteken voor den Heere in uwen gheslachten.

9

Ghi en sult op dien outaer gheen reucwerck offeren op eenighe andere maniere ghemaect, noch gheenen anderen offer, noch spijsoffer noch dranc offer en suldy daer op storten,

10

⁺Ende Aaron sal eens tsiaers op die hornen des outaers bidden int bloet datter voor die sonde gheoffert is, ende hi sal daer op ghenade verweruen in uwen gheslachten, dien outaer sal dat heylich der heylighen zijn voor den Heere.

+ B

11

Ende die Heere heeft tot Moysen ghesproken segghende.

12

Als ghy die somme der kinderen van Israhel by ghetale sult ghenomen hebben, soe sullen sij elck den Heere eenen prijs gheuen voor hen zielen, ende dan en salder gheen plaghe onder hen wesen, als sij ghetelt sijn.

13

Ende dit sal een yeghelijck gheuen die te name coemt, eenen haluen siclus nae des tempels mate, Eenen siclus heeft twintich hellinghen, Die helicht van eenen siclus salmen den Heere offeren,

14

Die in tghetal ghehouden wordt, te weten van twintich iaren ende daer ouer die sal desen prijs gheuen,

15

Die rijcke en sal niet meer gheuen dan eenen haluen siclus, ende die arme en sal niet min gheuen, Ende als ghi dit ghelt vanden kinderen van Israhel gheoffert, sult ontfanghen hebben

16

soe suldy dat ouergheuen totten behoeue van dat tabernakel des ghetuyghenis, dat dit mach wesen haerlieder ghedenckenisse voor den Heere, ende dat hy haerder zielen ghenadich mach wesen.

17

Ende die Heere heeft tot Moyses ghesproken segghende.

18

Ghi sult oock een metalen waschvat maken

[p. *103]

[afbeelding] met sijnen basemente, om te wasschen, ende ghi sult dat stellen tusschen dat tabernakel des ghetuyghenis ende den outaer, Ende als daer water in ghedaen es,

19

soe sullen Aaron ende sijn sonen daer in wasschen hen handen ende voeten

20

als sij ghaen sullen in dat tabernakel des ghetuyghenis, ende als sij ten outaer ghaen sullen, om daer op rueckwerck den Heere te offeren,

21

dat sij by auontueren niet en steruen dit sal een eewighe wet sijn voor hem ende sijnen sade in toecomende tijden.

22

Ende die Heere heeft tot Moysen ghesproken, segghende.

23

Neemt by v costelijcke specerien, te weten vijf hindert siclen, van die beste wtghelesen myrre, ende half soe veel caneels, des es twee hondert ende vijftich siclen, desghelijcks oock twee hondert ende vijftich siclen calmos,

24

ende vijf hondert siclen cassien nae tghewicht der alder heylichster plaetsen, Ende een mate hin olie van olijfboomen.

25

Ende ghi sult maken die heylighe olie der wijdinghen, een heylighe salue ghemenghet nae die conste eens apotekers,

26

ende ghi sult daer mede saluen dat tabernakel des ghetuynisse, ende die arcke des testaments,

27

ende die tafel met haer ghereetschap, den candelaer met sijnen ghereescappen, die outaren vanden rueckoffer,

28

ende vanden brantoffer, ende alle die ghereetschappen die tot haren dienst behooren,

29

endi ghi sult dit alle heylich maken, ende soe sullen die wesen heylich der heylighen soe wie dat dese dinghen aentast, die sal gheheylicht worden.

30

Aaron met sijnen sonen suldy saluen, ende heylich maken, op dat sij my int priesterscap dienen moghen.

31

⁺Ende den kinderen van Israhel suldy oock segghen. Dese olie sal heylich ghehouden worden voer mi, onder uwe gheslachten.

+ D

32

Gheen vleesch van menschen en sal daer mede ghesalft worden, ende ghi en sult gheen ander salue maken nae dit maecsel. Want dese es gheheylicht, ende ghi sult die altijt voor heylich houden.

33

Soe wat mensch sulcke salue maect, ende daer af eenen vreemden gheeft, die sal verdreuen worden van sijnen volcke.

34

Ende die Heere seyde tot Moyses. Neemt by v costelijcke specerien, te weten, stacten, ende onicha, galbanum van goeden rueck, ende vanden claersten wieroock, ende dese sullen alle van eenen ghewichte wesen,

35

ende ghi sult een rueckwerck daer af maken, nae die conste van eenen apothecaris, neerstelijck ghemenghet ende ghesuyuert, ende seer weerdich om heylich ghemaect te worden.

36

Ende als ghi alle dese dinghen tsamen sult ghestooten hebben tot een seer cleyn poeyer, soe suldy daer af stellen voor dat tabernakel des ghetuyghenis, Daer ick v openbaren sal, ende dit rueckwerck suldy houden voor een heylich der heylighen,

37

Sulcken maecksel en suldy niet maken, om voor v seluen dat te ghebruycken, want het es gheheylicht den Heere.

38

Soe wat mensche des ghelijcs maken sal, om den ruec van dien te ghebruycken, die sal vergaen van sijnen volcke.