Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺MAer ghi sult dit oec doen op dat si my moghen in dat priesterscap ghewijt worden. Neemt een calf wten runderen, ende twee onbesmette rammen,

+ A

2

ende onghedeesemde brooden, ende een corstcoecsken sonder deesem dat met olie ghemenghet sij ende vladen met olie bestreken, Van terwen bloeme suldyt al maken,

3

ende ghi sultse offeren gheleyt in eenen corf,

4

maer dat calf ende die twee rammen ende Aaron met sijnen sonen suldi brenghen aen die doere van dat tabernakel des ghetuygenisse, Ende als ghi den vader met sijnen sonen sult ghewasschen hebben met water

5

dan suldy Aaron cleeden met sijnen cleederen, te weten, den lijnen rock ende den anderen rock, ende dat ouercleedt der scouderen, ende dat vorstuck der redelijcheyt, dwelck ghi tsamen binden sult met den gordel,

6

ende ghi sult den mijter op zijn hooft setten ende die heylighe plate opden mijter,

7

Ende ghy sult op zijn hooft ghieten die olie der saluinghen,, ende in deser wijsen sal hy ghewijt worden.

8

Sijn sonen suldy oeck hier toe voeghen ende die cleeden met lijnen rocken,

9

ende ghy sultse om gorden met eenen gordel, te weten Aaron ende zijn kinderen, ende ghy sult hen mijters opt hooft stellen, ende sij sullen mijn priesters wesen tot eewighen Gods dienst.

10

⁺Ende als ghi hen handen ghewijt hebt, soe suldi dat calf oec aenbrenghen voer dat tabernakel des ghetuyghenis, Ende Aaron met sijnen sonen sullen haer handen opt hooft van dat calf legghen,

+ B

11

ende ghy sult dat dootslaen voor daenschijn des Heeren, bi die doere van dat tabernakel des ghetuyghenis,

12

Ende ghi sult nemen van des calfs bloet, ende dat met uwen vingher strijken aen die hornen des outaers. Maer alle dat ander bloet suldy beneden aen den voet des outaers ghieten.

13

Ghi sult oec nemen alle dat vet, welc het inghewant bedect, ende dat netteken vander leueren, ende beyde die nieren, metten vette dat daer ouer es, ende ghi sult dat offeren tot eenen brantoffer opden outaer,

14

maer het calfsvleesch ende tvel metten meste suldy buyten den legher verbernen, om dat voer die sonde es.

15

Ghi sult oeck eenen ram nemen, op wiens hooft sullen Aaron ende sijn sonen haer handen legghen.

16

⁺Ende als ghi dien dootgheslaghen hebt, soe suldy nemen van sijnen bloede, ende ghieten dat omtrent den outaer,

+ C

17

maer den ram suldy in stucken snijden, ende ghi sult zijn inghewant ghewasscen metten voeten legghen op dat ghesneden vleesch, ende opt hooft vanden ram,

18

ende soe suldy dien ram gheheel tot eenen brantoffer opden outaer offeren, Dits den Heere een offerande, ende eenen aldersuetsten rueck van des Heeren slachofferande.

19

Ghi sult oeck eenen anderen ram nemen, op wiens hooft sullen Aaron ende zijn sonen haer handen legghen,

20

ende als ghi dien dootgheslagen hebt, soe suldy van sijnen bloede nemen, ende strijcken dat aen dat tsoppeken der rechter ooren van Aaron ende sijnder sonen, ende aen die duymen van hen rechte hant, ende den grootsten teen van henlieden rechten voet, ende ghi sult dat bloet opden outaer storten int ronde,

21

Ende als ghi sult van dien bloede ghenomen hebben welc opden outaer es, ende vander olien der saluinghen, soe sult ghi daer mede besprayen Aaron ende zijn cleederen zijn sonen oeck ende haer cleederen,

22

⁺Ende als ghi hen ende haer cleederen sult gheheylicht hebben, soe suldy het vet vanden ram nemen, ende den steert, ende het vet welc dat inghewant bedect, ende het netteken der leueren, ende die twee nieren metten vette dat daer ouer es, ende die rechte scoudere, om dattet eenen ram der wijdinghe es,

+ D

23

ende eenen wronghel broots, een corstken met olie beslaghen, ende een vlade wt den corf vanden ongheheefden broode dwelc in die teghenwoordicheyt des Heeren es ghestelt.

24

Ende ghi sult dese al te samen op Aarons ende sijnder sonen handen stellen, ende ghi sultse heylichmaken opheffende voer den Heere.

25

Ende ghi sult alle dese dinghen van haren handen nemen, ende ontsteken die opden outaer, tot eenen brantoffer, eenen seer sueten rueck voor daenscijn des Heeren, om dat zijn offerande es.

26

Ghi sult oeck nemen dat borstken vanden ram, daer Aaron mede ghewijt es, ende ghi sult dat oeck heylichmaken, heffende dat voor den Heere, ende dat sal hem te deele comen.

27

⁺Ende ghi sult heylichmaken dat ghewijde borstken ende die scoudere die ghy vanden ram ghenomen hebt, daer Aaron met sinen sonen mede ghewijt es,

+ E

28

ende dese sullen Aaron ende sijnen kinderen voer haer deel hebben, met een eewich recht vanden kinderen van Israhel, Want het sijn die voerganen ende die beghinselen van haren vreedtsamighe offeranden die sij den Heere offeren.

29

Maer het heylich cleedt dwelc Aaron ghebruycken sal, sullen zijn kinderen nae hem hebben, dat sij daer in moghen ghesalft worden, ende dat hen handen moghen ghewijt worden,

30

Ende soe wie van sijnen

[p. *102]

kinderen in zijn plaetse ouerste priester ghemaeckt wordt, die sal dit cleedt seuen daghen ghebruycken, die welck sal ghaen int tabernakel des ghetuyghenisse, om te dienen in de heylichste plaetse,

31

Maer den ram der wijdinghen suldy nemen, ende ghy sult sijn vleesch coken op die heylighe plaetse,

32

dwelck Aaron ende sijn kinderen eten sullen, Ende die brooden die inden corf sijn, sullen sij eten int portael van dat tabernakel des ghetuyghenis,

33

om dat mach een versoenende offerande wesen, ende dat die handen der gheender diet offeren moghen gheheylicht worden. ⁺Gheen vreemdelinck en sal daer af eten, want si sijn heylich,

+ F

34

Ende eest sake datter vanden gheheylighden vleesche oft broode ouerblijuen tot tsanderdaechs smorghens, soe suldy die bleuelinghen int vier verbernen, men sal die niet eten, want sij sijn gheheylicht.

35

Alle dat ick v beuolen hebbe suldy doen, ouer Aaron ende sijn kinderen, Seuen daghen lanck suldy hen handen wijden,

36

ende ghy sult een calf voor die sonde offeren, telcken daghe, om te suyueren, Ende ghy sult den outaer suyuer maken, als ghi die offerande der suyueringhen ghedoot hebt, ende ghi sult dien outaer oock saluen tot eender heylichmakinghen.

37

Seuen daghen suldy den outaer suyueren ende heylich maken, ende die sal wesen heylich der heylighen, ende alle die dien aentast sal gheheylicht worden.

38

Dit es tghene dat ghy opden outaer doen sult, Twee eeniarige lammeren, suldy telcken daghe eewelijck offeren,

39

dat een lam smorghens, ende dat ander tsauonts,

40

een thiende deel terwen bloeme met ghestooten olie beslaghen, welck houde het vierde deel van een hin, ende wijn om te offeren nader seluer maten suldy doen tot eenen lamme

41

Ende dat ander lam suldy tsauonts offeren, nae die maniere der morghenstonts offerande, ende nae dat wij gheseyt hebben, tot eenen rueck der sueticheyt,

42

⁺Dit is den Heere een sacrificie tot een eewighe offerande in uwe gheslachten, aen die doere van dat tabernakel des ghetuyghenisse voor den Heere, daer sal ick ordineren om v aen te spreken,

+ G

43

Ende aldaer sal ick den kinderen van Israhel ghebieden, ende dien outaer sal gheheylicht worden tot mijn glorie,

44

Ick sal oock heylichmaken dat tabernakel des testaments, metten outaer, ende Aaron met sijnen sonen dat sij my moghen in dat priesterscap dienen,

45

Ende ick sal int midden der kinderen van Israhel wonen, ende ick sal hen Godt sijn,

46

ende sij sullen weten dat ick ben die Heere hen Godt, die hen gheleydt hebbe wt dat landt van Egypten, dat ick onder hemlieden blijuen soude, ick die Heere, hen Godt.