Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺NEemt tot v oock Aaron uwen broeder met sijnen sonen, wt dat midden der kinderen van Israhel, dat sij in het priesterscap voer my bedienen, Aaron, Nadab, ende Abiu, Eleazar, ende Ithamar,

+ A

2

Ende ghi sult een heylich cleet maken voor Aaron uwen broeder ter glorien ende cierlijcheyt,

3

Ende ghi sult spreken tot alle die ghene die wys van herten zijn, die welcke ick veruult hebbe metten gheest der voersienicheyt, dat sij die cleederen maken voer Aaron, in die welcke hi gheheylicht sijnde mi diene,

4

Ende dit sullen die cleederen sijn die sij maken sullen, een borstuck der redelijcheyt, een cleet ouer die scouderen, eenen rock, ende een enghe lijnen cleet, eenen miter, ende een gordel, Sij sullen die heylighe cleederen maken voer uwen broeder Aaron, ende sijn sonen, dat sij tpriesterscap voor mi bedienen,

5

Ende sij sullen nemen gout, ende hemel blau, ende purpur sijde, ende roode sijde tweemael gheuerwet, ende fijn wit lijnwaet.

6

Ende sij sullen dat cleet ouer die scouderen maken, van gouden draet, ende van hemelblau, ende purpur sijde, ende van roode sijde tweemael geuerwet, ende van wit ghetwernt lijnen garen, met borduerwerc,

7

⁺Het sal twee lijsten hebben tsamen gheuoecht aen beyde sijden van die eynden, dat die te samen comen moghen,

+ B

8

Ende dat selue maecsel, ende alle die verscheydenheyt des wercks sal sijn van goude, ende van hemel blau ende purpur sijde, ende van roode sijde tweemael geuerwet ende wit lijnen garen ghetwernt met borduerwerck,

9

Ende ghi sult nemen twee onicx steenen, ende daer in graueren die namen der kinderen van Israhel,

10

ses namen inden eenen steen, ende die ander ses inden anderen steen nae tveruolch van hen geboerte,

11

met eens steensnijders werck, ende nae dye graueringe vanden bereyders der costelijcker steenen, suldy die steenen doen snijden met die namen der kinderen van Israhel, besloten ende alom beleyt met gout,

12

ende ghi sult die stellen op beyde die sijden vant ouer cleet der scouderen tot een ghedenckenisse der kinderen van Israhel, Ende Aaron sal hen namen draghen voor den Heere, op beyde zijn scouderen ter ghedenckenissen,

13

Ghi sult oec maken haecskens van goude,

14

ende twee ketenkens vanden alder puersten goude, aen malcanderen hangende die welcke ghi steken sult in die haecskens,

15

⁺ghi sult dat borstuck der redelijcheyt ende des ordeels maken met borduerwerck, ghelijc dat maecsel van dat cleet der scouderen van goudraet, hemelblau, ende purpur sijde, ende roode sijde tweemael gheuerwet, ende van wit lijnen garen ghetwernt,

+ C

16

Viercantich salt sijn, ende dobbel, hebbende die mate van een palme, soe wel in die leingde als in de breydde,

17

Ende ghi sult daer in stellen vier ryen costelijcker steenen, in die eerste rye sal wesen den steen, sardix, ende topasius, ende smaragdus,

18

In die ander rye eenen carbunckel steen, eenen saphier, ende iaspis,

19

In die derde, ligurius, achates, ende amethistus,

20

In die vierde chrysolitus, onychinus, ende berillus, dese sullen int gout besloten wesen nae haer veruolghinghen.

21

Ende sij sullen hebben die namen der kinderen van Israhel, Met twaelf namen sullen sij inghesneden worden, elcken steen met eenen besonderen naem nae haer twaelf gheslachten.

22

⁺Ende ghi sult in dat borstuc des redelijcheyts ketenen maken aen malcanderen ghehecht, vanden alder puersten goude,

+ D

23

ende twee gulden ringhen, die ghi stellen sult aen beyde die opperste lijsten des borstucks,

24

ende ghi sult die gouden ketenen aen dye ringhen vast maken, die aen zijn lijsten sijn,

25

ende die eynden van dien ketenen suldi met twee haken aen een maken, in beyde die sijden des ouercleets der scouderen, dwelc es teghen ouer van dat borstuck der redelijcheyt.

26

Ende ghi sult oock twee gulden ringhen maken, die welcke ghi vast maken sult aen die ouerste hoecken van dat borstuck der redelijcheyt aen die lijsten die daer teghen ouer zijn des ouercleets vanden scouderen, ende teghen sijn achterste zijn,

27

ende noch twee ander gulden ringhen, die ghestelt moeten worden aen beyde die sijden van dat ouercleet der scouderen beneden, dwelc coemt tseghen dat onderste hechtsel op dat mach geuoecht worden met den ouercleedt der scouderen,

28

Ende dat het borstuc der redelijcheyt met sijnen ringhen aen die ringhen van dat ouercleet der scouderen tsamen mach vast ghemaect worden, met eenen blauwen linte, op dat het costelijc hechtsel aen een blijuen mach, ende dat het borstuck der redelijcheyt ende het ouercleet der scouderen, van een niet scheyden en moghen.

29

⁺Ende Aaron sal die namen der kinderen van Israhel draghen in dat borstuck der redelijcheyt ende des ordeels, op zijn borst als hy in die heylichste plaetse gaen sal, tot een ghedenckenisse, voer den Heere inder eewicheyt.

+ E

30

Ende in dat borstuck der redelijcheyt ende ordeels, suldy setten leeringe ende warachticheyt die welcke sullen zijn in Aarons borst, als hy voor den Heere gaen sal, ende hi sal het ordeel der kinderen van Israhel in zijn borst voor daenschijn des Heeren altijd draghen.

31

Ende ghi sult maken eenen rock van dat ouercleet der scouderen, gheheel van hemelblau sijde,

32

ende bouen aen sijn midden sal wesen een hooftslippe, ende eenen ghebreyden boort daer rontsomme, ghelijcmen pleech te maken aen die wterste eynden der cleederen, dat niet lichtelijc vaneen en berste,

33

⁺Maer beneden aen die voeten desselfs lijfroc, suldy maken int ronde ghelijck granaet appelen, van sijde hemelblau, purpur,

+ F

[p. *101]

ende roode sijde, tweemael gheuerwet tusschen beyde onderschoten met bellen,

34

te weten alsoe dat een gulden belle sal wesen, ende eenen granaet appel, ende dan weder een ander gulden belle, ende eenen granaet appel,

35

Ende Aaron sal daer mede ghecleedt wesen int bedienen vander sijnder officien, op datmen dat gheluyt mach hooren, als hi in oft wt die heylighe plaetse gaet voor daenscijn des Heeren, ende dat hy niet en sterue.

36

Ghi sult oeck een plate maken vanden alder puersten goude, daer ghi in graueren sult doer dwerc van eenen graueerder, het heylich den Heere,

37

Ende ghy sult die plate binden met een hemel blau sijden lint, ende sal wesen opden mijter recht voert voerhooft des ouerste bisscops.

38

Ende Aaron sal hen boosheyt draghen, welc die kinderen van Israhel gheoffert ende heylich ghemaect hebben, in allen hen offeranden ende ghiften, Ende die plate sal altijt aen zijn voerhooft wesen, op dat die Heere hen ghenadich wesen mach.

39

⁺Ende ghy sult den lijfrock toebinden met eenen witten fijnen lijnen bant. Ende ghi sult oec eenen mijter van wit lijnwaet maken, ende eenen riem, nae die conste des borduerwerckers,

+ G

40

Voerts suldy Aarons kinderen maken, lijnen rocken, ende gordelen, ende mijters ter glorien ende tot vercieringhen.

41

Ende met alle desen suldy Aaron uwen broeder ende zijn sonen met hem cleeden. Ende ghi sult die handen van hen allen wijen, ende ghi sultse heylich maken, op dat sij my int priesterscap dienen moghen.

42

Ghi sult oec lijnen broecken maken, op dat si het vleesch haerder scamelheyt moghe bedecken, vanden lendenen totten dgyen toe,

43

ende Aaron ende sijn sonen sullen dese ghebruycken, als sij gaen sullen in dat tabernakel des ghetuychnis, oft wanneer si omtrent den outaer comen, om te dienen in die heylighe plaetse, op dat sij niet en steruen door schult der boosheyt. Dit sal een eewighe wet wesen voer Aaron, ende sinen sade nae hem.