Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺GHy sult oec eenen outaer maken van setim hout die welke sal hebben vijf cubitus in die lengde, ende soe veel in die breydde dat es viercantich, ende drij cubitus in die hoochde,

+ A

2

Ende hornen sullen aen die vier hoecken wt den seluen wesen, ende ghi sult dien met metale bedecken.

3

Ende ghi sult tot sijnen ghebruyc maken coperen potten, om die asschen te ontfanghen, ende tanghen, ende crauwelkens, ende vierpannen, Alle die ghereetscappe suldy van metael maken,

4

Ende ghy sult oeck maken een metalen roosterken op een manier van een nette, aen wiens vier hoecken sullen vier metalen ringhen wesen,

5

die welcke ghi stellen sult onder dat vloerken vanden outaer, ende dat roosterken sal reycken tot dat midden des outaers.

6

Ende ghi sult des outaers twee hantboomen maken van setim hout dye ghy oeck bedecken sult met metalen platen,

7

ende die steken in die ringhen, ende sij sullen aen beyde die sijden zijn om te draghen.

8

⁺Niet dichte maer ydel ende hol suldy dien outaer van binnen maken, ghelijc v opden berch ghetoont es.

+ B

9

Ghi sult ooc een voerhof des tabernakels maken in welcs suytsijde teghen den middach sullen wtghe-[afbeelding]spannen voerhancels wesen van wit ghetwernt garen ghemaect, hondert cubitus sal dye een sijde hebben in die lengde,

10

Ende twintich colomnen, met soe veel metalen basementen, dye welcke sullen hebben silueren capiteelen, met haren ghesneden wercken,

11

desghelijcs oeck aen die noortsijde in dye lingde sullen sijn voorhancselen van hondert cubitus, twintich colomnen ende alsoe vele metalen basementen, ende hen silueren capiteelen met haren ghesneden wercken.

12

Maer in die breydde des voorhofs, welck westwaerts siet, sullen voorhancsels sijn, houdende vijftich cubitus, ende thien colomnen ende soe veel basementen.

13

⁺Ende aen die breydde des voerhofs dye oostwaerts siet, sullen vijftich cubitus sijn.

+ C

14

Van den welcken voerhancsels van vijfthien cubitus der eender sijden toegheschict worden, ende drij colomnen, met soe veel basementen,

15

ende op die ander sijde, sullen voerhancsels zijn houdende oeck vijfthien cubitus, drij colomnen ende soe veel basementen,

16

Maer inden inganck des voorhofs sal ghemaect worden een voerhancsel van twintich cubitus, van hemels blau side, ende purpur side ende roode sijde tweemael gheuerwet, ende van wit ghetwernt lijnen garen, met borduerwerck, ende tsal hebben vier colomnen met soe veel basementen,

17

Alle dye colomnen des voerhofs rontsomme sullen becleedt wesen met silueren platen, silueren capiteelen, ende metalen basementen,

18

In die lingde sal dat voerhof hebben hondert cubitus in die breydde vijftich, die hoochde sal van vijf cubitus zijn, ende tsal ghemaect worden van wit ghetwernt lijnen garen, ende tsal hebben metalen basementen,

19

Alle die ghereetscappen des tabernakels tot alle sijn behoefte ende ceremonien soe wel zijn span naghelen als des voerhofs, suldi van metael maken.

20

Ghebiedt den kinderen van Israhel, dat sij v olie brenghen van olijfboomen van dalder suyuerste, ende metten stamper ghestooten dat den lichter altijt mach bernen in dat tabernakel des ghetuychenis,

21

buyten dat voerhancsel datter ghespannen es voert ghetuychenis, Ende Aaron met sijnen sonen sullen dien stel-

[p. *100]

len dat die tot smorghens toe mach lichten voer den Heere, Dit sal eenen eewigen Godsdienst wesen by haren veruolgingen voor die kinderen van Israhel.

[afbeelding]