Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺MAer het tabernakel suldi aldus maken. Ghi sult maken thien gordijnen van wit ghetweernt linen garen, ende van blau ende roode sijde, ende van roode sijde die tweemael gheuerwet es, ghescakiert met borduerwerck,

+ A

2

Die lengde van eender gordijnen sal hebben achtentwintich cubitus, ende die breede sal van vier cubitus wesen, ende alle die gordijnen sullen van eender maten wesen,

3

Vijf gordijnen sullen aen

[p. *98]

malcanderen ghehecht worden, ende die ander vijue sullen met ghelijcker vueghingen aen malcanderen ghehecht zijn,

4

Ende ghi sult oeck litskens van blauwer sijden aen die sijden ende oppersten der gordijnen datmen die tsamen aen een sal moghen vueghen.

5

Vijftich litskens sal elck gordijn hebben aen beyde die sijden, alsoe aenghemaect, dat die eene litse aen dander litse come, ende dat deen aen dander moghen ghehecht worden.

6

⁺Ghy sult ooc vijftich gouden ringen maken, daer mede dat die gordijn decsels aen een gheuoecht sullen worden, alsoe dat, dat een tabernakel worden mach.

+ B

7

Ghy sult oeck elf hayren cleederen maken, om het dack van dat tabernakel mede te decken,

8

Die lengde van een hayren cleet sal hebben dertich cubitus, ende die breydde vier, ende alle dye hayren cleederen sullen van ghelijcker maten sijn.

9

Daer af ghi die vijue sult aen malcanderen voeghen op deen side, ende die ses, suldi oec aen malcanderen hechten, also dat ghi dat seste hayren cleet dobbel sult legghen aen tvorste vanden dake.

10

⁺Ghi sult oeck vijftich ooghen maken aen die lijste van eenen hayren cleede, datmen dat aen dandere hechten mach, ende noch vijftich ooghen in dye lijste van dat ander hayren cleedt, datment met dat ander vast maken mach.

+ C

11

Ende ghi sult oeck vijftich coperen haecxkens maken, daermen die maelgien mede mach aen een vast maken, dat van allen een decsel werden mach

12

Ende datter ouerschiet vanden hayren cleederen die voor het dack bereyt worden, welc es een hayren cleet datter meer es, van dier helicht suldy bedecken het achterste des tabernakels,

13

ende den eenen cubitus sal hanghen ter eender sijden, ende den anderen ter ander sijden, die in die lengde der hayren cleederen ouerschiet, bedeckende beyde die sijden van dat tabernakel.

14

Ende ghi sult noch een ander decsel voor het dack maken van roode rams vellen, ende daer bouen noch een ander decsel van Iantinen vellen. [afbeelding]

15

⁺Ghi sult oec staende barderen des tabernakels maken van setim hout,

+ D

16

dye elck in dye lengde hebben moeten thien cubitus, ende in die breyde elck onderhaluen cubitus.

17

Aen dye sijden van die barderen salmen twee scroeuen maken, waer mede dat het een bart aen dander mach ghevoecht worden. Ende op dese manier sullen alle die berders bereyt worden,

18

Waer af dat die twintich sullen wesen aen die suytsijde welc naden suyden strect,

19

den welcken suldi veertich silueren basementen ghieten, alsoe datter twee basementen gheleyt moghen worden onder elck bert aen beyde sijn hoecken,

20

desghelijcks oock in dye tweede sijde des tabernakels, dat nae den noorden staet, sullen oock twintich barderen wesen,

21

die welc oeck sullen veertich silueren basementen hebben, twee basementen sullen onder elck bert gheleyt worden.

22

⁺Maer ter west sijden des tabernakels, suldy ses barderen maken,

+ E

23

ende noch ander twee, die ghericht sullen worden in die hoecken achter den rugghe des tabernakels,

24

Ende si sullen aen een geuoecht worden van beneden tot bouen toe, ende sij sullen alle ghehecht worden met een voechsele, Ende in die twee berderen, die op die hoecken ghestelt sullen worden, sal oeck desghelijcke voeghinghe ghehouden worden.

25

Ende het sullen tsamen sijn acht berders ende haer silueren basementen sesthien, altijt twee basementen gherekent voor elck bert. [afbeelding]

26

Ende ghi sult oock vijf richelen maken van setim hout, om die berders tsamen te houden, aen die een sijde des tabernakels,

27

ende vijf ander aen die ander sijde, ende oec soe vele aen die westsijde,

28

welcke richelen sullen ghesteken worden doer het midden vanden barderen, vanden eenen eynde totten anderen.

29

Ende die selue barderen suldy vergulden, ende ghy sult daer gulden ringhen in ghieten, doer die welcke die hantboomen sullen die barderen tsamen houden die welcke ghi bedecken sult met gulden platen,

30

Ende ghi sult dat tabernakel oprechten nae dat voerbeelt dat v opden berch ghetoont es.

31

Ghi sult oeck een voerhancsel maken van hemels blau sijde ende purpur, ende van roode sijde die tweemael gheverwet es, ende van ghetwernt wit lijnen garen constelijck gheborduert met schoone versceyden verwen,

32

dwelc ghi hangen sult voer vier colummen van setim hout, die welcke oeck sullen vergult wesen ende sij sullen gulden capiteelen hebben, maer silueren basementen,

33

Ende dat voorhancsel sal in ghereghen worden met ringhen, Waer binnen ghi stellen sult die arc-

[p. *99]

ke des ghetuyghenis, Waer mede oeck die heylighe plaetse, ende die alderheylichste der heyligher, gesceyden sullen worden,

34

Ghi sult oec den stoel der ghenaden stellen op die arcke des ghetuyghenis, in die alder heylichste plaetse,

35

ende die tafel buyten dat voorhancsel, ende teghen die tafel den candelaer aen des tabernakels suytsijde, Want dye tafel sal staen aen dye noortsijde.

36

Ghi sult oeck een voerhancsel maken aen den inganck des tabernakels, van hemels blau sijde, ende purpur sijde, ende roode sijde, tweemael geuerwet, ende van wit lijnen garen getwernt, nae der borduerwerckers const,

37

Ende vijf colomnen van setim hout suldy vergulden (waervoor dattet voerhancsel sal gheleyt worden) der welcker colomnen hoofden, sullen gulden sijn ende die basementen metalen.

[afbeelding]