Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺ENde die Heere heeft ghesproken tot Moysen, segghende.

+ A

2

Spreect tot die kinderen van Israhel, dat sij mi brenghen die vroech offeranden, Ende ghi sult die ontfangen van een yeghelijck diese vrijwillichlijck offert,

3

Ende dit es tghene dat ghy nemen moet, Gout, ende siluer, ende metael

4

hemels blau sijde, purpur sijde, ende roode sijde twee-[afbeelding]mael gheuerwet, ende wit lijnwaet, gheyten hayr,

5

ende rams vellen root gheuerwet, ende ianthinen vellen, ende sethim hout,

6

olie om dye lampen te onderhouden, specien tot salue, ende tot substancie om goeden rueck te gheuen,

7

Onychinus steenen, ende costelijcke steenen om den witten lijfrock, ende dat borststuck des verstants te vercieren,

8

Ende sij sullen voer my een heylighe plaetse maken, ende ick sal int midden van hemlieden woonen

9

nae alle die ghelijckenisse des tabernakels dat ick v toonen sal, ende alle der vaten tot sijnen dienste,

10

Ende ghi sult dat maken aldus. Voecht tsamen een arcke van sethim hout, wiens lingde sal wesen van twee cubitus, ende eenen haluen die breydde van onderhaluen cubitus, ende die hoochde desghelijcs oeck van eenen onderhaluen cubitus,

11

⁺ende ghi sult die arcke vergulden met dat alderpuerste gout binnen ende buyten, ende ghy sult daer bouen int ronde een gouden croone maken,

+ B

12

ende vier gulden ringhen, die welcke ghi stellen sult, aen dye vier hoecken vander arcken, Twee ringhen sullen wesen aen deen sijde, ende twee ringhen aen dander sijde,

13

Ende ghi sult oeck hantboomen maken van sethim hout, ende dye met goude bedecken,

14

ende ghi sultse steken in die ringen die aen die siden der arcken sijn, datmen die daer mede draghen mach,

15

Die welcke sullen eewelick in dye ringhen wesen, ende si en sullen daer nemmermeer wt ghetrocken worden,

16

Ende ghi sult in die arcke legghen tgetuygenisse dwelc ic v gheuen sal.

17

Ghi sult oec eenen ghenaden stoel maken van dat alder puerste gout. Sijn lingde sal wesen twee cubitus ende eenen haluen, ende zijn breyde onderhalf cubitus.

18

Ghi sult oeck twee cherubinnen maken van goude gheslaghen, op beyde die sijden van den ghenaden stoel.

19

Den eenen cherub sij aen deen sijde, ende den anderen aen dander sijde, laetse beyde die sijden vanden stoel der ghenaden bedecken,

20

wtreykende haer vloeghels, ende der ghenaden stoel bedeckende, ende laetse malcanderen aensien metten aensichten ghekeert op den ghenaden stoel,

21

daer dye arcke mede ghedect sal worden, ⁺daer ghy dat ghetuygenisse in legghen sult dwelck ick v gheuen sal.

+ C

22

Van daer sal ick ghebieden ende tot v spreken op den stoel der ghenaden, ende

[p. *97]

[afbeelding] wt het midden vanden twee Cherubiunen dye daer op die arcke des ghetuyghnissen sijn sullen, alle dat ick door v den kinderen van Israhel ghebieden sal.

23

Ghy sult oeck een tafel maken van Sethim hout hebbende twee cubitus in die lengde, ende eenen cubitus in die breyde, ende onderhaluen cubitus in dye hoochde,

24

ende ghi sult die vergulden met dat alder puerste gout,

25

Ende ghi sult dien maken een gulden lijste int ronde, ende op die lijste suldi maken een wtghegroefde croone vier vingeren hooghe, ende op die noch een ander gulden croonken,

26

Ghy sult oec bereyden vier gulden ringhen, ende ghi sult die stellen in die vier hoeken der seluer tafelen, aen elcken voet,

27

Onder dye croone sullen die gulden ringhen wesen, datmen daer hantboomen door steken mach, ende datmen die tafel draghen mach,

28

Ende die hantboomen suldi oec maken van sethim hout, ende ghi sult die met goude omlegghen, om die tafel te draghen,

29

Ghi sult oeck ghereet [afbeelding] maken, schotelen, schalen, wieroock vaten, croesen daermen die vochtighe offeranden in offeren sal, van den alder puersten goude,

30

ende ghi sult op die tafel altijt voor mijn aenschijn die brooden der voerlegghinghen stellen.

31

⁺Ende ghi sult oec eenen gheslagencandelaer maken van den alder suyuersten goude, sijnen standaert, ende schachten, coppen, ende lelien, ende ronde clootkens sullen wt hem spruyten,

+ D

32

Ses schachten sullen wt sijn sijden spruyten, drij wt die een sijde, ende drij wt dandere,

33

drij nappen in die manier van noten, aen elcken schacht, ende ronde clootkens, ende lelien, ende des ghelijcks drij nappen ghelijc een not inden anderen scacht, ende daer oec tsamen ronde clootkens ende lelien. Die sal het werc vanden ses scachten wesen, die ghebracht sullen worden wt den standaert,

34

Ende inden seluen candelaer sullen vier nappen wesen in een manier van noten, ende by een yeghelijc ronde clootkens ende lelien,

35

Die ronde clootkens sullen wesen onder die twee scachten te drij plaetsen, die welc tsamen ses worden comende wt eenen standaert,

36

Dus sullen die ronde clootkens, ende die scachten wt dien standaert comen, altesamen gheslagen van den alder fijnsten goude,

37

Ghi sult oeck seuen bernende lampen maken, ende ghi sultse opden candelaer stellen dat sij daer tseghen lichten,

38

ende oeck snutters, ende vaten daermen in versmachten sal datmen af snudt, laet maken vanden alder puersten goude,

39

Dat heel ghewicht vanden candelaer, met alle sijn toebehoorte sal hebben in ghewichte een talent vanden alder puersten goude.

40

Siet wel aen, ende maket nae tvoerbeelt dat v op den berch ghetoont es.

[afbeelding]