Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

[p. *96]

1

⁺ENde die Heere heeft oeck tot Moysev gheseyt. Climt opwaerts tot den Heere ghy ende Aaron, Nadab, ende Abiu, ende tseuentich ouders van Israhel, ende ghi sult van verre aenbeden,

+ A

2

Ende Moyses sal alleene tot den Heere opgaen, ende sij en sullen niet bi comen, noch oec het volc met hem.

3

Aldus soe es Moyses comen, ende heeft den volcke gheseyt alle des Heeren woorden, ende vonnissen, ende alle dat volck heeft met eender stemmen gheantwoert. Alle die woorden des Heeren die hy ghesproken heeft, sullen wi doen,

4

Maer Moyses heeft alle die woerden des Heeren gheschreuen, ende des morghens vroech opstaende, heeft hy eenen outaer ghetimmert aen dat onderste vanden berch ⁺ende twaelf titelen nae die twaelf gheslachten van Israhel,

+ B

5

Ende heeft ionghers ghesonden van dye kinderen van Israhel, ende sij hebben brantofferen gheoffert ende sij hebben oeck vreedtsamighe offerande gheoffert den Heere twaelf calueren,

6

Ende Moyses heeft die helicht des bloets ghenomen, ende hi heuet in groote bekers ghedaen, ende dat ander deel storte hy op den outaer,

7

Ende hy heeft dat boeck des verbonts ghenomen ende dat ghelesen, daert dat volc hoorde, dye welcke hebben gheseyt. Alle dat die Heere ghesproken heeft dat sullen wij doen, ende wi sullen ghehoorsaem wesen,

8

Maer hy nam dat bloet ende spraeyde dat opt volck ende hi seyde. Dit es het bloet des verbonts welc Godt met v lieden vast ghemaeckt heeft op alle dese woorden.

9

⁺Dus sijn Moyses ende Aaron, Nadab, ende Abiu ende tseuentich vanden ouders van Israhel opwaerts ghegaen,

+ C

10

ende si hebben Israhels Godt ghesien, ende onder sijn voeten waert ghelijc het werck van eenen Saphier steen, ende ghelijc den hemel als hy claer es,

11

Ende hi en heeft sijn hant niet gheleyt op de ghene die van den kinderen van Israhel, verre wech ghegaen waren, Ende si hebben God ghesien ende hebben gheten ende ghedroncken,

12

Maer die Heere heeft tot Moysen gheseyt. Coemt ghi bi mi bouen opden berch, ende blijft daer, ende ic sal v steenen tafelen gheuen, ende die wet, ende die gheboden, die ic v gheschreuen hebbe, dat ghy hen die leeren moecht,

13

Ende Moyses ende Iosue sijn dienaer zijn opgestaen, ende Moyses op den berch Gods climmende,

14

heeft totten ouders gheseyt. ⁺Verbeyt hier, tot dat wij tot v wederkeeren, ghi hebt Aaron ende Hur met v lieden, eest datter eenich gheschil opstaet dat suldy tot hen ouerdraghen,

+ D

15

Ende als Moyses op den berch comen was soe bedecte een wolcke den berch,

16

ende dye glorie des Heeren heeft haer stadt ghenomen op Sinai bedeckende, die met eender wolcken ses daghen, Maer op den seuensten dach soe riep hi hem, wt dat midden der duysterheyt,

17

Ende dye ghedaente van die glorie des Heeren was ghelijck een bernende vier, op den tsop vanden berghe in dat aensien der kinderen van Israhel,

18

Ende Moyses es ghegaen int middel vanden neuel, ende es opden berch gheclommen, ende es daer bleuen veertich daghen ende veertich nachten.