Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺GHy en sult gheen loghentale ontfanghen, noch ghi en sult v hant daer niet toe vueghen dat ghy voer eenen ongoddelijcken soudt valsch ghetuyghenis segghen.

+ A

2

Ghy en sult die menichte niet volghen om quaet te doen, ende int recht soe en suldi niet volghen dat segghen vanden meesten hoop, dat ghy daer om soudt van die waerheyt scheyden.

3

Ghy en sult int recht gheen bermherticheyt hebben metten armen.

4

Eest sake dat ghy te ghemoete coemt ws viants osse oft sijnen esel, buyten weghen dolende, soe leydt die wederomme tot hem.

5

Eest dat ghy den ezel van eenen die v haet siet ligghen onder eenen last, soe en suldi niet voerby gaen, maer ghy sult hem sijnen last ophelpen.

6

Ghy en sult dat recht des armen niet buyghen.

7

Ghy sult loghenen schouwen.

Den onnooselen ende rechtuerdighen en suldi niet dooden, want ick ben den ongoddelijcken teghen.

8

⁺Ghy en sult oeck gheen ghiften ontfanghen, die welcke verblenden die ooghen oeck vanden wijsen, ende verkeeren die woerden vanden rechtueerdighen.

+ B

9

Den wtlander en suldi niet lastich wesen, want ghy kent die zielen vanden wtlanders wel, aenghesien dat ghy seluer oeck hebt vremdelinghen gheweest in lant van Egipten.

10

Ses iaren suldi v lant besayen, ende sijn vruchten vergaderen,

11

meer int seuenste iaer suldi dat laten ligghen, ende doen rusten, op dat die arme menschen ws volcs oeck moghen eten, ende alle datter ouerblijft laet dat die beesten des vels eten, alsoe suldi doen in uwen wijngaert ende in uwen olijfgaert.

12

⁺Ses daghen suldi wercken, opden seuensten dach suldi ophouden, dat uwen osse ende ezel moghen rusten, ende dat nwer dienstvrouwen sone, ende die vreemdelinck hem mach vermaken.

+ C

13

Alle dese dinghen die ick v gheseyt hebbe suldi bewaren, ende ghy en sult niet sweren by die namen der vreemder goden, noch dat en sal wt uwen monde niet ghehoort worden.

14

Alle iaren suldi my drij reysen feesten houden.

15

Ghy sult onderhouden dat hoochtijt vanden onghedeesemde brooden, Seuen daghen lanck suldi onghedeesemde brooden eten ghelijck ick v beuolen hebbe, op den tijt der maent van die nieuwe vruchten, als ghy wt Egipten ghinct, Ghy en sult v voer mijn aensicht niet ydel verthoonen.

16

⁺Ende dat hoochtijt vanden oochst der ierster vruchten ws wercs, van alle dat ghi inden acker ghesaeyt sult hebben. Ende den feestdach oeck int wtgaen vanden iare, als ghy allen v vruchten sult wten velde verghadert hebben.

+ D

17

Drijmael des iaers soe sal hem vertoonen voer den Heere Godt, alle dat onder v lieden manlijck es.

18

Ghi en sult het bloet van mijnder offeranden niet offeren opt deesem, ende het vet van mijnen hoochtijde en sal niet ouerblijuen tot smorghens toe.

19

Dierste van die vruchten ws lants, suldi draghen int huys vanden Heere uwen Godt.

Ghy en sult een ionck bocxken niet coken int melck van sijnder moeder.

20

Siet ick sal mijnen Enghel senden die voer v gaen sal, ende v bewaren sal inden wech, ende v leyden in die plaetse die ick v bereyt hebbe,

21

Slaet hem gade, ende hoort sijn stemme, noch en meynt niet dat ghy hem soudt moghen versmaden, ⁺want hy en sals niet vergheuen als ghy sonde doet, enden mijnen naem es in hem.

+ E

22

Maer eest dat ghy sijn stemme hoort, ende dat ghy doet alle dat ick spreke, soe sal ick een viant uwen vianden sijn, ende ick salse verdrucken die v verdrucken,

23

Ende mijnen Enghel sal voer v gaen, ende hy sal v inleyden tot die Amorrheen, ende Hetheen, ende Phereseen, ende Chananeen, ende Heueen, ende Iebuseen, die welcke ick vernielen sal.

24

Ghy en sult hen goden niet aenbidden, noch ghy en sult hen gheenen godtsdienst aendoen, noch ghy en sult hen wercken niet doen, maer ghy sultse verderuen, ende haer beelden suldi breken.

25

Ende ghy sult den Heere uwen Godt dienen, op dat ic v brooden ende v wateren ghebenediden mach, ende dat ick die siecte van v mach nemen.

26

Daer en sal gheen vrouwe sonder vrucht, oft onvruchtbaer in v lant wesen, ⁺het ghetal van uwen daghen sal ic vol maken,

+ F

27

Ic sal mijnen grouwel voer v senden, ende ick sal alle dat volck dootslaen, daer ghy toe comen sult, ende ick sal allen v vianden voer v doen te rugghe keeren,

28

ende ick sal te voren horselen wtsenden, die welcke sullen die Eueen, ende Chananeen, ende Hetheen veriaghen, eer ghy daer in comen sult,

29

Ick en salse op een iaer van uwen aenschijn niet verdrijuen, op dat het lant niet en verwoeste, ende dat die wilde beesten tseghen v niet vermenichfuldicht en worden.

30

Allinxkens sal ick die van v aenschijn verdrijuen, ⁺tot dat ghy vermeerdert wordt, ende het lant moecht besitten,

+ G

31

Ende ic sal v palen stellen van die roode zee, tot die zee der Palestijnen toe, ende vander woestijnen tot den vloet, ic sal die inghesetenen des lants in v handen leueren, ende ic salse van v aenschijn verdrijuen.

32

Ghy en sult met hen gheen verbont maken, noch met haren goden,

33

En laetse in lant niet woonen, op dat sij v by auontueren niet en doen sondighen teghen my, eest sake dat ghy haren Goden dient, dwelck v sekerlijc sal wesen tot een verargheren.