Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

ENde die Heere heeft ghesproken alle dese woerden.

2

Ick ben die Heere v Godt die v gheleydt hebbe wt den lande van Egipten, wten huyse der slauernien.

3

⁺Ghy en sult gheen vreemde goden hebben voer my.

+ A

4

Ghy en sult v gheen ghesneden beelt, oft eenighe ghelijckenisse maken van tghene dat bouen inden hemel es, ende op die aerde beneden, oft oeck van tghene dat onder deerde es in die wateren.

5

Ghy en sult die niet aenbidden oft godtsdienst aendoen. Ick ben die Heere v Godt, sterck ende een ialours liefhebbere, versoeckende der vaders boosheyt in haer kinderen tot in die derde ende vierde afcoemste, der gheender die my haten.

6

Ende ick ben bermherticheyt doende in veel dusenden, den ghenen die my liefhebben, ende mijn gheboden onderhouden.

7

Ghy en sult den naem van den Heere uwen Godt niet ydelijck aennemen, want die Heere en sal hem niet onsculdich houden, die den naem van sijnen Heere Godt te vergheefs aenneemt.

8

⁺Weest gedachtich dat ghy den sabboth dach heylich maect,

+ B

9

Ses daghen suldi wercken, ende allen v wercken doen,

10

maer den seuensten dach es den sabboth des Heeren ws Gods, Ghy en sult gheen werck op dien dach doen, ghy ende v sone, ende v dochter, v knecht ende v dienstvrouwe, v behelpighe beesten, ende die vreemdelinck die binnen v poorten woont.

11

Want op die ses daghen heeft Godt hemel ende eerde ende die zee ghemaect, ende alle dat daer in es, ende hy heeft gherust op den seuensten dach, daerom heeft die Heere des sabboth dach ghebenedijt, ende dien gheheylicht.

12

Eert uwen vader ende v moeder, op dat ghi langhe moecht leuen opder eerden, welc v Heere Godt v gheuen sal.

13

Ghy en sult niet dootslaen.

14

Ghy en sult gheen ouerspel doen.

15

Ghy en sult niet stelen.

16

Ghy en sult tseghen uwen naesten gheen valsch ghetuyghenisse spreken.

17

Ghy en sult ws naesten huys niet begheren. Ghy en sult zijn huysvrouwe niet begheren, noch sijnen knecht, noch sijn dienstwijf, noch sijnen osse, noch sijnen ezele, noch iet van alle dat hem toebehoort.

18

⁺Ende alle tvolck sach die stemmen ende die blinckende lichten, ende dat gheclanc van der basoenen, ende den rookenden berch, ende veruaert sijnde ende van anxt verslagen, hebben sij van verre ghestaen,

+ C

19

segghende tot Moyses. Spreect tot ons ghy, ende wi sullen daer nae hooren, maer en laet den Heere tot ons niet spreken, op dat wij by auontueren niet en steruen.

20

Ende Moyses heeft totten volcke geseyt. En wilt niet vreesen, want Godt es ghecomen om dat hy v proeuen soude, ende om dat sijn veruaertheyt in v lieden sijn soude, ende dat ghy niet sondighen en soudt.

21

Ende het volck heeft van verre ghestaen, maer Moyses es gegaen tot in die donckerheyt, daer Godt in was.

22

Ende die Heere heeft daer toe noch tot Moysen gheseyt, Dit suldi den kinderen van Israhel segghen, Ghi hebt ghesien dat ic vanden hemel v aenghesproken hebbe.

23

Ghy en sult gheen silueren goden maken, noch ghy en sult voer v gheen gulden goden maken.

24

⁺Ghy sult my maken eenen outaer van eerden, ende ghy sult daer op offeren brantofferen ende v vreedtsamighe offeranden, v scapen ende v ossen, op alle plaetsen daer ghedenckenisse wesen sal van mijnen naem, Ic sal tot v comen ende v ghebenedijden.

+ D

25

Maer eest dat ghy my eenen steenen outaer maect, soe en suldi dien niet maken van ghehouwen steenen, want eest dat ghy v mes daer op heft, soe sal hy besmet sijn.

26

Ghy en sult tot mijnen outaer niet gaen met trappen, op dat v scamelheyt niet ondect en worde.