Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

[afbeelding]

1

⁺IN die derde maent, nae dat die kinderen van Israhel wt dat lant van Egipten ghegaen waren, sijn sij op dien seluen dach ghecomen in die woestijne van Sinai,

+ A

2

Want doen sij ghereyst waren van Raphidim ende ghecomen tot in die woestijne van Sinai, hebben sij haren legher ghemaect ter seluer steden, ende daer hebben die van Israhel haer tenten gheslaghen, tseghen ouer den berch.

3

Maer Moyses es opwaerts ghegaen tot Godt, ende die Heere heeft hem gheroepen van opden berch, ende gheseyt. Dit suldi den huyse van Iacob segghen, ende den kinderen van Israhel vercondighen.

4

Ghy hebt seluer ghesien al dat ick den Egiptenaers ghedaen hebbe, hoe dat ic v ghedragen hebbe op dye vloghelen vanden aernen, ende te mywaerts ghenomen hebbe.

5

Daer om eest sake dat ghy hoort nae mijn stemme, ende dat ghy mijn verbont onderhoudet, soe suldi mi wesen tot een eyghendom wt alle volcken, want gheheel aertrijck behoort my toe

6

Ende ghy sult my wesen tot een priesterlijck conincrijck, ende een heylich volck, dit sijn die woerden die ghy spreken sult tot die kinderen van Israhel.

7

Moyses es ghecomen, ende als hi vergadert hadde die outste vanden volcke, ⁺soe heeft hi henlieden wtgheleyt alle die woerden welcke die Heere beuolen hadde.

+ B

8

Ende alle dat volck heeft tsamen gheantwoerdt, Alle dat die Heere gheseyt heeft dat sullen wij doen.

Ende als Moyses des volcs woerden tot den Heere ouerghedraghen hadde,

9

soe heeft die Heere tot hem gheseyt. Ick sal nv ter stont by v comen in die duysterheyt der wolcken, dat het volck my mach hooren tot v spreken, ende dat sij v eewelijck moghen gheloouen. Daerom heeft Moyses den Heere ghebootschapt die woerden des volcs.

10

Ende die Heere heeft gheseyt. Gaet tot den volcke, ende maectse heylich heden ende morghen, ende laetse haer cleederen wasschen.

11

Ende laetse bereedt sijn tseghen den derden dach, want opden derden dach sal die Heere voer alle dat volck nederdalen opden berch van Sinai.

12

Ende ghy sult den volck palen setten int ronde, ende hen segghen. ⁺Wacht v dat ghy op den berch niet en climt, oft en coemt by sijn eynden niet. Alle die den berch ghenaect, sal dye doot steruen.

+ C

13

Gheen hant en sal hem aentasten, maer hy sal ghesteent worden, oft met pijlen doerscoten, tsij een beeste oft een mensch, ten sal niet leuende blijuen. Alst trompet sal beginnen te luyden, dat sij dan op den berch climmen.

14

Ende Moyses es vanden berch totten volck ghecomen, ende hy heeftse gheheylicht. Ende doen sij haer cleederen ghewasschen hadden,

15

soe seyde hy tot hen, Weest bereedt tseghen den derden dach, ende en wilt v huysvrouwen niet ghenaken.

16

Ende den derden dach was nv ghecomen, ende den morgenstont was claer gheworden, ende siet doen begonstmen te hooren donderslaghen, ende blixemen sien blicken, ende een seer dicke wolcke begonst den berch te ouerdecken, ende het gheclanck van dat trompet gaf lancs soe meerder gheluyt, ende alle dat volck dat inden legher was, heeft seer beureest gheweest.

17

Ende als Moyses hemlieden hadde wtgheleydt Gode te ghemoete, wt die plaetse des heyrleghers, soe sijn sij blijuen staende onder aen tbeghinsel vanden berch.

18

Maer alle den berch Sinai roocte, ⁺om dat die Heere God daer op neder ghedaelt was inden viere, ende den rooc ghinck van dien berch opwaerts als van eenen ouen, ende alle den berch was veruaerlijck.

+ D

19

Ende het gheluyt vanden basoene worde allinxkens meerder, ende het strecte hem lancs soe verder wt. Moyses die sprack, ende Godt die antwoerde hem.

20

Ende die Heere es nederghedaelt opden berch Sinai, op dopperste vanden berch, ende hy heeft Moysen gheroepen op dat opper-

[p. *93]

ste vanden berch. Ende als hy daer op gheclommen was,

21

soe heeft hy tot hem gheseyt. Gaet nederwaerts ende ghetuyghet den volcke, dat sij by auontueren niet ouer en treden die palen om den Heere te sien, ende datter van hemlieden gheenen grooten hoop en sterue.

22

Ende die priesters die tot den Heere gaen, laet oec gheheylicht worden, op dat hi niet en verslae.

23

Ende Moyses seyde totten Heere. Dat ghemeyn volc en sal niet moghen climmen op den berch van Sinai, want ghy hebt ghetuycht ende ghesproken segghende, Stelt palen omtrent den berch, ende heylicht dien

24

Ende die Heere heeft tot hem gheseyt. Gaet henen ende daelt neder, ende ghy sult opcomen ende Aaron met v maer die priesters ende dat volck en laet ouer die palen niet treden, noch tot den Heere opclimmen, dat hijse by auontueren niet doot en slae.

25

Ende Moyses es tot dat volck ghegaen, ende heeft hen dit al vertelt.