Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ENde als Iethro dye priester van Madian Moyses maech ghehoort hadde, alle dye dinghen, welc God Moysi ende sijnen volcke ghedaen hadde, ende hoe dat die Heere Israhel wt Egypten gheleyt hadde,

+ A

2

soe heeft hy Sephora Moyses huysurouwe ghenomen, die welcke Moyses wederom ghesonden hadde,

3

ende haren twee sonen, waer af die een hiet Gersam, om dat die vader seyde. Ick heb een vreemdelinck gheweest in een vreemt lant,

4

ende die ander hiet Eliezer, want hi seyde. Mijns vaders God es mijn helper, ende hi heeft my verlost van Pharaos swaert.

5

Hierom es Iethro Moyses maech ghecomen ende zijn kinderen, ende sijn huysurouwe tot Moysen in die woestijne daer hy den heyrlegher ghestelt hadde, by Gods berch,

6

Ende hy ontboodt Moysi, segghende. Ick Iethro v maech, come tot v, ende v huysurouwe, ende v twee sonen met haer,

7

Ende hy es wtgheghaen sijnen maech te ghemoete, ende hy heeft aenbeden ende hem ghecust, ende sij hebben malcanderen ghegroet met vredelijcke woerden.

⁺Ende als hy int tabernakel ghegaen was

+ B

8

soe heeft Moyses sijnen maech vertelt, alle tghene dat die Heere Pharao, ende den Egyptenaren ghedaen hadde, om Israhels wille, ende alle den arbeyt die si onder weghen ghehadt hadden, ende dat die Heere hemlieden verlost hadde,

9

Ende Iethro heeft hem verblijt van alle tgoet dat Godt Israhel ghedaen hadde, om dat hijse verlost hadde wt die hant der Egiptenaren,

10

ende hi heeft gheseyt. Ghebenedijt moet die Heere wesen, die v verlost heeft wt die hant der Egyptenaren, ende wt die hant van Pharao, die sijn volck verlost heeft wt die hant van Egypten.

11

Nv heb ick bekent dat die Heere groot es bouen alle goden, om dat sij houerdelijck tegen hem ghedaen hadden.

12

Daerom heeft Iethro Moyses maech den Heere brantofferanden gheoffert, ende

[p. *92]

Aaron, ende alle die ouders der kinderen van Israhel sijn gecomen om broot met hem te eten voer Gode.

13

⁺Des anderen daechs es Moyses geseten om den volcke recht te doen, dwelck by Moysen stondt van smorghens totten auont toe.

+ C

14

Ende als sijn maech dit ghesien hadde, te weten alle dat hy onder tvolc dede, soe heeft hy gheseyt, Wat es dit dat ghy onder tvolc doet? waerom sidt ghi alleen, ende alle dat volc verwacht van tsmorghens totten auont?

15

Ende Moyses heeft hem gheantwoert. Het volc coemt tot my vragende Gods sentencie.

16

Ende als daer eenighen twist tusschen hen op staet, soe comen sij toe my dat ick tusschen hemlieden vonnissen soude, ende dat ic hen toonen soude Gods gheboden, ende sijn wetten,

17

Ende hi seyde. Ten es niet goet dat ghy doet,

18

ghy verderft v seluen met eenen onwijsen arbeyt, soe wel ghy, als dit volck dat met v es, dit werck es bouen v macht, ghy en moecht dit alleen niet verdraghen,

19

maer hoort mijn woerden ende raden, ende die Heere sal met v wesen. Weest ghy den volck in dye dinghen die Godt aengaen, alsoe dat ghy ouerdraghet tghene datter gheseyt wordt tot hem,

20

⁺ende thoont ghy den volcke die ceremonien ende die maniere hoemen Godt dienen moet, ende den wech daer sij in wandelen moeten, ende het werck dat sij doen moeten.

+ D

21

Maer besorgt wt alle dat volc wijse mannen die Godt vreesen, daer die waerheyt in es, ende die de ghiericheyt haten ende maect van hemlieden hooftmannen ouer duysent ende honderste mans, ende vijftichste mans, ende thiende mans

22

Die welcke den volcke tot allen tijden recht doen moghen, ende alle die meeste saken sullen sij v ouerbrenghen ende sij sullen alleen die minste saken slichten, op dat v dit mach lichter om doen sijn, als den last den andere sal medeghedeelt sijn.

23

Eest dat ghy dit doet, soe suldi Godts ghebodt voldoen, ende ghy sult dan sijn geboden moghen staende houden, ende alle dit volck sal met vrede wederkeeren tot sijnder steden.

24

Ende als Moyses dese redenen ghehoort hadde, soe heeft hy ghedaen alle dat hy hem inghegeuen hadde.

25

Ende hi heeft cloecke mannen ghecosen wt alle tvolc van Israhel, ende die des volcs hooftluyden ghemaect, te weten, ouer duysent, ende ouer hondert, ende ouer vijftich, ende ouer thien.

26

Die welcke hebben den volcke recht ghedaen tot allen tijden, maer al dat te swaer was, droeghen sij tot hem ouer alleen ordeelende die lichtste saken.

27

Ende hi heeft sijnen maech laten gaen, die welcke es wedergekeert in sijn lant.