Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ALdus es alle die menichte der kinderen van Israhel, ghereyst wt dye woestijne Sin, door haer woonsteden, na des Heeren woort hebben sij haren heyrlegher ghemaect in Raphidim daer gheen water en was voer tvolck om te drincken

+ A

2

Ende sij hebben teghen Moysen ghekeuen, ende gheseyt. Gheeft ons water dat wij drincken moghen, Ende Moyses heeft hen gheantwoort. Wat kijfdi teghen my? Waer om tempteerdy den Heere?

3

Daer om heeft dat volck aldaer dorst ghehadt bi ghebreke van water, ende sij hebben tsegen Moysen ghemurmureert, segghende, Waer om hebdy ons doen wt Egypten gaen, dat ghy ons ende onse kinderen ende ons vee soudt van dorste doen steruen?

4

Maer Moyses heeft totten Heere gheroepen, segghende. Wat sal ick desen volcke doen? ⁺By nae sullen sij my steenen,

+ B

5

Ende die Heere heeft tot Moysen gheseyt. Gaet voer dit volck, ende neemt met v vanden ouders van Israhel, ende neemt in v hant die roede daer ghi den vloet mede gheslaghen hebt, ende gaet henen,

6

Siet ick sal voer v staen daer op die steenrootse Horeb, ende ghy sult de steenrootse slaen, ende daer sal water wtgaen, dattet volck sal moghen drincken, Ende Moyses heeft alsoe ghedaen voer die ouders van Israhel,

7

Ende hy heeft die plaetse ghenoemt becoringhe, om dat ghekijf der kinderen van Israhel, ende om dat si den Heere ghetempteert hadden, segghende. Es die Heere onder ons, oft niet?

8

⁺Maer Amalec es comen ende streedt tseghen Israhel in Raphidin,

+ C

9

Ende Moyses heeft gheseyt tot Iosue. Kiest mannen wt, ende wt gaende, strijdt tegen Amalec, morghen sal ick staen op dopperste vanden hueuele, hebbende Gods roede in mijn hant.

10

Ende Iosue heeft ghedaen alsoe hem Moyses beuolen hadde, ende hi heeft ghestreden tseghen Amalec. Maer Moyses ende Aaron ende Hur, sijn ghegaen op dopperste vanden hueuele,

11

Ende als Moyses zijn handen ophief, soe verwan Israhel, maer als hy die een weynich nederliet, soe verwan Amalec,

12

Ende Moyses handen waren swaer, daerom hebben sij eenen steen ghenomen, ende dien onder hem gheleyt ende daer es hy op gheseten, ⁺Maer Aaron ende Hur onderhielen zijn handen van beyde sijden, Ende het es gheschiet, dat sijn handen niet en sijn moede gheworden, totten onderganck der sonnen toe,

+ D

13

Ende Iosue heeft Amalec ende sijn volck door tscerp vanden sweerde veriaecht.

14

Ende die Heere heeft tot Moysen gheseyt. Scrijft dit in eenen boeck tot eender ghedenckenissen, ende gheeft dat ouer in die ooren van Iosue. Want ic sal die ghedenckenisse van Amalec onder den hemel te niet doen,

15

Ende Moyses heeft eenen outaer ghemaect, ende dien ghenoemt, Die Heere es mijn verheffinghe, segghende.

16

Want die hant van den stoel des Heeren, ende des Heeren oorloghe sal teghen Amalec wesen van gheslachte totten gheslachten.