Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde sij sijn ghetrocken van Elim, ende alle die menichte der kinderen van Israhel es ghecomen in die woestijne Sin, welc es tusschen Elim ende Sinai, opden vijfthiensten dach der tweeder maent, nae dat sij wt Egypten ghegaen waren.

+ A

2

Ende alle die vergaderinghe der kinderen van Israhel hebben ghemurmureert tseghen Moysen ende Aaron in die woestijne.

3

Ende die kinderen van Israhel hebben tot hemlieden gheseyt. Och oft wij gestroruen waren door des Heeren hant int lant van Egypten, als wi saten op die vleesch potten, ende aten broot met versaetheden, waerom hebdi ons in dese woestijne bracht, dat ghi alle dese menichte sout met hongher dooden,

4

Ende die Heere heeft tot Moysen gheseyt. ⁺Siet ic sal v broot vanden hemele reghenen, Laet het volc wtgaen, ende vergaderen dat hem tot elcken daghe ghenoech si, dat ick mach proeuen oft het in mijn wet wandelt oft niet

+ B

5

Maer opden sesten dach sullen sij bereyden dat si binnen draghen sullen, ende dat sal noch soe veel zijn, als sij pleghen te vergaderen telcken daghe.

6

Ende Moyses ende Aaron hebben gheseyt tot alle die kinderen van Israhel. Tauont suldy weten dat v die Heere gheleyt heeft wt dat lant van Egypten,

7

ende morghen vroech suldy sien die glorie des Heeren, want ic hebbe ghehoort v murmuratie teghen den Heere, Want wat sijn wij dat ghi teghen ons murmureert?

8

Ende Moyses heeft geseyt. Die Heere sal v tauont vleesch teten gheuen, ende morghen broot tot versadinghe, ⁺om dat hy v murmuratien ghehoort heeft, door die welcke ghi teghen hem ghemurmureert hebt, Want wat sijn wij? daerom v murmuratie en es teghen ons niet, maer tseghen den Heere,

+ C

9

Ende Moyses heeft noch tot Aaron gheseyt. Segghet der gheheelder vergaderinghen der kinderen van Israhel. Coemt voerts voor den Heere, want hy heeft v murmuratien ghehoort.

10

Ende als Aaron sprack tot alle die vergaderinghe der kinderen van Israhel, soe hebben sij omme ghesien nae die woestijne, ende siet die glorie des Heeren openbaerde in een wolcke,

11

Ende die Heere heeft tot Moysen ghesproken, segghende.

12

Ick heb ghehoort die murmuratien der kinderen van Israhel, segt tot hen. Tauont suldy vleesch eten, ende morghen vroech suldy van brooden versaet worden, ende ghi sult weten dat ick ben die Heere v Godt.

13

Aldus soe eest auont gheworden, ende daer zijn quackelen opghecomen die welcke hebben den legher ouerdect Ende des morghens soe lach daer eenen dauwe alomme die tenten,

14

⁺Ende als dien dauwe dat ouerste der eerden bedect hadde, soe sachmen daer in die woestijne wat cleyns ligghen, recht oft met eenen stamper hadde ghestoten gheweest, ghelijck den rijm op die eerde,

+ D

15

dwelc als die kinderen van Israhel saghen soe seyden sij tot malcanderen. Manhu? (dat beteekent) Wat es dit? want sij en wisten niet wat dat was Totten welcken heeft Moyses gheseyt. Dit es het broot dat v die Heere ghegheuen heeft om teten.

16

Dit es dwoort dat v die Heere beuolen heeft, Een ieghelijc sal hier afvergaderen soe vele alst hem ghenoech es om teten, een Gomor voor elcs hooft, nae dat ghetal van uwen zielen die in die tabernakelen woonen suldy dit nemen,

17

Ende die kinderen van Israhel hebben alsoe ghedaen, ende sij hebbent vergadert deen meer dander min,

18

Ende sij hebben dat ghemeten nader maten gomor, ⁺ende die meer vergadert hadde, en hadde niet meer, ende die min bereyt hadde, en hadde niet min, maer sij hebben elck vergadert nae dat sij eten mochten.

+ E

19

Ende Moyses heeft tot hen gheseyt. Niemant en late daer af yet ouerblijuen tot morghen vroech,

20

Ende sij en hebben nae hem niet ghehoort, maer die sommighe hebben daer af wat ouerghelaten tot smorghens, ende het begonste vol wormen te worden ende verrotte, ende Moyses es op hen gram gheworden

21

Maer des smorghens vergaderde daer af een yeghelijc soe vele alst hem ghenoech wesen mocht om teten, ende als die sonne heet worde, soe smalt dat.

22

Maer opden sesten dach soe vergaderden sij dobbel spijse, te weten twee gomor voer elcken mensche Ende alle die princen der ghemeynten sijn comen, ende hebben Moysi dit vertelt.

23

Ende hy heeft tot hemlieden gheseyt. Dit es tghene dat die Heere ghesproken heeft. Morghen eest die ruste vanden sabboth den Heere gheheylicht, al wat ghi morghen doen moet dat doet nv, ende wat ghi dan coken moet, coect nv, ende datter ouerblijft, legt dat wech tot morghen vroech.

24

Ende sij hebben alsoe ghedaen ghelijck Moyses beuolen hadde, ende ten es niet verrot gheworden, noch

[p. *91]

daer en es gheen ghewormte in gheuonden.

25

Ende Moyses heeft gheseyt, Eet dat heden, want het es des Heeren sabboth, men en sal dit heden opt velt niet vinden.

26

⁺Op die ses daghen suldijt vergaderen, maer den seuensten dach es des Heeren sabboth, ende daerom en salmen dat niet vinden,

+ F

27

Ende den seuensten dach es ghecomen, ende vanden volcke esser sommighe ghegaen om te vergaderen, ende sij en hebben niet vonden.

28

Ende die Heere heeft tot Moysen gheseyt. Hoe langhe en wildy mijn gheboden, ende mijn wet niet onderhouden?

29

Siet hoe dat v dien Heere den sabboth ghegheuen heeft, ende daerom heeft hy v liden op den sesten dach, dobbel spijse ghegheuen, een yeghelijck blijue by sij seluen, niemant en ghae wt sijnder plaetsen opden seuensten dach,

30

Ende het volc heeft den sabboth ghehouden op den seuensten dach,

31

Ende het huys van Israhel heeft dese spijse ghenoemt Man, dwelc was ghelijc wit coriander saet, ende sijnen smaeck was ghelijck terwen bloeme met honich.

32

⁺Maer Moyses heeft gheseyt, dit es het woert dat die Heere gheboden heeft. Vult daer mede een Gomor, ende laet dat bewaren voor die gheslachten toecomende naer ons, op dat sij moghen kennen het broot daer ick v lieden mede gheuoedt hebbe in dye woestijne, als ghi wt dat lant van Egypten gheleyt waert,

+ G

33

Ende Moyses heeft tot Aaron gheseyt. Neemt een vat ende doet daer man inne, soe veel als in een Gomor gaen mach, ende legghet wech voor den Heere, om dat te bewaren tot in uwe nacomende gheslachten,

34

ghelijck dye Heere Moysi beuolen heeft, Ende Aaron heeft dat ghesedt in dat tabernakel om te bewaren,

35

Ende die kinderen van Israhel hebben man gheten veertich iaren lanck, tot dat sij quamen aen tbewoondt lant, Met deser spijsen zijn sij gheuoet tot dat si quamen aen die palen des lants van Chanaan,

36

Ende een Gomor es het thiende deel van een Ephi.