Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺DOen sanck Moyses ende die kinderen van Israhel den Heere dit liet, ende sij hebben gheseyt,

Laet ons den Heere singhen, want hy es glorioselijck grootdadich gheworden, het peert met den rijder heeft hy in die zee af gheworpen.

+ A

2

Die Heere es mijn stercheyt ende mijnen lof, ende hy es my gheworden ter salicheyt.

Dit es mijn Godt ende ick sal hem glorie bewijsen, dit es mijn vaders Godt, ende ick sal hem verheffen.

3

Die Heere es gelijck een strijtbaer man, almachtich es sijnen naem.

4

Die waghenen van Pharao ende sijn heyr heeft hy in die zee gheworpen, sijn wtghelesen princen sijn verdroncken in die roede zee.

5

Die afgronden hebbense bedect, sij sijn in die diepte neder ghedaelt ghelijck eenen steen.

6

O Heere v rechter hant es grootdadich gheworden doer haer stercheyt, v rechterhant Heere heeft den viant verslaghen.

7

⁺Ende doer die menichfuldicheyt uwer glorien hebdi mijn vianden neder gheleyt, ghi hebt v gramscap wtgesonden, die welck hen verslonden heeft ghelijck stroo.

+ B

8

Ende doer den gheest uwer rasender gramscappen sijn die wateren vergadert, dat vloedende water es blijuen staende, ende die afgronden sijn vergadert int midden vander zee.

9

Die viant heeft gheseyt, Ick salse veruolghen, ende beuanghen, ic sal die roouen deylen, mijn ziele sal versaet worden, Ic sal mijn swaert wt der scheyden trecken, mijn hant salse dooden.

10

Uwen wint heeft ghewaeyt, ende die zee heeftse bedect, sij sijn versoncken ghelijc loot in gheweldighe wateren.

11

Wie es ws ghelijck onder die stercke o Heere? wie es ws ghelijck? grootdadich in heylicheden, vreesselijck ende loffelijck, wonder doende.

12

Ghy hebt v hant wtghereyct, ende die eerde heeftse verslonden.

13

Ghy hebt een leytsman gheweest in uwe bermherticheyt den volcke, dwelck ghy verlost hebt, ende ghy hebt die ghedraghen doer v sterckheyt tot uwer heyligher woonsteden.

14

Die volcken sijn opgheclommen ende gram gheworden, die inghesetenen van Philistijm sijn met weebeuanghen.

15

Doen worden die vorsten van Edom verstoort, ende die stercke van Moab sijn met anxte beuanghen, ende alle die inghesetenen des lants van Chanaan, sijn van veruaerte stijf gheworden.

16

⁺Laet den anxt ende die beuinghe hen oueruallen doer die grootheyt van uwen arm, laetse onberoerlic worden gelijc eenen steen, tot dat doer gegaen si o Heere tot dat v volc ghepasseert sij tselue dwelck ghi beseten hebt.

+ C

17

Ghy sultse inleyden, ende planten opden berch van uwer erffenissen, in v alder sterckste woonstadt, die ghy Heere ghemaect hebt, in v heylighe plaetse, Heere, welck v handen vast ghemaect hebben.

18

Die Heere sal regneren inder eewicheyt ende daer ouer,

19

want Pharao te peerde es met sijnen peerdevolck ende waghenen in die zee ghegaen, ende die Heere heeft die wateren der zee wederom op hemlieden brocht, maer die kinderen van Israhel hebben doert drooghe ghewandelt, int midden van haer.

20

Hier om heeft Maria Aarons suster die prophetersse, een bomme in haer hant ghenomen, ende alle die vrouwen sijn haer nae ghegaen met bommen ende met dansen, den welcken sij voersanck segghende,

21

Laet ons den Heere singhen, want hy es gloriooselick grootdadich gheworden, dat peert met rijder,

[p. *90]

heeft hi in die zee gheworpen.

22

Ende Moyses heeft Israhel ghenomen van die roode zee, ende sij sijn ghegaen in die woestijne van Sur ende hebben ghewandelt drij daghen lanck door die woestijne, ende sij en vonden gheen water,

23

⁺Ende sij sijn ghecomen tot Marath, maer si en mochten dat water van Marath niet ghedrincken, want het was bitter, Waerom heeft hi dier plaetsen eenen bequamen naem ghegheuen noemende die Mara dat es bitterheyt,

+ D

24

Ende het volck heeft teghen Moyses ghemurmureert, segghende. Wat sullen wi drincken?

25

Maer hy heeft totten Heere gheroepen, die welck heeft hem ghetoont een hout, ende als hi dat hadde int water gheworpen, soe es dat in sueticheyt verkeert Daer heeft hi hen gheboden ende ordeelen ghestelt, ende dat volc gheproeft,

26

seggende. Eest sake dat ghi die stemme vanden Heere uwen Gddt hoort, ende dat ghi doet voer hem dat recht es, ende dat ghi sijnen gheboden ghehoorsaem sijt, ende dat ghi alle zijn beuelinghen onderhout, soe en sal ick gheen van die siecten op v brenghen, die ick op Egypten ghestelt hebbe, want ick ben die Heere God v ghesontmaker,

27

Ende die kinderen van Israhel zijn ghecomen tot Elim daer waren twaelf water fonteynen, ende tseuentich palmboomen, ende sij hebben haren heyrlegher ghemaect omtrent die wateren.

[afbeelding]