Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde die Heere heeft tot Moysen ghesproken segghende,

+ A

2

Segghet den kinderen van Israhel, dat sij wederomme keerende, haren heyrlegher maken tseghen ouer Phihahiroth, welc es tusschen Magdalun ende die zee, tseghen ouer Beelsephon, recht daer voer suldi uwen heyrlegher maken aen die zee.

3

Ende Pharao sal segghen vanden kinderen van Israhel, Sij sijn int lant benauwt, die woestijne heeftse besloten.

4

Ende ic sal sijn herte verharden, ende hy sal v veruolghen, ende ic sal hoochlijcke gheeert worden aen Pharao ende aen alle sijn heyr, ende die Egiptenaren sullen weten dat ic die Heere ben. Ende sij hebben alsoe ghedaen.

5

Ende het es den coninc van Egipten ghebootscapt, dat tvolc gheuloden was, ende het herte van Pharao ende van sijnen dienaers es verandert op dat volck, ende sij hebben gheseyt, Wat hebben wi willen doen, dat wij Israhel hebben laten gaen, dat hy ons niet meer dienen en soude?

6

Hierom heeft hy sijnen waghen inghespannen, ende alle sijn volck met hem ghenomen.

7

Ende hi heeft ghenomen seshondert wtghelesen waghenen, ende alle die waghenen die in Egipten waren, ende die capeteynen van alle den heelen heyre.

8

Ende die Heere heeft dat herte van Pharao des conincks van Egipten verhart, ende hy heeft die kinderen van Israhel veruolcht, maer sij waren wtghegaen met een hooghe hant.

9

⁺Ende doen die Egiptenaren der voergaender voetstappen achteruolchden, soe hebben sij die vonden in haren legher by die zee, alle dat rosvolck ende die waghenen van Pharao, ende alle sijn heyr waren te Phihahiroth teghen ouer Beelsephon.

+ C

10

Ende doen Pharao by comen was, ende die kinderen van Israhel haer ooghen ophieuen, soe hebben sij die Egiptenaren achter hen lieden ghesien, ende sij sijn seer beureest gheweest, ende hebben tot den Heere gheroepen,

11

ende tot Moysen gheseyt, In Egipten en waren by auontueren gheen grauen, ende daerom hebdi ons wech gheleyt, dat wi steruen souden in die woestijne, waer om hebdi dit ghedaen dat ghi ons wt Egipten geleyt hebt?

12

En is dit niet het woert dat wi tot v seyden in Egipte, segghende, Gaet van ons, dat wij die Egiptenaren moghen dienen? want het is veel beter hen te dienen, dan te steruen in die woestijne.

13

Ende Moyses heeft totten volck geseyt, En wilt niet veruaert wesen, blijft staende, ende aensiet die grootdadighe wercken des Heeren die hy heden doen sal, Want die

[p. *89]

Egiptenaren die ghy nv siet, en suldi voertaen niet meer sien inder eewicheyt. Die Heere sal voer v strijden ende ghy sult swijghen.

15

Ende die Heere heeft gheseyt tot Moysen, Waer om roept ghy tot mij? segt den kinderen van Israhel dat sij voerts trecken.

16

Maer heft ghy v roede opwaerts, ende reyct wt v hant op die zee, ende scheydt die dat die kinderen van Israhel gaen moghen int midden der zee doert drooghe.

17

Ende ick sal dat herte der Egiptenaren verharden, dat si v sullen veruolghen, ende ic sal glorie verweruen aen Pharao ende aen alle sijn heyr, ende aen sijn waghenen, ende aen sijn rosvolck,

18

Ende die Egiptenaers sullen weten dat ick die Heere ben, als ic sal groote eere vercreghen hebben aen Pharao, ende aen sijn waghenen, ende aen sijn volc te peerde.

19

⁺Ende die Enghel des Heeren die voer dat heyr van Israhel ghinck, hief hem op, ende es gheghaen achter hemlieden, ende met hem es tsamen oec ghegaen die columne der wolcken, latende die vorste achter rugghe,

+ E

20

ende hy heeft ghestaen tusschen den heyrlegher vanden Egiptenaren, ende den heyrlegher van Israhel, ende het was een duyster wolcke ende verlichtende den nacht, alsoe dat sij alle den tijt vander nacht tot malcanderen niet comen en mochten.

21

Ende als Moyses sijn hant op die zee wtghesteken hadde, soe heeft die Heere die wech ghenomen doer eenen stercken dorren wint, die alle den nacht waeyde, ende maecte die zee drooghe, ende het water es ghesceyden.

22

Ende die kinderen van Israhel sijn ingegaen doert midden van der droogher zee, Want het water was hen ghelijck eenen muer aen haer rechte, ende aen haer slincke sijde.

23

⁺Ende die Egiptenaers veruolghende sijn achter hemlieden inghegaen, Ende alle die peerden van Pharao, sijn waghenen, ende ruyters te peerde sijn oec ghegaen doert midden vander zee.

+ F

24

Ende die morghen wake was nv ghecomen, ende siet die Heere siende op dat heyr vanden Egiptenaren, doer die columne des viers ende der wolcken, heeft haer heyr verslaghen,

25

ende die raders der waghenen om gheworpen, ende sij voeren in die diepte. Hier om seyden die Egiptenaren, Laet ons vlieden van Israhel, want die Heere strijdt voer haerlieden teghen ons.

26

Ende die Heere heeft tot Moysen gheseyt, Reyct v hant wt ouer die zee, dat die wateren wederkeeren moghen op die Egiptenaers, op haer waghenen ende ruyters te peerde.

27

Ende als Moyses sijn hant teghen die zee wtghereyct hadde, soe es die ten vroechsten dagheraet wedergheert tot haer ierste plaetse, ⁺ende als die Egiptenaers vloden soe hebben hen die wateren teghen ghecomen, ende die Heere heeftse omwoluen int midden der vloeden,

+ G

28

Ende die wateren sijn weder gekeert, ende hebben die waghenen ende dat rosvolck van dat heel heyr van Pharao ouerdect die geuolcht waren ende in die zee gheghaen, ende daer en bleef niet een ouer.

29

Maer die kinderen van Israhel ghinghen doert midden der droogher zee, ende die wateren waren hemlieden als voor mueren ter rechter ende ter slincker zijde,

30

ende die Heere heeft op dien dach Israhel verlost wt die handen vanden Egiptenaren,

31

Ende si hebben die Egiptenaren sien doot ligghen op den oeuer vander zee, ende die grootdadighe hant welc die Heere ghebesicht hadde teghen hen. Ende dat volck heeft den Heere ghevreest, ende sij hebben den Heere ghelooft, ende Moysi sijnen dienaer.