Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde die Heere heeft tot Moysen ghesproken, segghende,

+ A

2

Heylicht my alle ierste gheborene, dat des moeders lichaem open doet onder die kinderen van Israhel, soe wel vanden menschen, als vanden beesten, want sij sijn alle mijne.

3

Doen seyde Moyses totten volcke, Ghedenckt desen dach, opden welcken ghy wt Egipten ghegaen sijt, wt den huyse der slauernien, Want die Heere heeft v met machtigher hant wt deser plaetsen gheleyt, dat ghy gheen ghedeesemt broot en etet.

4

Heden gaedi wt in die maent der nieuwer vruchten,

5

Ende als v die Heere sal ghebracht hebben int lant vanden Chananeen, ende Hetheen, ende Amorrheen, ende Eueen ende Iebuseen, waer af dat hy uwen vaderen ghesworen heeft, dat hy v gheuen soude een lant vloeyende van melck ende honich, soe suldi feestelijc onderhouden dese maniere van Godtsdiensten, op dese maent.

6

Seuen daghen suldi onghedeesemde brooden eten, ende op den seuensten dach salt des Heeren hoochtijt wesen.

7

Onghedeesemde brooden suldi seuen daghen eten, ende daer en sal gheen ghedeesemt broot by v lieden ghesien worden, nocht oeck in allen uwen palen.

8

⁺Ende ghy sult uwen sone op dien dach vertellen segghende, Dit es tghene dat my die Heere ghedaen heeft, doen ic wt Egipten ghinc.

+ B

9

Ende dit sal v wesen als een teeken aen v hant, ende als een ghedenckenisse voer v ooghen, ende op dat die wet des Heeren altijt mach in uwen mont sijn, want doer een machtighe hant heeft v die Heere wt Egipten gheleyt.

10

Ghi sult desen dienst onderhouden te ghesetten tijde van daghen te daghen.

11

Ende als v die Heere sal ghebracht hebben int lant der Chananeen, ghelijck hy v ende uwen vaderen ghesworen heeft, ende dat hy v dat lant sal ghegheuen hebben,

12

so sult ghi wtsceyden alle dat des moeders lichaem open doet, voer den Heere, ende alle dat ierst gheboren wordt in v vee, ende van al wat ghy hebt, dat een manneken es, dat suldi den Heere voer heylich gheuen.

13

Dierste gheboren van eenen esel suldi wisselen voer een scaep, maer eest sake dat ghi dat niet en verlost, soe sult ghy dat dootslaen. Maer alle dierste gheboren der menschen van uwen sonen, suldi lossen om eenen prijs.

14

⁺Ende als v sone v morghen vraghen sal, segghende, Wat es dit? soe suldi hem antwoerden, Die Heere heeft ons met een machtighe hant wt dat lant van Egipten gheleyt, wt dat huys der slauernien.

+ C

15

Want doen Pharao verhardt was, ende ons niet en wilde laten gaen, soe heeft die Heere verslaghen alle dierste gheboren des lants van Egipten, van die ierste gheboren des menschen, tot het ierste gheboren der beesten, daerom offer ic den Heere alle wat die moeder ierst open doet dat manlijc es ende alle dierste gheboren van mijnen sonen die losse ic.

16

Hierom sal v dit wesen als een teeken in v hant, ende als een aenhancsele voer uwen ooghen tot ghedenckenisse, om dat die Heere ons met machtigher hant gheleyt heeft wt Egipten.

17

Hierom als Pharao het volck hadde laten gaen, soe en heeftse die Heere niet gheleyt doer den wech vander Philistinen lant, welc daer by es, Denckende dat by auontueren hen berouden mocht, hadden sij eenighe orloghen tseghen hen sien opstaen, ende dat sij dan souden wederghekeert hebben nae Egipten.

18

⁺Maer hi heeft hen omme gheleyt doer den wech der woestijnen die daer es by die roode zee. Ende die kinderen van Israhel trocken op wten lande van Egipten ghewapent

+ D

19

Ende Moyses droech Iosephs ghebeente met hem, om dat hy die kinderen van Israhel besworen hadde, segghende, God sal v besoecken, draecht mijn ghebeente met v van hier.

20

Ende als sij ghetrocken waren van Sochot, soe maecten sij haren heyrlegher tot Etham, in die wterste palen der woestijnen.

21

Maer die Heere ghinc voer hemlieden om hen den wech te toonen des daechs doer een colomne der wolcken, ende des nachts doer een colomne des viers, om dat hy op beyde die tijden soude hen leytsman sijn ouer wech.

22

Nemmermeer en ghebrack die columne der wolcken sdaechs, noch die columne des viers snachts voer dat volck.