Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde die Heere heeft oeck gheseyt tot Moyses ende Aaron, int lant van Egypten.

+ A

2

Dese maent, een beghinsel der maenden, sal v lieden dierste maent wesen van alle dye maenden des iaers,

3

Spreect tot alle dye vergaderinghe der kinderen van Israhel ende segget hemlieden. Opden thiensten dach van deser maent, soe sal een yeghelijck nae sijn gheslachte ende huysghesin nemen een lam,

4

Maer eest dat sijn getal niet so groot en es, datter genoech waren om een lam te eten, soe sal hi sinen ghebuere tot hem nemen, die naest sinen huyse woont, tot een ghetal der zielen, welck groot ghenoech es om een lam te eten.

5

Ende dat lam sal wesen sonder smette, een manneken een iaer out. Nae welcke maniere suldi oeck een ionck bocxken nemen,

6

ende dat bewaren tot den veerthiensten dach van deser maent, ⁺ende dan sal die gheheel ghemeynte der kinderen van Israhel dat offeren des auonts.

+ B

7

Ende sij sullen van sijnen bloede nemen, ende dat strijcken aen beyde die stijlen, ende aen die ouerste dorpelen van die dooren der huysen, daer ghy dat eten sult.

8

Ende sij sullen dien nacht dat vleesch eten ghebraden aent vier, ende onghedeesemde brooden met wilde lactuwe.

9

Ghy en sult daer af niet rou eten, noch met water ghesoden, maer alleen doer

[p. *87]

tvier gebraden, ende ghy sult dat hooft metten voeten, ende inghewant al heel verslinden.

10

Ende daer en sal niet ouerblijuen tot des morghens toe, maer blijfter yet ouer, dat suldi int vier verbernen.

11

Maer ghy sult dit eten aldus, V lendenen suldi toe gorden, ende scoenen suldi aen v voeten hebben, houdende stocken in v handen, ende ghy sult haestelijcken eten (want het es Phase) dat es den doerganck des Heeren.

12

Ende ick sal dien nacht het lant van Egipten doergaen, ende verslaen alle dat ierst gheboren es int lant van Egipten, vanden menschen totten beesten toe, ende ouer alle die goden van Egipten sal ic rechte ordeelen doen, ick ben die Heere.

13

Ende dat bloet sal v tot een teeken wesen aen die huysen daer ghi binnen sijn sult, ende ick sal dat bloet sien, ende v lieden voerby gaen, ende onder v lieden en sal gheen verderuende plaghe wesen als ick het lant van Egipten slaen sal.

14

⁺Maer ghy sult desen dach hebben in een ghedenckenisse, ende dien suldi hoochlijck vieren den Heere tot eenen feestdach, in allen v gheslachten met eenen eewighen dienst.

+ C

15

Seuen daghen lanc suldi onghedeesemde brooden eten, opden iersten dach en sal daer gheen deesem wesen in v huysen. Ende wie ghedeesemt broot eet, diens ziele sal verghaen wt Israhel, vanden iersten dach aen tot den seuensten toe.

16

Den iersten dach sal heylich ende feestelijck wesen, ende den seuensten dach sal met die selue hoochheyt eerwerdich wesen. Gheen werc en suldi op die daghen doen, wtghenomen die dinghen die den eten aengaen.

17

Ende ghy sult dat ongheheeft broot onderhouden, want op dien seluen dach sal ic v heyr wten lande van Egipten leyden, ende ghy sult desen dach bewaren onder v gheslachten met een eewighe maniere.

18

In die ierste maent, opden veerthiensten dach der maent, tsauonts suldi ongheheefde brooden eten, tot den eenentwintichsten dach derseluer maent des auonts.

19

Seuen daghen lanck en salmen gheen ghedeesemt broot vinden in v lieder huysen, ⁺Soe wie ghedeesemt broot eet, diens ziele sal vergaen wt die vergaderinghe van Israhel, soe wel vanden vreemdelinghen, als vanden ingheborenen des lants,

+ D

20

Alle dat ghedeesemt es en suldi niet eten, maer in alle v woonsteden suldi onghedeesemt broot eten.

21

Ende Moyses heeft alle die ouders der kinderen van Israhel gheroepen, ende hy heeft tot hen gheseyt, Gaet ende neemt een dier, nae v huysghesinnen, ende offert Phase.

22

Ende een bondelken hyssopen doopt int bloet dat aen dorpel es, ende bespraeyt daer mede den ouerdorpel, ende beyde die stijlen. Niemant van v lieden en sal wt die doere sijns huys gaen tot smorghens toe

23

Want die Heere sal doergaen slaende die Egiptenaren, ende als hy het bloet sien sal aen den ouerdorpel ende beyde die stijlen, soe sal hi die doere des huys voerby gaen, ende hij en sal den slagher niet laten in v lieder huysen gaen, ende v lieden quetsen.

24

Bewaert dit wettelic woert, voer v, ende v kinderen tot inder eewigheyt

25

Ende als ghy sult comen sijn int lant, welc die Heere v gheuen sal, ghelijck hy gheloeft heeft, soe suldi dese ceremonien onderhouden.

26

Ende soe wanneer v kinderen v segghen sullen, Wat Godtsdienst es dit?

27

soe suldi hen segghen, Het es een offerande van Gods doerganck, als hy ghinck voerby die huysen der kinderen van Israhel int lant van Egypten, slaende die Egiptenaren, ende onse huysen vrij houdende. Ende het volck nederghebuycht, heeft aenghebeden.

28

Ende die kinderen van Israhel sijn wtghegaen, ende hebben ghedaen alsoe die Heere Moysen ende Aaron gheboden hadde.

29

⁺Ende het es gheboert inder middernacht, ende die Heere heeft verslaghen alle dierste geborenen int lant van Egipten, vanden ierste geboren Pharaos die op sijnen stoel sadt, tot den iersten gheboren van die gheuanghen vrouwe die inden kercker was, ende alle die ierste gheborene van die behelpighe beesten.

+ E

30

Ende Pharao es des nachts opghestaen, ende alle sijn knechten mede, ende alle die van Egipten, ende daer es een groot gheroep opghestaen in Egipten, want daer en was gheen huys, daer en lach eenen dooden inne.

31

Ende doen Pharao Moysen ende Aaron hadde gheroepen, seyde hy, Staet op, ende gaet wech van mijnen volcke, ghy ende die kinderen van Israhel, ghaet ende doet sacrificie den Heere ghelijck ghy segghet.

32

Uwe scapen ende groot vee neemt met v ghelijc ghy begheert hebt, ende wechgaende ghebenedijt my.

33

Ende die Egiptenaren dwonghen met machte het volck dat sij haestelijck wten lande gaen souden, segghende, Wij sullen allegader steruen.

34

Dus heeft het volck beslaghen meel ghenomen, eer dat ghedeesemt was, ende sij bonden dat in mantels, en leydent op haer scouderen.

35

Ende die kinderen van Israhel hebben ghedaen ghelijc die Heere Moysen beuolen hadde, ende sij hebben vanden Egiptenaren gheeyscht silueren ende gulden vaten, ende seer veel cleederen.

36

⁺Ende die Heere heeft den volcke gratie verleent voer die Egiptenaren dat sijt hen leenden, ende sij hebben die Egiptenaren berooft.

+ F

37

Ende die kinderen van Israhel sijn ghereyst van Ramesse tot Sochot, by nae seshondert duysent mannen te voet, sonder die cleyn kinderen, ende die vrouwen.

38

Ende met hemlieden es oec een ontellijcke menichte van alderley ghemeyn volck opghetrocken, ende scapen, ende groot vee, ende bouen maten seer veel beesten van versceyden natueren.

39

Ende sij hebben dat meel ghebacken, dwelc sij te voren beslaghen wt Egipten ghedraghen hadden, ende si hebben onghedeesemde assche coeken daer af gemaect, want sij en conden dat niet deesemen, om dat die Egiptenaren hen dwonghen wten lande te gaen, ende hen niet en lieten beyden, ende sij en hadden oeck gheen stade ghehadt, om eenighe toespijse te bereyden.

40

Den tijt dat die kinderen van Israhel in Egipten ghewoont hebben, heeft geweest vierhondert ende dertich iaren.

41

Ende als die iaren ouer waren, opden seluen dach es alle dat heyr des Heeren wt dat lant van Egipten ghegaen.

42

Dit es den nacht des Heeren diemen onderhouden moet, als hij henlieden wt Egipten gheleyt heeft, Desen nacht moeten alle die kinderen van Israhel onderhouden in haren geslachten.

43

⁺Ende die Heere heeft gheseyt tot Moysen ende Aaron, Dit es den godtsdienst van Phase, Gheen vreemdelinc en sal daer af eten,

+ G

44

maer soe wie een ghecocht knecht es, dien salmen besnijden, ende dan sal hy daer af eten.

45

Een vreemdelinck ende een huerlinck, en sal daer niet af eten.

46

Het moet gheten worden in een huys, noch ghy en sult van sijnen vleesche niet buyten draghen, noch ghy en sult sijn ghebeente niet breken.

47

Alle die vergaderinghe der kinderen van Israhel sal dit doen.

48

Maer eest dat yemant vanden vreemdelinghen begheert in v lant ouer te comen om te woonen ende oec het Phase des Heeren maken, soe sal ierstmael besneden worden al dat manlijc es vanden sijnen, ende dan sal hy dat Phase wettelijck vieren, ende wesen als een ingheboren des lants, maer esser yemant die niet besneden en es, die en sal daer niet af eten.

49

Die

[p. *88]

selue wet sal den ingheboren wesen ende den inwoonder die by v als vreemdelinck es.

50

Ende die kinderen van Israhel hebben ghedaen alsoe die Heere Moysen ende Aaron beuolen hadde.

51

Ende opden seluen dach heeft die Heere die kinderen van Israhel wt den lande van Egipten gheleyt met haren heyrscharen.