Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde die heere heeft tot Moysen geseyt, Ic sal Pharao ende dlant van Egipten noch met eender plaghen raken, ende daer nae sal hy v laten gaen, ende dwinghen om wt te gaen,

+ A

2

Hier om suldi alle den volcke segghen, dat elck man van sijnen vrint, ende elck vrouwe van haer ghebuerinne ontleene silueren ende gouden vaten,

3

Ende die Heere sal sijnen volcke gratie gheuen voer die Egiptenaren. ⁺Ende Moyses was een seer groot gheacht man int lant van Egipten, ende voer Pharaos dienaers, ende voer alle dat volck.

+ B

4

Ende hy heeft gheseyt, Dit seyt die Heere. Te middernacht sal ic in gaen in dat Egipten lant,

5

ende alle dat ierst gheboren es in der Egiptenaren lant dat sal steruen, van Pharaos ierste gheboren sone die op sinen stoel sidt, tot dierste gheboren der dienstvrouwen die aen den molen es, ende alle dierste gheboren van die behelpighe beesten,

6

⁺Ende daer sal een soe grooten gheroep wesen in alle dlant van Egypten, als daer te voren noyt en was, noch namaels sijn en sal,

+ C

7

Ende bi alle die kinderen van Israhel en sal niet eenen hont kicken, vanden menschen aen tot die beesten toe, op dat ghi weten moecht, met hoe wonderlijcken werck dat dye Heere die Egyptenaren van Israhel verscheydt.

8

Ende alle dese uwe knechten sullen afcomen tot bi mi, ende sullen mi aenbidden, seggende. Gaet wt ghi ende alle tvolck dat onder v es, ende daer nae sullen wij wtgaen, Ende hij es van Pharao wtghegeaen bouen maten seer gram,

9

Maer die Heere heeft tot Moysen gheseyt. Pharao en sal v lieden niet hooren, om datter veel teekenen moghen ghedaen worden int lant van Egypten,

10

⁺Maer Moyses ende Aaron hebben alle die teekenen ende wonderlijcke dinghen gedaen voor Pharao die gheschreuen zijn, ende die Heere heeft dat herte van Pharao verhart, ende hy en heeft die kinderen van Israhel niet laten gaen wt sijnen lande.

+ D