Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde die Heere heeft tot Moyses gheseyt, Gaet in by Pharao, want ick heb zijn herte ende sijnder knechten herten verhadt, om dat ick dese mijn teekenen aen hem doen soud,

+ A

2

Ende dat ghy dat soudt vertellen in die ooren van uwen kinderen, ende ws kinders kinderen, hoe dicmael dat ick die Egiptenaers gheslaghen hebbe, ende mijn teekenen om hemlieden ghedaen hebbe, ende dat ghy weten moecht dat ic die Heere ben.

3

Hier om sijn Moyses ende Aaron binnen ghegaen by Pharao, ende hebben tot hem gheseyt, Dit seyt die Heere der Hebreusscher Godt, Hoe langhe en wildi my niet onderdanich wesen? Laet mijn volc gaen dat sij my moghen sacrificie doen.

4

⁺Maer eest sake dat ghy wederspannich valt, ende dat ghy dat volc niet en wilt laten gaen, siet soe sal ic morghen sprinckhanen brenghen ouer allen v palen

+ B

5

die welcke sullen dat opperste der aerden bedecken, alsoe datmen van die aerde niet met allen sien en sal, maer tsal gheten worde alle dat nae den haghel ouerbleuen es, want sij sullen afknaghen alle boomen, die op die velden groeyende sijn.

6

Ende sij sullen v ende uwer knechten ende alle der egiptenaren, huysen veruullen, met soe grooter menichte als v vaders ende oude vaders noyt ghesien en hebben, van der tyt dat sij gheboren waren op der aerder tot op desen dach toe. Ende Moyses heeft hem omme ghekeert ende hij es van Pharao wt gheghaen.

7

Maer die dienaers van Pharao hebben tot hem gheseyt, Hoe lange sullen wij dit hinder lijden, Laet die luijden gaen dat sij den Heere haren Godt moghen sacrificie doen, ende siedi niet, dat Egipten heel verdoruen es?

8

⁺Ende sij hebben Moysen ende Aaron wederom gheroepen, ende doen comen voer Pharao, die welcke tot hem gheseyt heeft, Gaet ende doet sacrificie den Heere uwen Godt maer wie sijnse die gaen sullen?

+ C

9

Moyses heeft ghesijt. Wij sullen reijsen met onsen cleijnen kinderen, ende ouders, met onse sonen ende dochteren, met onse scapen ende groot vee, want het es een hooghe feeste des Heeren ons

[p. *86]

Gods,

10

Ende Pharao heeft geantwoert, Die Heere sij alsoe met v, ghelijc ic v, ende v cleijn kinderen sal laten gaen, Wie twijffelt daer aen, ghij en peyst wtnemende qualick?

11

Ten sal alsoe niet ghescieden, Maer gaet ghij mans alleene, ende doet den Heere sacrificie, want dat hebdij seluer begheert, Ende terstont worden sij wt ghestooten van Pharaos aensicht.

12

⁺Ende die Heere heeft tot Moyses gheseijt, Reyct wt v hant op dlant van Egipten, tot die sprinchanen dat die daer op moghen comen, ende verslinde allen tcruyt dwelck den haghel ouer bleuen es,

+ D

13

Ende Moyses heeft die roede wt ghesteken opt lant van Egipten, ende die Heere heeft ghebracht eenen dorren wint, alle dien dach ende dien nacht, ende des morghens heeft dien dorren wint die sprinchanen opghehauen,

14

die welcke comen sijn ouer alle dlant van Egipten, ende gheseten op alle palen der Egiptenaren ontellijcken vele, soe dat sulcke niet gheweest en hebben voer dien tijt, noch namaels en sullen zijn.

15

⁺Ende sij hebben alle dat ouerste der aerden bedect, alle dinghen bederuende. Aldus es verslint alle het cruyt der aerden ende wat vruchten op die bomen waren die den haghel ghelaten hadde, Ende daer en es oec niet groens ghebleuen aen die boomen, oft cruyden der eerden, in gheheel Egipten lant.

+ E

16

Waeromme heeft Pharao haestelijck gheroepen Moysen ende Aaron, ende heeft tot hen gheseyt, Ick hebbe ghesondicht teghen den Heere uwen Godt, ende teghen v lieden,

17

Maer wilt my die sonde oec dese reyse vergheuen, ende bidt den Heere uwen Godt, dat hy my dese doot wil afnemen,

18

Ende Moyses es ghegaen wt Pharaos aensicht, ende hy heeft den Heere ghebeden,

19

Die welcke heeft eenen seer stercken wint doen wayen wt den westen ende die heeft die sprinchanen opghenomen, ende gheworpen in die roode zee, ⁺ende daer en bleef niet een ouer, in alle die palen van Egipten.

+ F

20

Ende die heere heeft het herte van Pharao verhart ende hy en heeft die kinderen van Israel niet laten gaen.

21

Ende die Heere heeft tot Moysen gheseyt, Reyct wt v hant ten hemelwaert, datter duysternissen zyn int lant van Egipten, soe dicke dat men die tasten mach,

22

Ende Moyses heeft sijn hant ten hemelwaerts wtghereyct, ende daer sijn grouwelijcke duysternissen comen ouer alle dlant van Egipten

23

drij daghen lanck, Niemant en sach sijnen broedere, noch hy en roerde hem niet vander plaetsen daer hy was, Maer waer dat die kinderen van Israel woonden, daer waert licht.

24

⁺Ende Pharao heeft Aaron ende Moysen gheroepen, ende tot hen gheseyt, Gaet ende doet den Heere sacrificie, laet v schapen ende v groot vee alleen hier blijuen, laet v kinderkens oec met v gaen.

+ G

25

Ende Moyses heeft gheseyt, Ghy sult ons oec gheuen slachofferanden, ende brantofferanden, die wij den Heere onsen God offeren moghen,

26

Alle die cudden sullen met ons trecken, en daer en sal niet eenen clauwe achterblijuen, die ons nootelijck es ten dienste van den Heere onsen Godt, besonder aenghesien dat wy niet en weten watter ten dienste Gods noottelijck es, voer dat wy totter plaetsen sullen comen,

27

Ende die Heere heeft Pharaos herte verhardt, ende hi en wildese niet laten gaen,

28

Ende Pharao heeft tot Moysen gheseyt, Gaet van my, ende wacht v dat ghy voertaen niet meer mijn aensicht en siet, want op wat dach dat ghi voer mijn ooghen coemt, soe suldi steruen.

29

Ende Moyses heeft gheantwoert, Ghescieden moet alsoe ghy gheseyt hebt, Ic en sal voertaen niet meer v aensicht sien.